استفسار لشراء هوندا 2007 أم 2009

**الشقنقيرى** · 15-07-2013 11:23 PM

مساء الخير عليكو وكل سنه وانت والمشرفين بخير
الحقيقه أنا عندى هوندا سيفيك 1996 ومرتاح معاها والحمد لله وزى الفل
لكن ربنا كرمنى بقرشين قلت انط بقا على 2007 ولكن بعض الناس خوفنى من قطع الغيار وكمان مشكلهه بالفرامل بتاكل طنابير وتيل
عاوز اعرف هل الكلام دة صحيح يعنى بلاش منها واخلينى زى ما نا بال 96
ولا اجيب 2008 أو 2009 تكون ملهاش مشاكل
طولت عليكو بس عاوز اعرف رأى الخبراء هنا بخصوص الموضوع دة لانى حدفع فلوس كتير اوى
شكراً ليكم

**SAMEH_FOUAD** · 16-07-2013 02:38 AM

هية طبعا من جانب قطع الغيار اغلى بفرق محترم

سيفيك 2007-2008 حاجة

وسيفيك 2009-2010 حاجة تانية

عشان بس تبقى عارف الفرق مابين الاتنين

طبعا السيفيك فيها حاجات مشهورة للاسف بتكون عيوب صناعة فيها وهية موجود فى 2007-2008 ولكن موجودة بنسبة اقل فى 2009-2010

علبة الدركسيون - قاعدة الزيت - تيل الفرامل بيخلص كل 15-20 الف جنية - ديسكات فرامل امامية

دية الحاجات اللى بتتأثر فى السيفيك بسرعة

غير كدة عربية فوق الممتازة

**SAMEH_FOUAD** · 16-07-2013 12:36 PM

قاعدة الزيت دية بتبقى قاعدة موجودة فى السيارات الحديثة عموما , وبتقلل اكتر اهتزاز المحرك وخصوصا اثناء الدوارة والتسارع الفجائى , وبتتحرك عن طريق ضغط الهواء والزيت , بس عيبها بقى لو باظت بتخلى الماتور مراجيح , صوت اهتزاز وتخبيط وانت ماشى وتخليك لازم هتغيرها يعنى هتغيرها , وتمنها فى التوكيل حاليا 1350 جنية

- هو الفرق مابين 2007 ومابين 2009 مش مجرد الطنابير الخلفية وخلاص , لأ الفروقات كتيييييييير اوى مابينهم اهمهم

1- شكل الكاسيت افضل بكتير من ال2007

2- جنوط مقاس 16 فى ال2009 مقابل 15 لل2007

3- شكل بقى الفوانيس الخلفية والامامية والاكدامات , والفوجات , والشبكة افضل طبعا فى 2009

4- ال2009 اعلى من ال2007 بفرق بسيط

انا لو منك عشان تريح نفسك من الحيرة دية , استنى شوية لحد ماتجمع مبلغ ال2009 واشتريها , لان الفرق مابينهم 15 الف جنية الى 20 الف جنية , فاميش مشكلة لما تصبر كمان فترة بس هتشترى اللى انت عايزة , او تدور على حد بيبع السيارة لظروف بيكون سعرها اقل من السوق مش اقل من 10 الاف جنية

**arabmarket** · 20-07-2013 02:58 PM

وانا جديا بفكر اطلع الطلعه دى ومش عارف الصح ايه ؟

هل فعلا الافضل الجيل الثامن ولا الخامس ايه رايك يا سموحه ؟ هل قطع غيارها غاليه بفارق محترم قوى يعقدنا يعنى ولا ايه ولو حد من الساده ملاك العربيه يكتبلنا بعض معلومات عن اسعار قطع الغيار هنا

وحاجه اخيره سعر السيفيك 2007 - 2009 كام لان فيه فروقات كبيره ما بين الناس بشكل يخليك مش عارف تحكم العربيه تعمل كام يعنى مثلا شفت واحده 2008 مطلوب 99الف و واحد تانى طالب 125 الف ليه كده

افديونا يا جماعه

**SAMEH_FOUAD** · 20-07-2013 03:23 PM

ياجماعة بس لما تيجوا تفرقوا مابين السيفيك الجيل الثامن , تبقوا عارفين ان 2007-2008 دة شكل و 2009-2010 دة face lift بشكل واوبشن مختلف

دلوقتى اقل سعر للسيفيك 2007-2008 هيكون 105 الف جنية , اقل من كدة هتكون رشة برة او فيها حاجة او محتاجة صيانة كتير , وطبعا ماشة كيلوهات كتير

واقل سعر لل2009-2010 ال lxi هيكون 120 الف جنية واعلى سعر ليها 135 الف جنية

ونصيحة منى اللى مقدم على شراء السيفيك 2009-2010 وماعهوش غير فلوس ال lxi مايبصش على ال vti عشان فية فرق كبييييير

موضوع بقى قطع الغيار , طبعا قطع الغيار بتاعة السيفيك غالية وكمان فيها شوية حاجات كدة بتغير على مدى قريب لو انت استخدامك كتير للعربية زى ( التيل - الطنابير - علبة الدركسيون - قاعدة الزيت ) دية اكتر حاجة بتسبب قلق لراكب السيفيك غير كدة العربية مافيش فيها اى حاجة تماما وممتازة جدااااااااااا

موضوع الفرق مابينها ومابين الجيل الخامس , طبعا الفرق واضح لصالح الجيل الثامن فى حاجات كتير , لكن هتيجى عند حاجات والتفوق هيكون لصالح الجيل الخامس زى ( التسارع - الثبات - سعر قطع غيار اقل - اعتمادية اكتر )
- والنقاط اللى بيتعادلوا فيها ( المساحة تكاد تكون واحدة - استهلاك البنزين واحد تقريبا الاتنين اقل استهلاك ليهم 200 كم فى الصفيحة واعلى استهلاك ليهم 180 كم فى الصفيحة )

شكل جامد للاتنين - خاماتها كويسة جداا وتقفيلهم ممتاز

يعنى من الاخر لو عايز تحدث توكل على الله اكيد مش هتندم بس تبقى حاطط الحاجات اللى قولتلك عليهم دول فى حساباتك