[OVERLINE]بسم الله الرحمن الرحيم

اول حاجة انا ملاحظ ان المنتدي نايم حبتين .. فا لو في جروب عالفيس او حاجة نتجمع فية قولولي .. لحسن انا هتجنن وهتشل .. انا بشوف مواضيع مهمة اوي هنا لكن ميتة ومحدش بيرد عليها

المهم .. انا كنت راكب عربية .. وحصلت ظروف في شغلي واتنقلت للغردقة .. وما ادراك ما هيا الغردقة .. الجمال والسحر .. المهم موضوع اخد العربية معايا فكس .. المشوار + البنزين .. خوف الاهل .. + الصيانة قفلي الموضوع خالص ..

وبقيت مقضيها مواصلات .. من ركوب عربية .. ل باقي الخمس ياسطي :(

المهم قررت ان مفيش حل غير ال بايك .. مع اني بكره البايك عشان الحوادث الي بشوفها وكدة لكن خلاص مفيش غيرو .. سريع .. وشكلو جميل .. وهيعمل شغل وهنطور بية العلاقات المصرية الروسية

من الاخر يعني انا واحد هخلص شغلي .. هضرب الطقم اركب البايك اخد بية اللفتين الحلوين .. واركن واقف علي رجلي (وقفة القطعنة ) زي ما بيقولو
ولا بتاع جري ولا رفع احصنة ولا الشغل دة لأني بخاف بصراحة بالعربية كان اخري 140 - 160 وعلي طريق مفتوح او سفر
المهم الواحد يبدأء ب 250 ولا 400 !!

ناس تقولي ال 250 معزة .. وكنبة .. وصغيرة .. وتعبانة .. واعطالها كتير .. وناس تقولي لو هتبتدي يبقي تجيب 250 تدرب عليها وتتعلم عليها

وناس تقولي اركب 400 علي طول .. المشكلة يا رجالة في الكاشات انتو فاهمين انا في نص الطريق حوشت 5 بواكي .. وفاضلي 7 .. (مش هدفع في 250 اكتر من 12 باكو )

انتو اية رائيكو العين بصيرة والايد بصيرة

ياريت بما اني مبتدأ الناس تشرحلي الاتي
ال 250 = يعتبر بقوة اية بالظبط وادائو عامل اية (لو هركبو لوحدي محدش هيركب علية معايا )
ال 400 = اقوي من ال 250 بنسبة كام % .. وهل الفرق ملحوظ اوي شكل واداء ومشاكل
ال 400 حاليا .. = يعمل رينج كام فلوس لو حالة ممتازة ادور وامشي

ساعات بشوف مكن بيتباع مكتوب (معمولو عمرة كاملة ) .. هل معمولو عمرة دة معناة ان المكنة حلت ؟ طب عشان بس نبقي فاهمين البايكات الي موجودة في مصر ال 250 او 400 موديلات 89 90 91 92 فا المكن اكيد خلصان فا انا عشان الصورة تبقي واضحة
ال 250 او 400 عمتا لما بتكون حالتو ممتازة هل معناة ان البايك من اول ما اخترع لحد يومنا دة لسة بالمكنة الاصلية .. ولا مقصود ان المكنة اتعملها عمرة كاملة وبقت تمام

طب المكنة لما بيتعملها عمرة حتي لو 100 في مكان سليم وميكانيكي محترف .. بترجع زي الاؤل او اداء قريب من الاؤل ؟

سعر المكنة كام انا ساعات بشوف مكن معروض ب 3500 - 4000 و 5000 بيقولك محتاج جوان .. او محتاج سبيكة او وش سلندر هل المكن دة بيكون لقطة ولا انا هنضرب علي عيني :D لو اخدتو

يعني مثلا اخدت بايك ابو 4-5 بواكي .. وركنتو في الجراج .. وابتديت واحدة واحدة اصرف علية

هبقي انا كسبان .. ولا هنضرب علي عيني وهدفع حق البايك الجديد ومش هيبقي زيو :(

المهم نجاوب علي الاسئلة دي وبعدين ارجع اقرفكو ببقية الاسئلة :D
[/OVERLINE]