وانا راجع امبارح في الليله الجميله ليله ٣٠ يونيه لقيت صوت تك عند الفتيس وهوب ابتدي الصوت يزيد لغايه ما لقيت العربيه وقفت خالص متحركتش تاني ومكلبشه في الارض مع اني ممورها حاولت ازقها قدام ورا مفيش
ببص من تحت لقيت عامود الكردان فالت من مكانه طيب وبعدين دي الساعه ٢ بليل هعمل ايه وللاسف كان شارع مفهوش ولا عربيه راكنه كان من الشوارع اللي العربيات بتجري فيها بس
وقف تاكسي بيقولي مالك ونزل بص علي العربيه من تحت قالي دي الجلدة اتاكلت بتاعه عامود الكردان وقعد يسايس العربيه وزقناها شويه الا وقلاقي زيت عمال ينزل منها بص عليها قالي ده زيت باكين اكيد الماسورة بتاعته اتخرمت زقناها شويه كمان ولقيت بنزين عمال ينزل من عند نفس المنطقه بنزين كتير
المهم ربنا هداني اروح افصل البنزين من عند التنك ورا واتنكدت اخر نكد وتعبت جدا ورحت ركنها عند اقرب محطه مترو وسبتها واخدت وش الكاسيت وروحت