خلي الناس تنشر سمومها في مكان اخر ... الحمد الله ..
خلي الناس تنشر سمومها في مكان اخر ... الحمد الله ..
مش الأسبوع عدى كده يا جماعة ؟
-
هو اختياري فعلا بس لما ببقى بفلي في المشاركات الجديدة ..
ساعات في عناوين مواضيع ... مفيش حد ميستحملش يخش عليها و يشوف ايه "القرف" الي بيتقال ... ناهيك عن "القرف" الي بيتقال جوة الموضوع ...
وكلامي للفريقين ..
و النقاش معروف و عقيم و مقرف و ممل و مفيش حد بيعترف بخطأ او حاجة .. و بيتنهي الامر بالتخوين و العمالة و السباب و تشبيهات و ايحائات قذرة ...
و كالعادة النقاش لما بيبقى في اتجاه طرف معين .. بيخشوا 10-15 عضوا بالاسم مبيعملوش حاجة في المنتدى (منتدى السيارات الاول في مصر) غير انهم عايشين في المنتدى الاجتماعي (حاجة غربية جدا) و يعملوا "معجب و شكرا" ويردوا بردود مؤيدة لاخ و مستهزئة بالطرف الاخر ..
وبرده الكلام للطرفين ..
الاعتدال او المحايدين (وانا مش منهم بمنتهى الامانة الى نادرا) نادرين جدا ان وجدوا اصلا ..
غير كدة ... لولا قواعد المنتدى و تطبيقها كان تحول الى منتدى اباحي من كثرة السبباب و اللعن من جميع الاطراف ...
جارى دراسة مد فترة غلق القسم
ياريت إبداء الأسباب
مع وضع فى الحسبان التالى:
1- أعتقد أنه من الممكن إخفاء مواضيع و مشاركات القسم من - آخر المواضيع
2- وضع قوانين حاسمة و واضحة للقسم
3- أكيد المشاركات هناك و المشاهدات من أكثر ترافيك على المنتدى يعنى أكثر قسم بيدخل دخل للمنتدى من الإعلانات يعنى المنتدى مستفيد
4- لو هايتلغى ياريت نلغى القسم الإجتماعى عشان يكون المنتدى فعلا مختص فقط فى السيارات
5- لو خلينا المنتدى مختص فى السيارات فقط نسبة المشاركة و الموضوعات الجديدة هاتقل بما لايقل عن 60% لأن مشاكل السيارات متكررة و موجود أغلبها بالفعل و أكيد الإدارة فاهمة الكلام ده كويس
و فى الأول و الآخر المنتدى الإدارة حرة تقفل أو تفتح و لكن أنا بسجل وجهة نظرى و لكم مطلق الحرية فى الإلغاء و لنا أيضا مطلق الحرية فى المشاركة من عدمها فى المندى ككل فى نطاق قواعد و قوانين المنتدى و شكــــــــــــــــرا
المنتدى من الاول مكنش فيه قسم غير خاص بالسيارات غير الاجتماعى و المنتدى كان ناجح و جميل جدا و لما احوال الشارع المصرى اتفتح بقى مصدر لوقف الاعضاء و التهكم و السخرية و الردود المستفزة يبقى غلقه افضل و المنتدى يرجع زى الاول و الى عاوز يتكلم فى السياسة يتكلم بعيد عن هنا
معلش مع كامل إحترامى لوجهة نظر حضرتك
على نفس المنطق ممكن نشيل الرادارات من على الطرق عشان هى مصدر مخالفات لكثير من الناس إللى بيكسروا السرعة القانونية!! و بالتالى المواطنين الشرفـــاء إللى قاموا بتكسير كاميرات الردار على المحور و على الدائرى بعد الثورة عندهم حق!!!
