الموضوع: الحمدلله بقيت اخيرا من مالكي اوبل , محتاج نصائحكم

السلام عليكم ,,
اولا رمضان كريم عليكم ,, و ان شاء الله ينعاد دايما عليكم بالصحه و العافيه ,,
الحمدلله ربنا وفقني و اشتريت اوبل فيكترا سي ٢٠٠٨ ماشاء الله ممتازه جدا , عدادها ٩٠ الف كيلو و كشفت عليها في منصور " الكشف الكامل حاليا سعره ٥٥٠ جنيه " و كنت اخدت ميعاد الكشف عن طريق رقمهم السريع , و العربيه دخلت الساعه ٩ و نص و خلصوها الساعه ١٢ " المفترض انها كانت تخلص على ١ كحد اقصى زي ما هوا مكتوب " ,,

التقرير كان فيه الاتي :

كبس المحرك و كفائته : ١٨٠ ’ ١٧٥ ’ ١٨٠ ’ ١٨٠ ’ مش عارف بصراحه هيا القيمه المفترضه تكون كام , و عملت اكتر من سيرش بدون فايده

الملاحظات كانت انها تحتاج طقم سيور و شدادات , لان صاحب العربيه كان غيرها برا التوكيل بس هوا اكدلي انه غيرها , فمش عارف المفترض اغيرها حاليا ؟ ولا اصبر لغايه ما العداد يكون كام ؟
الغريب :d ان الطقم ده في التوكيل بـ ٤٠٠٠ جنيه !! مش عارف بصراحه عن الاسعار كتير بس حاسس انه مبلغ مبالغ فيه جدا

الملاحظه التانيه كان انها تحتاج قربه مياه و غطاء لدوره التبريد , و تكلفتها كانت ٢٨٥ + ١٧٠

الملاحظه الثالثه كانت في الزوايا و الاتزان انها بتحدف يمين ,, بعد ما اشتريتها و جربتها اعتقد ان في بوش خفيف في الدريكسيون , مش عارف المفترض اني ازبط زوايا و البوش ده هيروح ولا ايه اللي محتاجاه بالزبط ؟

الملاحظه الرابعه و الاخيره كانت تيل امامي ( ٩٣٠ جنيه في منصور ) , و ديسكات اماميه (٢٢٣٠ جنيه ) مع التجربه الفرامل كانت قوتها معقوله لسه مجربتهاش على السرعه العاليه بس لغايه ١٢٠ كانت بتمسك كويس !

دي كانت كل الملاحظات و الباقي كله سليم الحمدلله ,,

ياريت تقولولي اغير ايه و هل الاسعار دي غاليه فعلا و لا هيا الاوبل كده ؟ و مين الصنايعيه الكويسين في اكتوبر ولا اعمل الصيانه في مقار ؟ كنت قرأت اكتر من كومنت ناس بتشكر فيهم ؟ ولا اتابع مع منصور ؟

بالنسبه للحجات التانيه لاني اول مره اشتري مستعمل . هل اغير زيت ؟ و اشوف زيت الفيتيس مثلا و اغير فلتر هوا و فلتر بنزين ؟ و الكلام ده ؟

ولا اسيب الوضع كما هو عليه لفتره ؟

شكرا جزيلا ليكم ,, لاني فعليا استفدت كتير جداا من مواضيع المنتدى
و رمضان كريم :)

تحياتي ..

لكل الناس اللي اشترت مستعمل ,, مقتبس من اهم المواضيع :
1- تتصدق ولو بالقليل بنيه ان ربنا يفاديك ويحفظهالك
2-غير فلتر البنزين والبوجيهات
3-غير سير الكاتينه وسير الدينامو وشيك علي بليه شداد الكاتينه وطرمبه الميه
4غير زيت الموتور مع الفلتر
5-اكشف علي امبير البطاريه
6-غير فلتر الهوا
7-اغسل الرادياتير وغير ميه حمراء وشيك علي الخراطيم والقفزان
8-اكشف علي حاله الكاوتش والترصيص والزوايا
9-غير تيل الفرامل امامي
10-اكشف علي فريون التكييف وتاكد من تبريده