الموضوع: تجديد عربيتي اللانوس في ورشة نايل موتورز

سلام عليكم
ازيكم يا رجالة
كل سنة و احنا كلنا طيبين بمناسبة قرب شهر رمضان.ربنا يكرمنا و يكرم بلدنا و اهلها بالخير و الامن باذن الله.
طبعا موضوع ان حد يفكر يشد عربيته ده قرار مش سهل خالص.لانك هتدفع فلوس مش قليلة و في نفس الوقت شكل و حرفية الصنعة ممكن متكونش كويسة.ده غير بقى انك ممكن تلاقي عربيتك مشيت 100 كم في يومين بس او ان حاجة تضيع منها.بصراحة انا فكرت كتير قبل ماخد القرار و فضلت اسال هنا و هنا بس بردو مش مرتاح.وبعدين قولت اكيد الناس هنا تعرف ناس كويسة.واكتشفت ان كريم منير عنده الورشة.وفضلت اقرا مشاركات الناس كلها و انطباعاتهم عن الشغل اللي هناك.بصراحة ارتحت قوي و كفاية ان الشغل كله في وش كريم و هو مش هيرضى باي حاجة والسلام.
المهم توكلت على الله و رحت يوم الاربعاء اللي قبل اللي فات.العربية طبعا كان فيها شغل سمكرة (تريللا ريحت على الرفرف الشمال ورا و العتب كان مخبوط و كم مرمة تانيه كده و طبعا خرابيش و البويق مقشرة من على الاكصدامات) انا قلت انضفها كده و ارش حزام كامل و اروقها بدل ما هى تعبانه كده
احمد قدورة رجل محترم بجد و فعلا كريم منير بيعرف ازاي يتعامل معاه
هو قالي هتستلم السبت.انا بصراحة استغربت.4 ايام شغل بس.افلح ان صدق.وبصراحة قولت انا شكلي هتكروت و الشغل هيتقلب و بعدين انا من 6 اكتوبر و جايب شنطة هدومي معايا و قولت اقعد عن ناس قرايبي في مصر الجديدة و قولت فيها اسبوع على الاقل
المهم اديت ليه العربية يوم الاربعاء و سيبته خالص و جيت ليه يوم الخميس بعد المغرب قولت اشوف الدنيا فيها ايه
اسيبكم بقى مع الصور بالترتيب الزمني للاحداث
ده يوم الخميس بالليل










طبعا بالنسبة ليا كانت مفاجاة اني اشوف كم الشغل ده تم في يوم واحد بس لما شوفت 4 صنايعية شغالين فيها.قولت ماشي.الحمد لله
مشيت و قولت بعد لما اصلي الجمعة اروح و اقعد هناك شوية معاهم.و كانت العربية خدت بطانة و بتتجهز للرش بالليل.بردو اسيبكم مع الصور









دي صورة فريق العمل.تسلم ايديهم بصراحة






بعد كده العربية اتغطت بالجرايد و رحنا كابينه الرش.وده صور من جوه الكابينة و مراجعة نهائية و تقفيل اللازم و مسح جسم العربية بالكامل.
كان نفسي اكون جوه اثناء الرش بس كنت تعبان و مكانش ينفع.كانت هتبقي صور لايف كده
ودي الصور من داخل الكابينة قبل الرش











وفي الاخر و بحمد الله و توفيقه سبحانه و تعلى اولا و اخيرا.دي كانت النتيجة بعد ما حطيت اللمسة بتاعتي في العربية.يعني رش الشبكة اسود و الجو اللي انتو شايفينه ده.بصراحة باسم الله ماشاء الله ولا قوة الا بالله.العربية شكلها جميل و بعد ما جبت كسوة جديدة قولت بعديها باسبوع كده اديها غسلة متينة من جوه و من بره في بنزينة وطنية اللي قدام بيتنا
اسيبكم مع الصور بردو













بصراحة ناس محترمة و كويسة.جزاهم الله خير
طبعا انا بشكر الله اولا و اخيرا و بشكر كل الناس هنا في نايل موتورز لانهم بجد بيتعاونوا مع بعض على و البر و التقوى
في الاخرباله عليكم اسالكم جميعا الدعاء لمصر بالخير و البركه و الامان و سائر بلاد المسلمين
والدعاء لنا جميعا بالتوفيق في رمضان و ان يعيننا الله على الصيام و القيام و سائر الاعمال الصالحة
والدعاءبالله عليكم لوالدي رحمة الله علية بالمغفرة و سائر موتى المسلمين
والدعاء لأمي بالشفاء و سائر مرضى المسلمين
ولنا جميعا بالستر و البركة و السعة في الرزق و الذريه الصالحة و ان يبعد الله عنا شر كل ذي شر

الورشه صحيح في الحرفيين جنب مدرسة عمار بن ياسر
تليفون كريم منير
01001263030

بالنسبة للسعر يا جماعة فده نسبي من عربية لعربية.يعني مش بالضرورة تكون نفس العربية و تدفع نفس السعر.المعاينة طبعا هى اللي بتحدد

سلام