مشكلة الفصل والتشغيل المتكرر لتكييف صني ٢٠١٣ كل ٥ ثواني، التكييف بفيصل ويشتغل كل ٥ ثواني ولما روحت السبع قالولي ان ده شئ عادي في الموديل ده بس مقتنعتش لان الموضوع مزعج جداً وأكيد ليه حل هما مش عارفينه. حد عنده حل؟
مشكلة الفصل والتشغيل المتكرر لتكييف صني ٢٠١٣ كل ٥ ثواني، التكييف بفيصل ويشتغل كل ٥ ثواني ولما روحت السبع قالولي ان ده شئ عادي في الموديل ده بس مقتنعتش لان الموضوع مزعج جداً وأكيد ليه حل هما مش عارفينه. حد عنده حل؟
مش فاهم قصد حضرتك يعنى ايه فصل وتشغيل متكرر للتكييف كل 5 ثوانى ؟
التكييف بيفصل لما يحقق درجة و يشتغل تانى و ده ممكن يصادف انها كل خمس ثوانى
عادى يعنى بس انت بتحس بفرق و العربية ناية او ان التكييف برودته مش كويسة؟؟
طب و الدنيا حر و انت لسه نشغله برضه بيعمل نفس الموضوع؟؟
لا طبعا مش عادي هوة في عربية بتلحق تسقع في 5 ثواني يعني ؟؟ وبعدين هوة كل 5 ثواني تسقع و 5 ثواني العربية حرارتها تزيد تاني اطلع علي فرع تاني من التوكيل
على فكرة الفصل بتاع الكمبرسور ده بيحصل لما تكون المروحة على السرعة الأولى لكن بعد كده مفيش فصل و ده اللى بيحصل معايا و أنا كنت ناوى أسأل فى التوكيل الزيارة القادمة و لو وصلت لشئ إن شاء الله أفيدك
وكمان ممكن يكون الفريون ناقص
بص ياباشا أن عندي نفس المشكلة روحت السبع وماكنش مقتنع بردة . دخلوني الهنجر جوة ووروني أكتر من عربية الكمروسيور بيفصل ويشتغل كل 10 ثواني وقالولي أنا ده الطبيعي بتاعها . مش عارف أنا ليه مش هاضم الموضوع ده لأن أنا كان معايا لانوس قبلها وكان لما تعمل التكييف على 2المغربية ماطقش تمسك الطارة من سقعويتها وده مش بيحصل خالص مع الصني. مع أن بعض الأخوة هنا بشكرو في تكييف الصني وشافين أنه ممتاز .
ألي أنا مستنتجة هنا:1-العربية تكييفها ضعيف فعلا بالمقارنة بالكوري( أعتقد أنه حركت الفصل والتشغيل دية ليها علاقة بالموضوع)
2-في مشكلة في بعض الموديلات وتوكيل السبع بشتغل في الناس(وارد طبعا)
معايا تيدا وفيها نفس الكلام
وكان فيه موضوع معمول فى القسم هنا من فتره لاحد الاخوه الاعضاء وقالوله برضه فى التوكيل عادى
بس مش عارف الاقى الموضوع تانى
شكل تكييف النيسان كله كده والله اعلم
أنا جريت كل الاقتراحات اللي الأخوة قالوها.
١) تشغيل المروحة على السرعة ٢ أو ٣ مفرقش.
٢) ال٥ ثواني بتزيد ل١٠ بالنهار عشان الحر
٣) برده في السبع وروني كزا عربية وحاولوا يفهموني ان ده عادي بس انا مش أهبل انا كان معايا برايد وبعديها فرنا بعديها افيو مكنش فيهم المشكلة دي خالص يمكن الأفيو كان تكييفها ضعيف بس مكنش بيفصل ويشغل كومبريسور كل ٥ ثواني.
انا هبعت لنيسان اسألهم وشكلي هعملهم مشكلة في صيانة ال٥٠٠٠
يا باشا نفس المشكلة و بعدين السبع يتميز بمهندسين إستقبال بيشتغلو الناس و مش فاهمين حاجة خالص
هو الموضوع فى حد ذاته طبيعى .... لكن 5 ثوان قليله جدا جدا ....
