هي فعلا عربيات منصور بتتفكك بسرعة؟
السلام عليكم وكل عام وانتم طيبين،
الموضوع ببساطة إني بقارن بين الاوبترا والالنترا عشان ناوي اشتري واحدة على اخرالسنة ان شاء الله. اللي عملته اني سقت الاوبترا الأول، بصراحة مكنتش متوقع كدة, على الرغم من علمي انها كوري ولكن بالفعل فيها طعم الأمريكاني خصوصا اني كنت لسة في امريكا وكنت بسوق هناك فورد موستانج. اللي عجبني في الاوبترا كمان التسارع بتاعها كان تحفة والثبات هايل واحساس القوة فيها عالي. هي على فكرة موديل 2007 أوتوماتيك. عشان ماطولش من يومين سقت الالنترا 2008 اوتوماتيك. انبهرت بالفخامة والتكييف الفريزير والانعزال التام عند غلق النوافذ ولكن لم اقتنع بالتسارع بالمرة ومحستش بالقوة اللي حسيتها في الاوبترا.
قلت خلاص كدة يبقى اوبترا خصوصا انها ارخص، اتفاجئت بناس أثق فيهم بيقولوا ان سيارات منصور مشهورة انها بتتفكك بسرعة ولازم تروح تربط العفشة كتير في الصيانة.
أولا هل هذا الكلام صحيح؟ ثانيا عالسريع كدة هل انطباعاتي بالنسبة للسيارتين صحيحة أم انها مجرد ميول شخصية؟
وجزاكم الله خيرا وآسف على الإطالة