يا جماعة عايزين نعمل موضوع يجمع كل ملاك ال301 عشان نعرف نوصل لبعض بسرعة لو فية استفسارات او لو حصل لحد مشاكل مع العربية لا قدر الله

هبدأ بنفسى طبعا

أحمد السيد / مهندس / 301 هاى لاين / silver / مستلم العربية من اسبوع بالضبط / طريقى المعتاد من جسر السويس للمعادى عن طريق الدائرى (تقريبا 45 كم رايح جاى)

مميزات العربية:

  • سحب كويس،
  • عفشة ناعمة،
  • لسة مركزتش مع استهلاك البنزين بس انا فولت لما استلمتها و العداد دلوقتى عامل 350 كم تقريبا و لسة فية 1/4 التانك،
  • صوت الموتور هادى و مش بسمعة جوا العربية قبل ال120 - 130 و لو مشغل الكاسيت مش هتحس بية قبل ال140-150،
  • الفتيس ناعم فى الacceleration على طريق مفتوح لما تكون عايز سحب بسرعة و محمل علية،
  • الشنطة واسعة و مساحة الارجل فى الكنبة كويسة جدا،
  • قعدتها مريحة و دة احساس داخلى مش عارف تبع اية فى العربية بس لما ركبت العربية ارتحتلها غير الاسترا الجديدة اللى هى عربية رائعة بكل المقاييس بس قعدتها و قوايمها مكنتش مستريح فيهم مش عارف لية
  • التكييف كويس بس عندى احساس انة محتاج فريون، و هو تكييف مانيوال متنكر فى شكل اوتوماتيك
  • العربية شكلها شيك و فخم

عيوب العربية:

  • الفتيس كعادة التيب ترونيك فى نتشة فى التانى لو طالع واحدة واحدة
  • الفتيس برضة ساعات بيبقى فية سنة تردد او تاخير فى الاستجابة لما تفرمل عشان تهدى حاجة بسيطة و انت على 70-80 مثلا و بعدين تدوس تانى بحس ان العربية هنجت منى ثانية كدة و مبقتش عارفة تاخد انهى غيار و بعدين تجمع الغيار الصح و تشد
  • الثبات بتاع العربية اكتر حاجة مضيقانى لحد دلوقتى، عشان بقارنها بالميجان اللى كانت معايا قبل كدة و اللى كانت عاملة زى الطوبة الصراحة، 180 و اخد مطب الهوا على الدائرى ولا كأن حاجة حصلت، المهم دلوقتى ال301 130-140 ببدء احس بعيوب الطريق فى الدركسيون و لو خدت مطب هوا او فاصل بحس بلبة كدة مش لطيفة فى العربية
  • القزاز مفيهوش وحدات رفع، لازم تقفل القزاز كلة قبل ما تنزل، و دية حاجة مضيقانى عشان انا كنت متعود انزل من غير ما ابص اية المفتوح و اية المقفول و اقفل سنتر و امشى، دلوقتى ساعات بعد ما امشى ابص على العربية الاقى فية ازاز مفتوح

دة كل اللى فاكرة دلوقتى و لو فيى حاجة تانية افتكرتها هبقى ازودها إن شاء الله


فى انتظار المشاركات من باقى ملاك الجميلة ال301