يا جماعة يا ريت شوية اقتراحات لهاتشباك جامدة في حدود ال 140 ألف مش أكتر. أهم حاجة هي هتكون حريمي فموضوع الموتور مش مهم لكن أوتوماتيك طبعا و تكون بريستيج. يعني ما حدش يقولي سيريون مثلا مع أني بحبها لكن أد البلية و حرام أدفع فيها 130 ألف.
عرض للطباعة
يا جماعة يا ريت شوية اقتراحات لهاتشباك جامدة في حدود ال 140 ألف مش أكتر. أهم حاجة هي هتكون حريمي فموضوع الموتور مش مهم لكن أوتوماتيك طبعا و تكون بريستيج. يعني ما حدش يقولي سيريون مثلا مع أني بحبها لكن أد البلية و حرام أدفع فيها 130 ألف.
انا شايف زود و هات الريو
افضل حاجة اوبل كورسا وكفاية انك تبقي راكب المانى
الصراحة الأوبل ضهرها مش حلو خالص. بفكر في كورسا و جراند بونتو و الريو فعلا في المقارنة لكن حاسس أنها مش بريستيج زي البونتو و البولو. و كمان قريت في المنتدي هنا أن البولو هندي و طبعا الفتيس dsg.
شوفت نيسان تيدا ؟
التيدا حتي لو موجودة شكلها قديم جدا. أنا عارف أن البونتو بردو بتنزل من مدة لكن شكلها جميل و تحس أنها جديدة. عامة أنا بردو هشوف الكورسا علي الطبيعة ممكن تعجبني شكرا للجميع.
جراند بونتو
مش عارف الياريس هاتشباك تنفع وله لأ انا مش لاقي عنها اي مواضيع في المنتدي !
ارشح لحضرتك البيجو 208 ودي ب 145 الف و دي تجمع بين التصميم الجميل داخليا و خارجيا و موتور و استهلاك بنزين و تناسب استخدام سيده من حيث ان حجمها صغير و سهله القياده و الركن. انصحك تتفرج عليها
لو جديد بالسعر يبقى نفيش غير الريو والحاجات دي...
لو مفيش مشكلة في المستعمل يبقى جولف 2009 مثلا... مفيهاش غلطة!!
بص على فورد فيستا
برشحلك الكورسا
الكورسا في قائمة الاختيارات أما الفيستا أظن معدية المبلغ ده بكتير.
طب ما تفكر في رينو سانديرو
انا جبت لوالدتي واحدة اوتوماتيك مريحة وسحبها رائع وحريمي وحتوفر 45 الف
اوتوماتيك ستيبترونيك
ماتور فرنساوي 105-110 حضان تقريبا
توكيل ممتاز وايرباج
كاسيت بلوتوث
بس طبعا التابلوه مش رياضي زي باقي العربيات
أصل المشكلة أن المطلوب حاجة بريستيج حبتين. حتي الريو مش علي رأس القائمة لنفس السبب. الاتجاه الأكبر ل بونتو أو بولو أو أوبل و ممكن بيجو.
لكن مؤكد ال سانديرو عملية و موفرة أكتر.
انا كنت في نفس حيرتك و هقولك فكرت ازاي مع العلم انا لسه بفكر بردو
1- البولو ابعد عنها خالص عشان موضوع الفتيس ... بس كعربيه رهيبه
2- الريو مش اد كده و في ناس كتير بتشتكي من ان العفسه ناشفه و كوري كمان حرام تدفع 138 في كوري
3- الكورسا هتدفع 140 في عربيه فيها اير باج واحد و طاسات بس !!!!
4- الجراند بونتو ... دي بقي كل حاجه ايرباج و abs و اوروبي ... يعني معلش طظ في الياباني و الكوري و خش في الاوروبي اوبشن رهيب و امان و ثبات ... بس المشكله الوحيده التوكيل مش اد كده ... بس العربيه ممتازة في كل حاجه
انا اختارت الجراند بعد مقارنه اطول من طويله و فرجه و لف كتير العربيه حلوه و ممكن تشوف التقيم بتاعها فى قسم فيات
من غير لفالجراند بونتو بكل تاكيد كعربية اتحاد اوربى وشكل جميل
علي فكره الجراند بونتو تصنيع ايطالى
كوتش بريدجستون المانى مقاس 15 جنوط حسب الفئه
ضمان 3 سنوات بدون حد اقصي للكيلو
صيانه كل 10 الف يعنى راحه بال
2 ايرباج او زياده حسب الفئه
السحب معقول قوى مش زى ما فى ناس بتقول
الاستهلاك كويس قوى لو ماشى كويس من غير حرق
اى بى اس
اىه بى دى
لو قررت الجراند اشتريها من الطارق عامل عليها خصم كويس و محترم قوي فى المعامله بتاعته انا استلمت عربيتى منه ماشيه 7 ك
متفق معاك في البولو و ال ابيزا كمان عشان الفتيس.
