تأشيرة الامارات العربية المتحده

**YahiaAshraf** · 05-07-2013 10:14 PM

السلام عليكم

مساء الخير يا جماعه

والدى طبيب وجايله عقد عمل بدولة الامارات العربية المتحده
لو سمحتم كونت عايز أعرف تأشيرة الامارات بتاخد قد ايه ؟؟

وأنا داخل السنه دى تالته ثانوى

هل بالمنظر ده الحق انى التحق بتالته ثانوى هناك ولا لا ؟

( كونت سمعت ان اللى جايله عقد عمل بيسافر على طول من غير انتظار مده التاشيره و الكلام ده )

واحد قالى على الكلام ده هل الكلام ده صح ولا لا ؟؟؟
أرجو الرد السريع للأهمية و جزاكم الله كل خير

**أحمد كمال** · 05-07-2013 10:49 PM

بص

بالنسبة لتاشيرة والدك هي تاشيرة عمل

لازم الاول يوثق اوراقه (شهادة التخرج و اي دراسات عليا)

التوثيق للشهادات الجامعية بيكون من امين الجامعة ثم الخارجية المصرية ثم الملحقية الثقافية الاماراتية ثم السفارة الاماراتية

و يبعت الورق هناك بيقدموا له عالتاشيرة عشان يروح ..... بتطلع تاشيرة عمل (بتاخد من اسبوع لشهر حسب التساهيل) و بيبعتوهاله بيطبعها و بيسافر بيها ....... و هناك بيستكمل اجراءات الاقامة

------------

بالنسبة لانك تلحق تالتة ثانوي هناك فده مستحيل

لان التاشيرة دي لازم والدك الاول يسافر

بعدين يكشف طبي و يخلص اجراءاته

بعدين يطلع الاقامة

بعدين يفتح حساب بنكي و يطلع دفتر شيكات

بعدين يأجر شقة

بعدين يتعاقد عالكهرباء و المية

بعد كوووووووووووووووول ده يقدر يقدم لك على الاقامة ...... و لازم ياخد معاه شهادة ميلادك و قسيمة زواجه من والدتك موثقة برضه عشان يقدر يقدم لكم ....... بس مش هيقدر يقدم لكم قبل الخطوات السابق ذكرها

و حتى لو رحت معاه بسياحة مش هتقدر تخش المدرسة بسياحة لازم الاقامة الاول

**أحمد كمال** · 05-07-2013 10:50 PM

بالمناسبة نصيحة مهمة

قبل ما والدك يستقيل

خليه يروح يحلل hbv, hcv, hiv و يعمل اشعة عالصدر عشان ال tb

اطمئنان مش اكتر

لان لو لا قدر الله سافر و اترفض طبي هيترحل و هيتحط بلاك ليست كمان