بسم الله الرحمن الرحيم
السلام عليكم ورحمة الله وبركاته
لا
أخباركم إيه يا رجالة وعاملين إيه؟
ده تقرير للهوندا سيتي بعد 25 ألف كيلوا
أفكركم كده سريعا إنها هوندا سيتي الفئة الأولى موديل 2010 ترخيص يناير 2011
عملت بيها لحد دلوقتي 25 ألف كيلوا بمعدل 5 آلاف كيلوا كل 6 شهور

ده حيبقى تقرير مختصر عن العربية بعد ال25 ألف لكن لو عايز معلومات أكتر ياريت تراجع المواضيع التاينة اللي عن الستي

الشكل الخارجي
السيارة رغم إنها موديل من 3 سنوات لكنها مازالت تبهر كل من ينظر إليها. بقى عادي جدا عندي إني طول ما أنا ماشي كل الناس تقعد تتفرج عليها. وطبعا إن مافيش منها كتير فده بيخلي الواحد مميز.

الشكل الداخلي
لسه أروع بكتييييييير من موديلات تانية منافسة جديدة.

الأداء لسه الحمد لله زي ما هو قوي وبطلع من أي عربية 1600 على أي سرعة وتحت أي ظرف وخصوصا بعد ال 100 لأن كل العربيات بيقل سحبها على السرعات العالية ولكن بسبب الأي في تك قوة العربية بتفضل ثابتة حتى بعد ال 140.


الصيانة
حصل موقف لازم أحكي لكم عليه عشان تاخدوا بالكم منه.
أنا متعود كل 5 آلاف كيلوا أروح أعمل صيانة للعربية في التوكيل اللي في التجمع. ومتعود دايما إني أقول للمهندس إعمل الصيانة وأي حاجة تانية شايفها في العربية إعملها فورا من غير ما ترجع لي حتى.
المهم، في صيانة العشرين الظروف حكمت إني أروح الفرع اللي في جسر السويس وروحت وبلغت المهندس برضه إنه يعمل اللي العربية محتاجاه كله.
على 23 ألف ونص كيلوا تقريبا لقيت الفرامل لما بدوس عليها بعد ال 120 بتعمل صوت ورة خفيفة كده. قلت خلاص يبقى التيل لازم يتعمل وحروح أعمله في صيانة ال25.
بعدها بيومين تقريبا كنت في ستي ستارز وأنا خارج من الجراج حوالي 10 مساء لقيت العربية وأنا ماشي بتصفر ولما بدوس فرامل الصفارة بتروح. وعقبال ما طلعت على كوبري أكتوبر الصفارة بقت موجودة سواء ماشي أو دايس فرامل. طبعا نزلت نزلة أحمد بدوي ودورت على أي ميكانيكي ونزل تحت العربية وقالي ده التيل ولازم يتغير وطبعا عربيتي مالهاش تيل خالص غير في التوكيل أو في أمكان مخصصة قليلة جدا.
المهم بإختصار الميكانيكي إقترح عليا إني أملى التيل عند خراط نضيف عقبال ما أروح التوكيل وبالفعل تاتا تاتا روحت لخراط هو وصفهولي وقعدت ساعتين عقبال ما فكينا التيل ومليناه ومشينا.
طبعا العربية بقت فراملها سيئة جدا وبقت ما تجمعشي غير لما أدوس جامد.وشوفت يوم زي الفل عقبال ما وصلت البيت.
تاني يوم الصبح فجرا طلعت على توكيل التجمع الخامس وحكيت لهم القصة وبعد ما كشفوا عليها قالوا لي إن التيل دخل في الطنابير وإحتمال يغيروا الطنابير أو يعملوا لها خراطة على حسب السمك بتاع الطنابير.
قلت للمهندس إزاي العربية لما إتعملها صيانة ال20 ألف ما إتغيرلهاش التيل؟ قالي إن المهندس اللي عمل الصيانة ممكن يكون شاف إن التيل يكمل معاك ال5 آلاف. قلت له طب أهو ما كملشي ال5 آلاف. قالي بس المفروض إن التيل يصفر معاك لمدة 1000 كيلوا عشان ينبهك إنه عايز يتغير. قلت له التيل صفر فقط مسافة 4 أو 5 كيلوا.
المهم أنا كنت ناوي لو الموضوع وصل لتغير الطنابير إني أعمل مشكلة وأحمل التوكيل المسؤولية والمهندس اللي عمل الصيانة في جسر السويس لأني بروح الصيانة بإنتظام وكل 5 آلاف كيلوا (مش 10 آلاف) عشان ما عنديش وقت أضيعه في العطلة ويحصل نفس الموقف السخيف اللي حصل معايا ده.

