الموضوع: مساعدة من مهندسي الكهرباء ضرورى

السلام عليكم ورحمة الله وبركاته

الموضوع باختصار اننا جبنا غسالة اطباق ماركة زانوسى ، واتركبت واشتغلت وكله تمام ، ماعدا مشكلة واحدة ، مشكلة الارضى

الغسالة بتكهرب اي حد يلمسها ، حتى لو مش في وضع التشغيل

كلمنا التوكيل بعتوا حد وصلها بحنفية المية ، ومشى من غير حتى ما يتأكد من الشغل اللى عمله
المهم الحنفية ما عملتش ارضى ، وده تقريبا تفسيره ان مواسير المية بقت بلاستيك وما بقتش ارضى زي زمان

المهم وصلتها بالماسورة اللى شايلة الحوض واتظبطت يومين بس للاسف الكهربا رجعت تانى ، اه بالمناسبة ، عكس الفيشة ما لوش تأُثير ، يعنى في كل الاحول بتكهرب

النهاردة بقى عملت حاجة حلت المشكلة ، بس عايز اتأكد واطمن اللى عملته صح ولا غلط

فكيت البريزة وجبت مفك تست وعرفت الطرف النيوترال ووصلت بيه السلك الارضى ، من جوة في البريزة وقفلت على كدة ( وطبعا التوصيل من جوة ، يعنى عكس الفيشة مش هيأثر )

طبعا المشكلة اتحلت ووالدتى قعدت تدعيلى قد كدة ، بس انا مش متأكد ، هل الطرف النيوترال ده بيفضل نيوترال على طول ، ويعتبر بمثابة ارضى جاي من المحطة ، ولا ممكن في يوم من الايام الاطراف تتعكس من المصدر ؟ وفي الحالة دى يبقى كأنى موصل طرف حي لجسم الغسالة ، يعنى كارثة ؟ ( انا مش فاهم اوى الحتة دي )