الموضوع: ايه راييكم فى العربيه دى ؟؟؟؟

بسم الله الرحمن الرحيم

دى اول مشاركه ليا ف قسم سيات

انا بقالى فتره بدور على عربيه وحظى وحش بسبب جنون اسعار المستعمل والعربيات المقلوبه اللى ف السوق ، مش هطول عليكم

انا معروض عليا عربيه سيات ابيزا 94 فابريكه دواخل ورشه برا ، فيها جنوط 15 سبور ، وتكيف وباور وسنتر وماشيه 235 الف كيلومتر ، ومتسقط فيها ماتور 2000 سىسى

بصراحه حكايه الماتور دى قلقتنى وخاصه ان دى اول عربيه ليا وانا شاب ف بدايه حياتى مش عايز اقع فى حاجه مشاكلها كتير وقطع غيارها نار ونادره

فيا ريت الخبراء يعرفونى اخبار العربيه دى من حيث قطع الغيار وسعر اعاده البيع وكدا
وبالنسبه للماتور الـ 2000 سى سى ، يا ترى هيبقى حوت بنزين زى ما الناس بتقول ، ويا ترى الضريبه بتعته كام ؟ مرتفعه زى ما بنسمع ؟؟ واهم شىء اخبار حوار دعم البنزين والكوبونات دا ، العربيه دى بالماتور دا هتدخل فى دعم البنزين ولا هتعتبر رفاهيه وهشترى بنزين غير مدعم وخاصه انى سمعت ان اى عربيه فوق 1600 مش هيبقى ليها بنزين مدعم

أسف ع اسئلتى الكتيير بس انا عشمان فيكم بزياده انكم تساعدونى ف اختيارى
ويا ريت حد يقولى العربيه دى بالمواصفات دى تعمل ف حدود كام

وشكرا مقدماااااا

المشاركة الأصلية كتبت بواسطة SYD

في البداية أحب أرحب بيك في قسم سيات نايل موتورز

بالنسبة للموتور دة اخر حاجة تبص عليها في العربية دي بالذات
لانه اسهل حاجة بتتغير وماتقلقش منها

اما عن الدعم فهي داخلة لانه هيتطبق لموديلات 96+

اهم حاجة في العربية
1- حالة الصالون والتابلوه
2- البارومة
3- تكييف شغال وكل الكماليات
4- العفشة
5- الكاوتش والبطارية (لانك 15 ولان البطارية اكيد 70 امبير)

السعر كام انت ماقولتش

والله المستعان
،
،

شكرا يا استاذى على ردك عليا وخاصه انك الوحيد اللى سأل فيا
انا ان شاء الله هشوف العربيه قريب جدا وهاخد بالى من اللى حضرتك ذكرته
بس حضرتك متعرفش ضريبه الماتور دا كام ف السنه ؟؟ واستهلاكه للبنزين برده ؟؟
وبصراحه ان مش غاوى تغيير مواتير فعشان كدا مهتم بالماتور حبتين
اما بالنسبه للسعر فصاحبها بيتكلم فى 29 الف

المشاركة الأصلية كتبت بواسطة syd

اعتقد والله اعلم ان الضريبة هتبقي فـ حدود 1100 جنيه سنوياًً ودة لأنه مثبوت 2000 سي سي
أعتقد رقم مرتفع ويقلق
اما عن الأستهلاك فثق تماماً انك تحت 3000 rpm هيبقي الأستهلاك الطبيعي لمحرك 2000 سي سي علي عربية صغيرة بمعني ::
في الطلعة هيبقي الأستهلاك طبيعي ولحد 100 كم / ساعة بدون حرق مع الألتزام بسرعة لفات محرك أقل من 3000 لفة/دقيقة هتعمل في حدود ال180-200 كم/الصفيحة

