مواااااااقف ......................ميكروباصيه

**hosamsief** · 10-07-2013 02:22 PM

ازيكم يا اكسلانسات ... .. عاملين ايه .. رمضان كريم .....و كل عام و انتم الى الله اقرب و على طاعته ادوم .. و نسال الله العلى القدير ببركه هذا الشهر ان يديم الود و المحبه بين ابناء مصر اجمعين ..

ببساطه جدا .. و للى ميعرفش .. الشغل عندى حصل فيه مشاكل و بيصفى .. فقولت بدل ما الاقى نفسى واخد بالشلوط و قاعد جنب حرمنا المصون .. انفد بجلدى ده العلاج ببلاش ... قمت بايع العربية الملاكى اللى حيلتى و رحت جايب سوزوكى فان بالتقسيط ...
المهم .. صاحب الشركه عندى بعد ما مشى ناس و خلى ناس بارت تايم .. جه بقى عليه و قالى خليك معانا شهر رمضان يا حس .. .. قولت ماشى اهو اروح شغلى و انا راجع كده فى سكتى انأ نأ و احمل من على الطريق .....

و فى احدى المرات الظريقه .. لاقيت واحد تبدو على ملامحه علامات الوقار و عمال يشاورلى .. من بعيد و معاه مراته ..فقولت يا واد اقف شوفه .. المهم كان فى طريقى ...تقريبا الراجل ده مدرس علشان كان بيتكلم عن الكنترول و الامتحانات .. المهم الكرسى اللى قاعد عليه المفروض رجله بتلف علشان يفتح و يقفل .. تقريبا بقى هو مقفلوش كويس .. و انا متابع حديته و تعبيرات وشه فى المرايا و هو بيتكلم مع مراته تقريبا مدرسه زيه .. و جه مطب .. بكله براحه .. و زودت بنزين و ببص فى المرايات لاقيت .. رجلين ضاربين فى سقف العربيه عندى و الراجل مقلوب على ضهرة و قافش فى دراع مراته .. و هى كمان خلاص شكلها هتتشقلب لورا ... معاه ..

طبعا انا مذهول من كتر الضحك مش عارف اتصرف .. غصب عنى .. مش عارف ادوس فرامل او بنزين .. و الاكادة الرجل مستسلم و نايم و مستنى رد فعلى .. فين و فين لما اتلميت على نفسى و ركنت و عدتله الكرسى ...و كانت من الموقف الغريبه فعلا ......

امبارح .. يعنى من 24 ساعه بس .. قولت ياواد ما تنزل تعمل بروفه كده ... و تشوف نفسك هتفع تبقى سواق ميكروباص قد الدنيا ... و تشوف الليله بقى .. خلاص بقى ده هتبقى شغلانتك .. و اخدتى الشجاعه ... قمت لابس و نازل و اخدت الرخص و المفتاتيح و جى نازل .. لاقيت البيه الكبير بيقولى هروح اشتغل معاك ... يابنى اسمع الكلام خليك انت فى البيت ... العيله كلها كده هتبوظ ... لا.. هروح معاك ... طيب بتعرف تنادى؟؟ ... قالى اه .. طيب اتنيل البس شبشبك و تعالى .. هتعقد جنبى و هتنادى و تقول كارفووووووووور... كارفورررررررر.. ماشى

جيت على حته زحمه و الزباين على الارض .. والاقى الواد قاعد بيلعب فى الموبايل ... يابنى نادى .. يخرب بيتك .. البنزين هيخلص و امك هتخلينا نتسحر فى الجامع انهارده .. اخلص قول كارفور .. .. الواد قال كافور بسرعه و دخل كانه بيشتم الناس .. المهم ناديت انا و ابتدت تندع .. قولت حلاوتك يا حس ... شكلها كده هتلعب معاك و هتكون صاحب اكبر اسطول فان اير باص فى الشرق الاوسط ...

و رحت كارفور و حملت من هناك و رحت على المترو و الواد عمال يلم الاجرة و يبعت الباقى و لا انا عارف بيرجعلم الفلوس تانى ولا ايه ..وصلت عند المترو و نزلت الناس قدام الباب و وقفت احمل و نزلت قولت كافور عامل بقى زى دكر الليل و فاكر الحياة سهله ..
العريبه حملت كده بتاع 5 ركاب .. لاقيت واحد بعربيه زى بتاعتى جه كسر عليه كده زى بتوع المباحث علشان معرفش اطلع .. و نزل من العربيه بيدنجل و جاى قالى : انت يتحمل كارفور يا اسطى ... طبعا انا فاكرة هيركب ناس معايا قفولتله اه ..لاقيته برق كده .. وقالى ... يعنى انت مش عاجبك كل العربيات اللى بتحمل ده .. و بيشاور .. ببص لصباعه لاقيت حوالى 20 عربية زى بتاعتى واقفه طابور و بتحمل كارفور ..يخربيت كده ...و بعدين ؟؟

بص يا اسطى كده مينفعش .. لازم تخش موقف و فيه واحد هنا ماسك الموقف اسمه ( دنجل ) ؟؟ فقولت ماشى هودى الفرده ده و اجى اقابل دنجل الدور الجاى ؟؟ و قفلت الباب و طرت على كارفور و حملت من هناك و جيت علشان اقابل دنجل و انا استحضر مشاهد اتش دبور لما راح يقابل تجار المخدرات ..
المهم دخلت الموقف و انا منفوخ كده ... و اخدت من زبون سجارة مع انى مبدخنش من سنه .. و قولت اعمل كارت ارهاب .. لاقيت ما لذ و ما طاب من الاشكال الضاله و غير الاليفه ... و بسوالى عن عم ( دنجل ) لاقيت واحد بيقولى : اه انت عاوز المعلم ... هزيت دماغى كده و انا مخنوق ..