الريو نفس الكلام عليها مشاكل و ان كانت بسيطة.
الأوبل أصلا شكلها مش أد كده و توكيلها زفت.
الجراند بونتو علي رأس القائمة. شكل و أداء و اسم و كماليات و كمان أوروبي.
طب الياريس و التيدا. أنا عارف أن عيبهم أنهم مش أوروبي و التيدا كمان قديمة لكن لازم يتحطو في الاعتبار.
واضح ان البونتو فعلا أنسب اختيار لحد الان. و لو ربنا كرم و استقريت عليها هجيبها من الطارق اللي في العرب مول.
الياريس طبعا عربيه محترمة جدا بس حجمها للاسف صغير زي البكانتو مثلا
و التيدا عربيه ممتازة بس تقفيل مكسيكي لكن صالون واسع جدا و ثبات لحد 130 لو مش بتجري و شكل معقول و توكيل كويس
بالمناسبه انا قررت اشتري البونتو و اتصلت بجميع المعارض و التوكيل و مش موجوده خالص ... و للاسف هعيد التفكير تاني من جديد و تبدا الحيرة من جديد ... بس انا ميال للريو يعني مع الشعب و توكيل محترم بس حرام 140 في كوري .. بس المشكله ان كل العربيات غليت ...
اتفرج فى المصريه بس متشتريش من عندها عشان بيبهدلو العربيات يا ريت لو عرفت تشترى من توكيل او من الطارق دول محترمين عن تجربه
+1
حضرتك ممكن تكلم 19207 و تقولهم لو عايز تتفرج عليها او تعمل تست درايف و شوف شكلها من جوه و بره و تقفيلها عامل أزاي و بعد كده قارنها بالبدائل التانيه براحتك . هي مش عربيه اسره اكيد زي معظم الهاتشباك بس موتور و تقفيل و شيك جدا و كمان حجمها صغير و فيها وسائل امان ايرباجز و فرامل ABS و ESP و لذلك اول ما قرأت متطلباتك من العربيه جت في دماغي علي طول . نقطه بس لازم اقولها ان سعر اعاده البيع بتاعها ما بيبقاش زي الريو مثلا او الحاجات المنتشره و ده بحكم انها مش منتشره و مش اي حد بيشتريها
Peugeot 208
بص بخصوص اعاده البيع واحد قال كلمه عجبنتى
تشترى عربيه للسوق تنكد عليك 5 سنين عشان يوم ما تبيعها تكون مبسوط
و لا تشترى عربيه عجباك و مقتنع بيها و تفرح بيها 5 سنين و تزل يوم ما تبيعها
اكيد ازعل يوم واحد كفايه الامان و الاعتماديه و التميز
المرسيدس احسن كتير من الباقيين و طول عمرها عامله زي الجنيه الذهب بشرط طبعا ان حالتها تبقي كويسه أما بقيه الموديلات اللي حضرتك ذكرتها فاتفق معاك في ان سعر اعاده البيع بتاعها بيبقي سيء و ان كنت آري انه مش عادل كمان بس هو ده السوق بتاعنا ، يعني لو سألت كتير من الناس تفضل الايرباجز و لا فتحه السقف هيقولولك طبعا فتحه السقف او هتلاقيهم بيفضلوا الشكل الهجومي زي ما بيقولوا او الالوان في العدادات عن وسائل الامان زي الفرامل يكون فيها abs و ebd و esp . انا بس من باب الامانه كنت لازم أقول لحضرتك موضوع سعر اعاده البيع علشان تبقي النقاط كلها واضحه قصاد حضرتك و انت بتختار . علي فكره معارض اباظه نفسها شغاله بقالها فتره في معظم العربيات مش بيجو بس وده مثلا في المعرض اللي في التجمع الخامس بتاعهم فممكن تلاقي عندهم تشكيله كبيره بس يستحسن تتكلم قبل ما تروح و تسأل علي العربيات اللي واقفه لانهم بينقلوها بين المعارض من وقت للتاني