السلام عليكم
اولا احب اشكر كل الناس اللى بتساعد لوجه الله وحابة انها تساعد بجد عشان المنتدى يكبر ويبقى ليه سمعة ممتازة زى اللى وصلها دلوقتى كده
ثانيا هبدأ أسرد مشكلتى ببساطة
انا معايا شاهين موديل 2000 فول اوبشنز هى ما شاء الله مشفتهاش مع حد خالص وكل اللى يركبها يقولى انا عمرى مركبت شاهين كده ولو عاوز تبيعها قولى وده رقم التليفون
المهم عشان مطولش انا عندى مشكلتين:-
1-كنت ماشى الصبح فى عز الحر وقابلت واحد صحبى رحنا اتجننا وشدينا مع بعض طبعا انا عارف ان الشاهين مش بتاعة الكلام ده بس يلا اهو اللى حصل المهم مرة واحدة شميت ريحت شياط بسيطة اوى وبدوس فرامل عشان اقف وانزل اشوف فى ايه لقيت مفيش فرامل فى رجلى رحت اتخضيت بس ربنا ستر الحمدلله ساعتها كنت ماشى على مهلى المهم رحت جايب الاول لحد مالعربية وقفت مع العلم ان الهاند ضعيف اصلا ومش مشدود كويس
بعد كده نزلت فتحت الكابوت اعمل شيك على زيت الباكم لقيته تمام قولت يبقى فى تيل اتحرق وممكن يكون سرب زيت بس الزيت زى ماقلت كان تمام رحت ركبت العربية وكملت سواقة وانا ماشى عالاول وخايف
الفرامل لما باجى ادوس عليها مفيش خالص لحد ااااخر حتة فوق الارضية بسنة فى حتة فرملة ضعيفة جدا وانا ماشى عالاول ممكن توقفنى لكن لو ماشى فوق ال40 كم مستحيل اقف المهم رحت راكن العربية ونزلت الصبح تانى يوم عشان اجربها لقيت الفرامل مفهاش حاجة وقوية زى الاول قولت الله فى ايه يا بنت المجانيييين عالصبح المهم طلعت عالميكانيكى بتاعى قالى ده احتمال يكون الماستر علق ولو عملتها معاك تانى هات ماستر وتعلالى اركبهولك بس كنت عاوز اخد رايكم فى المشكلة الاولانية دى
2-فى خرم صغير جدا بينقط والميكانيكى قالى انها من الريداتير نفسه مش من الكوعة والمياه بتنقص كل فترة كده بشكل ملحوظ من الإربة مع العلم انى بحط مياه خضراء المهم قالى فى واحد بيلحمه فانا بستشيركم هل الحمه وهيرجع عادى ويشتغل تمام ولا اجيب واحد جديد واتوكل على الله.
مع خالص تحياتى لكل القائمين على المنتدى واللى بيحبوا يساعدونا فى الله.