الموضوع: مشكلة فى عربيتى محيرانى جداً

السلام عليكم أعضاء المنتدى الكرام

كل سنة و حضراتكم طيبين ، انا معايا عربية 128 موديل 1979 بس سليمة جداً و من حوالى ست شهور حسيت ان الموتور بيستهلك زيت و بنزين كتير و بدأ الموتور عزمة يخف جداً طبعاً ان عرفت ان الموتور عايز عامرة روحت للميكانيكى بتاعى و قولتلة على الموضوع كلة و بما ان انا عملت طقم شمبر من حوالى سنتين فكنت عارف ان الموتور هايحتاج عامرة كاملة و بما ان الموتور مخراطش قبل كدة و انا عارف انة ناعم و تمام ففضلت اعمل عامرة كاملة ....

المهم عاملت كل شى تمام التمام و جبتلها قطع الغيار الاصلية بتاعتها و الميكانيكى قفل الموتور تمام التمام الحمداللة طبعاً غيرت اسطوانة و ديسك و طقم سيرفيس كامل و بلى الكاتينه.

الموتور لين كويس على الواقف و بعدين اتحركت شويه على البطئ و كله تمام جداً و بعد كدة بدأت اتحرك بالعربيه و اروح بيها مشاويرى طلعت شويت مشاكل منها:

العربية عزمها قوى جداً جداً الحمدالله يعنى فى المشى على الطرق السريعة ممكن اعدى اى عربية على الطريق بسهولة جداً ماشاء الله بس العربية مبتجريش كوبس يعنى عزم قوى فى التسارع لاكن سرعة مفبش اكتر من سرعة 80 تحس ان الموتور صوتوا عالى شوية و على فكرة العربية 4 غيار من خمسة. روحت للميكانيكى قولتلو على الموضوع دة شاف الاسبراتير و الكربراتير و البوجيهات و قالى كلو تمام التمام بس العربية مبتجريش ياعم الحج الميكانيكى
قالى خلى بالك ان الفيتيس 4 غيار مش خمسة فلازم الموتور صوتة يبقى عالى شوية و حتى الان مفيش حل خالص ....

تانى حاجة السخونة ... العربية بتسخن و بتحرق بوجيهات ياعم الاسطى قالى شوف الريداتير و المروحة و الشكمان روحت شوفت كل دة و يقولولى كلة تمام و ذى الفل اوى اوى

المهم روحت لميكانيكى تانى قالى موضوع غريب جداً جداً .. قالى بالنسبة للسخونة الميكانيكى حاطت جوان وش سليندر واحد و المفروض يحط جوانين اتنين للوش عشان عندك غرفة الحريق كدة ضيقة و هو دة السبب فى السخونة و السرعة و قالى البساتم ممكن تكون بتاعت المكنة الكبيرة 1300 ودة الى بيديك العزم الكبير دة بس الفيتيس لازم يبقى خمسة غيار عشان يريح العربية على السرعات العالية 100 120

بصراحة انا حيران جداً و مش لاقى حد اثق فية غيركم عشان اعرف الكلام دة صح و لا غلط
و ملحوظة ان العربية جميلة جداً فى كل حاجة من فرش لدوكو لسمكرة لعفشة ثابتة جداً على الطريق يعنى مريحة جدا جداً فى السفر بس مشكلة الجرى و السخونة دة مخوفانى جداً

شكراً و معلش على الاطالة ورمضان كريم