انا كمثال عندى فى الجراج لما درجه التبريد توصل للمطلوب ... التكييف بيفصل و يشتغل كل حوالى 20 ثانيه ...
تحياتى ...
طب ممكن حد يا جماعة من الأخوة إلي ليهم علاقة بالتوكيل يسئل ويفدنا .علشان لوكان الناس إلي في السبع دية بتشتغلنا ومش فاهمين حاجة مفروض يتظبطو بصراحة. أما لوكان العربية أصلا نظمها كده فهل ده بيأثر على الكمبريسور مع العلم أن فعلا أدء التكييف ليس على المستوى المطلوب
بص اللى بيخلى تكييف العربيه يفصل هوا حاجه من دول
لاما حساس الضغط بتاع دايره الفريون ( لو الفريون مشحون زياده يعمل كده وتلاقى العربيه ضعيفه فى السحب كمان لما تبقى مشغل التكييف )
او حساس الحرار اللى بتظبط عليه درجه حراره التكييف
او ثالثا واخيرا فصل للامان لما يكون درجه حراره الكمبريسور عليت جداااا فيفصل عندها علشان يحافظ على الكمبريسور ( فى بعض الاحيان لما يكون سربنتينه التكييف مش نضيفه بتعمل العيب ده )
اعمل تشيك على كل اللى فات ده وقولى
بص ياباشا انا معايا صني 2010 اتو الشكل القديم ... وحصل معايا موضوع ان التكييف فصل بس في الزحمة بمعني لو العربية واقفة في اشارة او مستني حد مثلا والتكييف شغال لو وقفت بالعربية التكييف بيفصل بمعني انو بيطلع هوا بس مش بيسقع ولو اتحركت بالعربية بيرجع يشتغل تاني وفضل علي كده قالو في اتو ايجيب محتاج فريون وحصل ولسه بايظ .. لحد معملت شكوي عن طريق الجروب بتاعهم علي الفيس بوك والرقم المختصر .... واتضح في السبع طبقا لكلام المهندس سعيد وده مهندس من الفنيين مش مهندس استقبال ان المشكلة في الريتاديتر كان درجة سخونة اعلي من المعتاد فكان بيسبب ضعط علي الكومبرسور بالذات لو العربية واقة وميفش حركة هواء ... وغير الريتادتير وحط التكييف علي الجهاز والحمد لله الدنيا تمام ... فنصيحة حضرتك ممكن تروح السبع وتسأل علي المهندس محمد عمر وهوا مدير الاستقبال مكتبة في الدور الي بعد استراحة العملاء .. او تسأل عن المهندس سعيد وهوا هيقوم معاك بالواجب
طبعا دا مش طبيعي
التكييف مابيفصلش أصلا
واللي يقوللك طبيعي حط صباعك في عينيه
جميع أجهزة التكييف والتبريد سواء منزليه اوللسياره وحتى التلاجات وغرف التبريد والتجميد لازم الكمبريسور يفصل ويشتغل تانى لسببين : الأول عند وصول دردة حرارة المكان المطلوب تكييفه لدرجة الحراره المطلوبه وده صعب تحقيقه فى السياره فى 5 ثوانى ............... والسبب التانى هو الفصل لأزابه او لعدم تكون ثلج على السربنتينه الداخليه ( المبخر ) والعمليه دى ممكن تكون كل 30 ثانيه والفصل لمده لا تزيد عن 5 ثوانى _______ والفيصل فى الموضوع ده كفائة المكيف عندك هل هى طبيعيه ولا حاسس انه ضعيف ؟
انا كان عندى نفس المشكله وروحت السبع اللى فى زهراء المعادى وتم التصليح ولما سألت المهندس كان فى ايه قالى انه ظبط ضغط التكييف والمشكله الحمد لله اتحلت
في اللوجان اما كان بيعمل كدة كان بيبقى في فريون زيادة