لو إنت شايف إن ده منطق سليم يبقى فعلا لازم يتقفل القسم إللى بسببه الناس بتتوقف :)
سيدى الفاضل الناس بتتوقف عشان بتكسر قواعد المنتدى و آداب الحوار مش أكثر ذى ما الناس بتتاخد مخالفة لما تكسر قواعد المرور
حضرتك بتتكلم بمثالية و تقريبا كده مش بتدخل القسم ده ولا ايه مين الى بيلتزم باداب المنتدى و قواعد الحوار ده الموضوع بيتعمل و مشاركة فى التانية هوب تلاقى الهجوم بدا و الاستهزاء من الطرفين و بعدين كل واحد متمسك برأيه و متعصب ليه جدا و قافل دماغه على كده و داخل يهاجم و حتى ناس كتيرة فى المنتدى من زمان قبل احوال الشارع المصرى كانو قمة فى الهدوء و العقلانية و فجأة اتحولو
صدقنى مش موضوع مثالية أكيد كلام حضرتك سليم و ده الطبيعى فى كل جلسات الحوار فى مصر فى آخر 3 سنين بس مش معنا الكلام ده إن نقفل و نبطل كلام بالعكس تماما
سيب الناس تغلط و تتعلم من أخطائها و عشان الناس تتعلم أدب الحوار و تقبل الآخر لازم يكون فيه قواعد صارمة و تطبيق صحيح ليها مش أكثر
الفرق بين المصرى و هو سايق عربيته فى مصر و هو هو نفس المصرى و هو سايق عربيته فى أى دولة خليجية أو أجنبية = ولا حجة هو هو نفس الشخس - الفرق إن هناك فى قوانين رادعة و تطبـــــــــق بحسم على أيا كان و هنا قوانين نص نص ولا تطبق طالما كوستك معاك
مثال الرادار هو مثال سيء و خاطئ جدا !
الرادار معمول علشان حضرتك سايق في طريق سريع ... هل ممكن حضرتك تختار متسوقش في طريق سريع علشان الرادار موجود؟
انما المنتدى معمول علشان "مناقشة عالم السيارات في مصر" ممكن حضرتك تختار تخش تتكلم فيه او لأ . و معتقدش في حد سجل في المنتدى علشان يخش يناقش في قسم احوال مصر .. و ده قسم فرعي افتتح في 2011 بعد الثورة بينما المنتدى كان مفتوح من 2007 ...
ومع كامل احترامي لحضرتك و الاخرين .. لو سبب وجودكم الوحيد في المنتدى او مشاركتكم الوحيدة هي وجود قسم احوال مصر ... يبقى انتم في المنتدى الخاطئ ! ولكنها حريتكم الشخصية طبعا !
القسم الاجتماعي كان ممنوع الكلام فيه عن السياسة او السلطة او الحكومة او او اواو .. و ده كان شرط اساسي.
اجتماعيات المنتدى
مقابلات - مواضيح شخصية بالاعضاء - مواضيع خاصة بالاعياد و رمضان - تهنئات - نصائح مثلا في الصلاة و الزكاة - اسئلة عن اماكن - مناسبات بتحصل حولينا من ندوات الخ - اسئلة عن برامج كومبيتر
الخ الخ الخ
كل ماليس له علاقة بالسيارات و السياسة !
افتتح القسم بعد 2011 علشان بقى في قسم كبيييييييير من الناس بتفتي مرة واحدة في السياسة و زادت المواضيع السياسية عن حدها فوجد لها مكان حتى تخرج من المنتدى الاجتماي
والمفروض ان المنتدى الاجتماعي و حتى احوال الشارع المصري مبيحسبش حتى في عداد مشاركاتك ! بمعنى اخر دي كانة تسهيلة من المنتدى للناس انها ترغي في السياسة بشكل او باخر و في نفس الوقت طبعا مساحة اعلانية زيادة اكيد مش بنكر (و ده مش عيب على فكرة).
انما كونه يتحول الى ساحة من السباب العام و التلميحات و الايحائات القذرة من جميع الاطراف .. و كون الي فاصل و الناهي و ادارة المنتدى نفسها عمرها ماحتكون محايدة 100% من جميع المشرفين ينتموا لجميع التيارات الموجودة .. يبقى حرام الاعضاء يتوقفوا بسبب ارائهم السياسية ... في منتدى اصلا بتاع سيارات !
يعني ممكن العضو الي يكون بيشتمني انا وفصيل كبير من الناس كان بيشكرني في موضوع اخر عملت في تقرير مثلا او اختبار لحاجة في السيارات !!
يبقى هل ده مكان لمناقشة ساحة سياسية ؟؟ و هو مكان مخصص لغير ذلك ّ!
عايز مثال بعيد زي بتاع حضرتك :)
انت ياسيدي في الشغل ... بتشتغل مهندس .. عندك ساعة Break كل يوم ترتاح و تاكل فيها .. هل علشان دي ساعة Break تقوم داخل و ضارب الناس على قفاها مثلا ! و تطلع كورة و تلعب ماتش جوة الشركة ! و تمشي تصوت و تصرخ ... و لما ال Break يخلص ترجع تشتغل تاني ؟؟
قرار سليم ويارب يكون على طول مش اسبوع بس
يا ريت يتقفل للابد
و فعلا المنتدي بقي هادي و مريح كده
و الواحد نفسه ابتدت تتفتح للمشاركه تاني بعد ما كانت خلاص
ياريت اغلاق القسم..ومن ثم تفجيره...ومن ثم لم بقاياه ووضعها في غرفة الادلة والمعمل الجنائي...ومن ثم تفجير المعمل الجنائي كمان...ومن ثم تفجير اي حد يتكلم عن القسم تاني لانه القسم دا ضيعلي عضويتي القديمة :)
رمضان كريم
والله يا جماعه الواحد فعلا نفسيته بقت احسن مش بس من غلق احوال الشارع بس قله الفقرات الاخباريه فى التلفزيون وحتى كلام الناس فى الشارع بقى اغلبه عن لقمه العيش وتحسن الاحوال .