الحمد لله إن الموضوع رسي على خراطة والحمد لله العربية رجعت زي الأول بالظبط وكله بقى تماما

نيجي بقى لتكاليف صيانة ال 25 ألف
التيل 650 تقريبا
الخراطة 200 جنيه تقريبا بس المهندس مشكورا لما لقاني عندي حق وماسك نفسي مش عايز أتنرفز وبتكلم بهدوء وأنا متغاظ عمل لي خصم بعد الصيانة 200 جنيه عشان يبقى التوكيل هو اللي عمل اللي الخراطة زي ما يكون بيتحملوا خطأهم.
صيانة ال 25 ألف 450 جنيه بتشمل تغير زيت وفلتر ( أنا بغير الزيت كل 6 شهور لأن الزيت المفروض ما يقعدشي أكتر من 6 شهور حتى لو ما عملتش ال 10 آلاف كيلوا) وصيانة دورية للعربية.
طبعا المهندس فلا العربية بفلاية عشان ما يتكررشي نفس الموقف وقالي إن البطارية ضعيفة وإنها أقل من مش فاكر كام أمبير والمفروض تتغير. ونصحني مشكورا إني أروح أغيرها برة عشان هي في التوكيل ب 600 وبرة ب 400. المهم حسبتها في دماغي ولقيت إني مش حقدر أفضي وقت تاني عشان أروح أغير البطارية وياعالم حلاقي فين في المنوفية عندنا بطارية كويسة فقلت له متشكر للنصيحة ولكن غيرها لي برضه دلوقتي.
غيرت فانوس ورا شمال عشان خد طوبة من عيل في الشارع وحسبي الله ونعم الوكيل ب 1200 جنيه والحمد لله التأمين شالها.

طبعا العربية خدت اليوم كامل وإستلمتها على الساعة 5 مساء.

اللي عايز أقوله بقى من الدرس اللي أخدته ده إنك لازم تأكد على موضوع التيل ده لأن من أول ما ظهرت الورة إياها لحد ما حصل التصفير ما لا يزيد عن 100 كيلوا والحمد لله إنها جت على قد كده. والعربية في أحسن حالة.

إرتفاع السيارة عن الأرض
وأنا لوحدي مافيش مشاكل مطلقا. وواحد معايا كمان زي الفل. واحد كمان ورا تبدأ تاخد بالك من المطبات. إتنين أو تلاتة ورا لازم تعرض على أغلب المطبات اللذيذة بتاعتنا.

الإعتمادية
الحمد لله السيارة إعتمادية جدا وبعد 3 سنوات معايا ولا مرة بفتح الكابوت الصبح وأنا خارج أو أروح أعملها صيانة قبل ما أروح سفرية طويلة. بتطلع في دماغي فجأة أقوم أخلص عيادة وأطلع على العين السخنة أو الساحل. فقط الصيانات الدورية في التوكيل.

السلبيات
لحد دلوقتي الحمد لله مافيش حاجة مضايقاني من العربية غير يمكن بس حكاية المطبات لما يكون معايا 3 أشخاص في العربية ودي مشكلة متهيألي في كل العربيات عشان المشكلة مش في العربية، دي في الطرق بتاعتنا.

ده متهيألي كل اللي عايز أقوله وطبعا لو في أي إستفسار تاني أنا تحت الأمر

والسلام ختام