rpm عالى والسرعة منخفضه عن الطبيعى وسحب ضعيف

السلام عليكم ورحمة الله وبركاته

ازيكم يا سيتاوية

حصل معايا حاجه غريبة جداً، لأول مرة فى التاريخ أجيب 150 بعد ما كانت العربية آخرها بالعافية 130، ولكن حدث شئ أغرب

عندى مشكلتين

الأولى:

دلوقتى وانا ع المور الآر بى ام 17 !!!!!

ولو ماشى لو 30 فى النقلة 4 ييبقى السرعة 60 !! وفى الطبيعى كانت 80 أو 75

وكذلك فى كل النقلات والخامس لو الآر بى ام 30 يبقى السرعة 80 !!

الثانية:
أحيانا أدور العربية تفتح كونتكت ومطحطش منطأ، مفيش أى دوارة، بتعلق، ممكن أسيبها وادور تشتغل، وأخصوصا لو العربية بطلت منى فجأة وانا فى اشارة ولا بهدى وداخل على مول أو حاجه، ممكن مكنش دايس كويس ع الدواسات فتبطل آجى أشغلها ألاقيها معلقا، لازم حد يزقنى وتقوم، أو إنها تقوم لوحدها...

روحت لكهربائى مش أوى يعنى قعد يتمم ع الوصلات وكده وقالى ابقى جرب !! وفعلاً قعدت كام يوم مفيش مشكلة ولكن رجعت تانى كده !!

يرجى اضافة الآتى ف الموضوع تحت المشكلة الآولى

والنقل كمان سريع جدا يعنى بوصل ل 30 آربى ام بسرعة، وصوت الماتور مش عالى اوى يعنى

سحب العربية سريع لكن فى المطالع تقيل ولما اكون محمل العربية ناس معايا تبقى تقيله بردوا.

بالنسبه للسحب :
انا شاكك فى أسطوانة الدبرياج
طيب خلى ميكانيكى متخصص فولكس يبص عليها
بالنسبه لموضوع الكنتكت : ممكن تكون فبرة الكنتكت بيظه وبتتغير ب 40ج جديد

ربنا يباركلك على الإهتمام أنا روحت لميكانيكى مؤقتا لحد مروح لعصام الميكانيكى
قالى العداد بيعلق !! ، هو فعلا مش طبيعى بيعلى وبيوطى بشكل مش طبيعى، لكن السحب فعلا ده ميكانيكى فولكس قبل كده قالى ده اسطوانة دبرياج

بخصوص الكونتكت روحت لكهربائى مش فولكس ، قالى ده البطارية الكابل بتاعها بيعلق نضفلى الأواطيش !! وقالى جرب !! لأنها موقفتش ادامه فقالى مش عارف احدد الا لما تقف ادامى هشوف كده واوافيكم الاخبار

متابع معاك يامحمود

موضوع العداد معلق :

ده يعنى ممكن يكون احتمال وحضرتك الوحيد الى تقدر تحدد الموضوع ده لانها عربيتك وانت تقدر تحس ان عربيتك زي ما بتقول وهى على المور العداد بيبقى عامل 17 انت بتبقى حاسس ان العربية عالية ولا لما بتسخن صوت الموتور بيهدى وبتقى مش عالية وبتكون طبيعيه والار بي ام برده بيبقى على نفس الدرجة 17 !!!!!!
لو العربية بعد ما بتسخن وصوتها بيقل وبتهدى وبرده الار بي ام عالى تبقى تعليقه فيه لكن لو حضرتك حاسس انها ما بتهداش والعربية عاليةعلى طول انا ارجح جدا وبقوه حساس الحرارة جرب مرة ودور العربية فى اول الدوارة بتكون العربية عاليه بس مش للدرجة 17 انت هتحس الموضوع ولو لقيت العربية بعد ما سخنت هديت لكن الار بي ام معلق افتح كبوت عربيتك وهى دايرة وشيل فيشة الحساس بتاع الحرارة وارجع ركبها تانى وشوف اية الى هيحصل ......


اما موضوع السحب ده بيكون غاليا من طقم االدبرياج زي ما قالك ا /حسام وده برده بيبان وانت بتنقل بتسمع صوت خبط وانت بترفع رجلك من الدبرياج وبتستلم البنزين فى المطالع العربية بتموت شوية وطبعا ده بجانب السحب .

اما بخصوص التبطيل او انها فى الدوارة مش بتلقط فاحتمال من اتين :

1- راجع على الاسبراتير واتاكد من ان ظبته او مسمار الظبط بتاعه فى المنتصف لان ممن يكون هو السبب فى فصل العربية وانت ماشي والدليل عليه برده ان العربية تقطع فى المشي معاك او تعمل مدفع .

2- تانى حاجة فبره الكونتاكت بتعمل العجيب وبتخلى الواحد بيلف حوالين نفسه وبتبان بتجرب بسيطة بيعمله الكهربائي بيوصل سلك من المارش ولما العربية ما تدورش معاك حضرتك تفتح الكونتاكت وتنزل تمسك طرف السلك الى اوله واصل فى سلك المارش وتمشيه بس على طرف البطارية الكهرباء لو دارت العربية يبقى فبرة كونتاكت يا باشا .
وطبعا تراجع على قواطيش البطارية وتقيش الديمو بتاعك والكهربائي يجربلك المارش ما يكنش بيركن او حاجة ويشوفك البطارية من باب الصيانه .



وقبل كل ده راجع على مواعيد صياناتك وخصوصا البوجيهات ، الموضوع عايز كهربائي فولكس وهو هيعرف الى فيها .

انا شاكر لحضراتكم جدا الإهتمام
روحت لميكانيكى فولكس

طلع ان اللى كشف لى ع المارش فك خرطوم الهوا من الكاربيراتير فدخله هوا كتير .. فالميكانيكى ظبطلى الاسبراتير والكارب

العداد اللى كان معلق ومن الواضح يا جماعه ان وانا حاطط الموبايل ادام العداد أحيانا، بلاقيه لما يرن بيجنن العداد وبيعلق التعليقه دى، المهم هو حتى الآن رجع بفضل الله لوحده تانى بقى كويس .

الميكانيكى قالى بخصوص الدواره، ده فبرة كونتكت، وبص ع طرمبة البنزين لاقاها بتنقط زيت فقالى اغيرها استيراد بــ 80 جنيه تقريباً