واكيد كون ان الاداره تضحى بجزء من مكاسبها علشان تقفل قسم كان سبب ان اعضاء قدام جدا فى المنتدى وكلنا استفادنا منهم يهجروه او ناس تتوقف بسبب الاستفزاز خصوصا ان كل واحد بيدخل القسم بيكون داخل مقتنع ان وجهه نظره هى الصح ومعندوش استعداد يسمع غيرها او يغيرها ولو بنسبه 1% فيبقى ايه لازمته ممكن كل واحد يتكلم مع حد معاه فى نفس اتجاهه طالما انه معندوش استعداد يسمع الراي الاخر ولا الراي الاخر عنده استعداد يسمعله فيبقى القسم معمول علشان يزود الفرقه بين الناس وده اللى بيعمل عكسه القسم الاجتماعى اللى دايما كان بيقربنا من بعض وبنستفيد من تجارب بعض .
معلش مش فاهم مثال حضرتك خالص إيه دخل الضرب على القفا !! بالحوار أو الجحال حتى السياسى
أنا بتكلم عن آداب الحوار مش بتكلم عن سياسة أو إجتماعيات أو سيارات
الشخص المحترم صدقنى دائما و أبدا محترم فى أى قسم
و إذا كان غير محترم فشكره ليا فى موضوع لا يلزمنى بشئ ودى وجهة نظرى
أرجوا من الادارة الموقرة اعادة فتح القسم فورا فقد مر اكثر من أسبوع ولا تشاركوا ولو بقدر ضئيل فى جريمة التعتيم الإعلامى مع الخونة
تقرر مد فترة غلق قسم احوال الشارع المصرى
حفاظا على روح الود والترابط بين الاعضاء
والتى افسد الخلاف السياسى والجدل الكثير منها
تحيات ادارة المنتدى
سلام عليكم
مجرد رأي
- انا شايف اخوة بيتكلموا و يقولوا ان القسم عمل فيهم كذا , عذرا القسم ما خلاش حضرتك تخرج عن قواعد المنتدى , حضرتك اللي خرجت بنفسك و بإرادتك
- نقطة ان الاشراف قد لا يكون حيادي , للأسف حقيقية , حلها الوحيد ان الاشراف مع بعضه يجتمع و يحطوا مجموعة قواعد يمشوا عليها كأنهم ماكينات بالظبط , و يراعوا ضمايرهم على قد ما يقدروا
- نقطة ان القسم بقى مكان للمشاحنات حقيقية للأسف , ان كان ده عيبنا كمصريين كما هو واضح , و كااااااااااان القسم فرصة للناس تتعود على الخلاف المحترم طول السنتين و نص اللي فاتوا لكنهم ابوا لحد دلوقت
- بالنسبة لنقطة التعتيم الاعلامي فهي حقيقية فيما يخص بعض الاحداث فعلا
القسم دا الحمد لله دخلته مرة واحدة ومرضيتش ادخله تاني عشان ماكرهش حد
انا شخصيا مقاطعه عشان اريح واستريح
لأن كل واحد مش هايغير اللي في دماغه وقليل جدا اللي عنده ثقافة الإعتذار عند الخطأ
كل عام وانتم بخير ومبروك على مصر الحرية
حضراتكم مش عارفين اللي فيها فترة اسبوع الراحه الناس فضلت تجهز في مواضيع تهجم بيها على القسم و طبعا فيها كمية تهكم و استفزاز من الاخر ف كتر خيرهم اتصدموا بعد قرار مد الايقاف :)
ياريت الاداره تقفل القسم
خلاص عرفنا مبارك مع الفلول يساوي مرسي والاخوان
الاثنين واحد الاثنين قتلو واحد نهب وسرق والتاني حول المعونات علي خزنته اخوانه
قرار سليم وانا باعلن تاييدى ليه .
قرار مضمونه معا لمزيد من التعتيم الاعلامى !!!!!!!!!!!!