لاقيت الاخ دنجل خارج من كشك شاى و جاى بيقولى خير يا باشا .. انا دنجل ..
- باشا ... عاوز اشتغل هنا معاكم فى الموقف .... بصوت واحد بيحتضر
- انت منين ؟... و عمال يبص على نمر العربيه ... هو انت اشتغلت هنا قبل كده ؟؟؟؟ و بيعلب حواجبه
- انا .. ابدا .. ده زبون حلف عليه بالطلاق انى اجيبه هنا و انا جايلك كده سكه و ماشى بالاصول ..
- بص يا عم .. انت شكلك محترم .. بكرة هاتلى صورة البطاقه و الرخصه و انزل بس خلى بالك فى 200 جنيه دخول عربيه موقف ... و 10 جنيه فى اليوم ..
- انا .. بذهول .. 200 .. موقف .. عربيه .. ايه يا عم هو انا داخل تربتك .. انت هتدينى نمر جمرك مترو .. و بعدين انا هشتغل تلت اربع ساعات فى اليوم بالكتير اوى انا راجل موظف يا عم ..
- هو كده النظام .. ان شاء الله تعمل دور واحد .. هتدفع 10 ج فى اليوم ..و 200 جم دخول موقف
- هدبر المبلغ و اجيلك ... و انا بهرش فى دماغى ....
- عاوز تنزل انزل من بكرة يا عم و ابقى هات الفلوس براحتك ... ماشى يا كبير ...

خرجت من الموقف و يمر امامى شريط حياتى وتربيتى و اخلاقى لما اضطر انى اتعامل مع هذا الوسط ....لمجرد انه انسان خارج عن القانون ومسجل دخله فى الشهر ما يزيد عن 15 الف جنيه ......
و جارى التعرض لموقف اخرى ... يتبع

**ramy87** · 10-07-2013 02:37 PM

ربنا يوسع رزقك و يرزقك الرزق الحلال الطيب........

تحياتي :)

**friendship7897** · 10-07-2013 03:00 PM

أ/ حسام
كل سنة وأنت طيب

ونحن في أنتظار دائم لمواقفك الكوميدية والتراجيدية الميكروباصية
أنا بروح كارفور المعادي كتير وبشوف أسطول الميكروباصات اللي هناك فعلاً اللي أنت بتحكي عليها
ربنا يوسع رزقك إن شاء الله لأنك حد محترم وبتسعى لزيادة رزقك ورزق أولادك بالحلال
لما أروح هناك أسأل دنجل عليك - ههههه ، ومدام ناوي للشغل فعلاً لازم تكسب النوعية دي وغيرها
بس أعتقد والله أعلم أنك لازم تتقل شوية في دفع الفلوس ولو أنت جاهز لدفعها
علشان متكونش لقمة طرية للناس دي
يعني أسأل السواقين التانين دفعوا المبلغ دا فعلاً ولا أقل
وممكن تفاصل في المبلغ
أو ممكن تتفق معاه على تقسيطهم أو ما شابه
فاهم وجهة نظري !
وبالتوفيق إن شاء الله

**AHMEDCAR** · 10-07-2013 03:01 PM

ربنا يكرمك و يوفقك ان شاء الله

بص ده رقم واحد اسمه هانى فارس عنده مكتب تاجبر عربيات الراجل ده محترم فوق الوصف قوله على حكايتك كلها و هو هيفيدك من الالف للياء هو مكتبه فى زهرا الحى العاشر مدينه نصر

قولوا من طرف احمد ابوزيد

01118082191

**Khaled Seif** · 10-07-2013 03:05 PM

مش ممكن هاموت من كتر الضحك ,

أضحك الله سنك أخي الكريم وأدخل عليك السرور والسعادة

ورزقك رزقا واسعا حلالا طيبا مباركا فيه

**ahmedeihab** · 10-07-2013 03:12 PM

هههههههههههههه جمده المواقف دى

و ان شاء الله ربنا هيكرمك اخر كرم علشان رسمت بسمه عريضه على وجوه كان نفسها تضحك

و ربنا هيكرمك و هيوسع رزقك ان شاء الله

بس شوف عم دؤروم ده ولا دنجل

علشان انا ناوى اتبع نفس النهج اللى انت ماشى عليه الايام القادمه

^_^

**horas3000** · 10-07-2013 03:15 PM

للاسف موقف مضحك مبكي
ربنا يكرمك و يرزقك من وسع
بس لو ناوي تستمر في الشغلانه دي لازم تنصاع ليهم للاسف

**monamize4** · 10-07-2013 04:02 PM

انت صح و هتكسب خبرة جامدة من الحوار دا ان شاء الله

و متزعلش من حكاية (يمر امامى شريط حياتى وتربيتى و اخلاقى لما اضطر انى اتعامل مع هذا الوسط ) لان الشغل مش عيب و الحياة مش بتمشى زى ما احنا عايزين و الشاطر اللى يساير اموره ف كل الظروف

ربنا يكرمك ان شاء الله