اما لو هتزيد عن 3 rpm فتوقع انه هيبقي غوول ومش هتكمل ال150 كم/الصفيحة
انا ماليش فى الجرى الصراحه ، بس معظم تحركاتى جوا البلد
وبصراحة فكل الأحوال فهو الأستهلاك كتير جداً للعربية دي
احنا المتوسط بتاعنا في حدود ال250-280 كم/الصفيحة بالمحرك ال 1.4 mpi
ولو بالمحرك الأستوك 1.0 mpi بتوصل لـ 330 كم/الصفيحة

اما عن السعر لو العربية تكييف وباور وسنتر وجنوط 15 كما ذكرت حضرتك فكدة سعر معقول وسيبك من قراءة العداد لأن لا قيمة لها مع تغيير المحرك وما هي الا دلالة عن حالة العربية ودي ممكن تلاحظها دون الألتفات لقراءة العداد
ان شاء الله هجيب ميكانيكى وسمكرى ونفحص العربيه كويس جدااا ولو حالتها كويسه هخلص فيها بأذن الله
وبخصوص تغيير المحرك فدة والله من اسهل ما يكون في العربيات دي ولو الميكانيكي شاطر هتشتري المحرك فيوم وتاني يوم هتبقي العربية دايرة وماشية بالمحرك الجديد
بصراحه انا اعرف ان الماتور الاستيراد عامل زى البطيخه وفى اخوه افاضل ف المنتدى واجهوا مشاكل مع المواتير الاستيراد ودى اول عربيه ليا ومش عايز اتعقد الصراحه ولا ادخل ف دوامه مصاريف مقدرش اخرج منها
وبالنسبة لكلامك معايا عن العفشة وتوافقها مع المحرك الـ 2.0 فأحب اقولك انه ما ينفعش تحت اي حال من الأحوال انك تنزل محرك 2.0 cc علي العفشة بتاعتها الأستوك للمحرك الـ 1.3 او حتي الـ 1.4
هتلاقي العربية مكفية علي وشها ومش هينفع تحت اي حال من الأحوال تمشي بيها

الصح انك بتجيب عفشة المحرك ال2.0 سي سي واللي غالباً هتجيبها بتاعة جولف 2 او بتاعة الجولف 3 بتمشي عليها
والأحسن هتغير كمان طقم الفرامل عشان السرعات والوزن الجديد للعربية
لأن العربية بالمحرك الـ 2.0 بيزيد وزنها حوالي 140 كجم
العربية بالمحرك الأصلي وزنها 945 كجم وبالمحرك ال2.0 بيوصل لحوالي 1100 كجم
وبالتالي لازم تغير العفشة (قدام وورا) ولازم تعدل الفرامل (قدام وورا)
طب والعفشه دى تعمل فى حدود كام ؟
اما عن توافر قطع الغيار في طنطا فأعتقد والله اعلم ان في بتوع قطع غيار في وسط البلد عندكم في شارع المحطة او الجمهورية مش متذكر اوي
بس حتي لو هتنزل القاهرة مش قصة اوي - تشرفنا في اي وقت وتنور القاهرة كلها
القاهره منوره بأهلها يا استاذى
تحياتي وتحت امرك في اي استفسار اخر ولا تتردد في السؤال
وبعتذرلك للمرة الثانية علي التأخر في الرد
الامر لله وحده وشكرا ع اهتمامك
والله المستعان
،
،

أشكرك يا استاذى الفاضل لردك على استفساراتى المزعجه
معلش اصلى معلوماتى شبه نادره ف السيات ابيزا

تحياتى ...

هو ليه القسم ناااااااااااااايم قوى كدااااااااا

بصراحه انا مش لاقى حد يرد عليا وبدأت اخاف اجيب العربيه وملاقيش حد ف القسم يرد عليا

أنا حسيت انى دخلت صحراء :d

المشاركة الأصلية كتبت بواسطة فتح الباب

اضف للمبلغ اللى معاك (11000) احدى عشر وهات موديل 2000 هترتاح
عيد دراسة الموضوع وماتستعجلش . تحياتى

والله يا استاذى انا مش هخبى عليك ، انا كنت ناوى ع نوبيرا وبعدين حصلتلى حبه ظروف قللت المبلغ ومقدرش ازود كتير عنه للاسف

شكرا لنصيحتك ...