لانسر -ياريس-تيدا-مازدا 3

**hopeless20** · 22-07-2013 12:13 PM

السلام عليكم ورحمه الله وبركاته

كنت عامل موضوع قبل كده عشان اشتري عربيه في حدود 70-80 الف

http://www.nilemotors.net/Nile/360354-70.html

وطبعا من بعد ما بعتي عربيتي وانا متبهدل في المواصلات واعصابي تعبت بقالي اكتر من شهرين بدور علي عربيه تريحني ل 5 سنين ادام ان شاء الله
كل يوم والتاني بفكر في عربيه جديده وانزل اتفرج واقارن
شويه اقول اضغط علي نفسي واجيب جديد
وبعدين ملقيش جديد اوتوماتيك غير السانديرو والصني وكمان غاليين عليا جدا
قررت المستعمل وعمال بدور بقالي شهور
شويه قلت اجيب أوبترا وبعدين مستحرم تمنها اوي في عربيه كوري
وبعدين قولت اجيب سانديرو زيرو ... وخلاص هخلص فيها .. ركبتها واتخضيت من التقفيل بتاعها .. ردئ جدا ورخيص وميسويش ال 97 الف الي هيدفعوا فيها
نزلت اتفرج علي الريو .. خوفوني من قطع الغيار مع انها كوري .. مش فاهم ازاي
وبرضه التمن ممكن اجيب بيه ياباني

دلوقتي بفكر في واحده من دول ويهمني في العربيه قطع الغيار معمره ومعقوله ومتوفره
اعطال قليله
واسعه ويا حبذا لو عاليه .. والاكيد بنزين قليل

العربيه أوتوماتيك أكيد

لانسر 2007 (اعتماديه وقطع غيار كويسه بس اوبشن وامان اقل ومش لاقي حاله نضيفه منها)
ياريس 2008 (مش لاقيلها عيب غير ان الناس بتقولي متجيبهاش وخلاص)
تيدا 2007 (مش لاقيها خالص وخايف من قطع الغيار الغاليه)
مازدا 2008 (سمعت ان قطع غيار غاليه جدا جدا جدا واعطال كتيره وضيقه من الشنطه والكنبه اللي ورا)

**M I D O** · 22-07-2013 04:58 PM

انت جاوبت علي نفسك في الاختيارات فوق لانسر 2007

**S O P H O S** · 25-07-2013 12:19 PM

ياريس او لانسر

**Ahmed TRAVCO** · 26-07-2013 04:26 PM

الياريس والتيدا انعمهم على الطريق بس الياريس خفيفة جدا وعندنا في الشركة بس 3 حوادث على طريق مرسى علم... العربية ناعمة وعزلها جيد وسحبها حلو فمغرية في الجري وبعدين مع اي مطب هوا تشوف افلام رعب بقى... انا بتكلم عن 2008 اللي جربتها...

بالنسبة للتيدا فأنا ما سوقتهاش بصراحة... بس هي كانت مع اخويا في السعودية قبل ما يجيب الاكورد... وهوه كان دايما بيشتكي من ثباتها القليل وتعويمها بعد ال130... يعني زي الكوري في الثبات... غير كده كان بيشكر في وسعها من جوة ونعومة عفشتها وهدوء صوت الموتور... بس اعتقد هتلاقي ناس كتير بتقول على موضوع التعويم ده على سرعات عالية...

البومة هي اكتر عربية اعتمادية فيهم... انتشار مهووول... وبالتالي صيانات سهلة وقطع غيار اصلية وغير اصلية اكتر..ى العربية فقيرة من جوة بس شكلها مش وحش واوسع من الياريس والمازدا... ثباتها جيد وافضل من التيدا والياريس...

المازدا في رأيي افضلهم كركوبة وثبات... بس ده على حساب التوكيل السيء وندرة قطع الغيار... زائد فعلا ضيق المساحات الداخلية من شنطة وكنبة خلفية...