هل من متطوع ، يُريح قلب متلوع ؟!
السلام عليكم ورحمه الله وبركاته
كنت فى حيرة من مدة طويلة ،، فى انى أختار عربية على قد الميزانية .. يا سلام علي القافيه :d المهم العربية تكون شكل و مضمون وقطع غيار على القد وكل حاجه ،، ودخلت فى معارك كتير بين عربيات كورى ويابانى و اوروبى .. إلى ان توصلت نهاية المعارك إلى (الرينو ميجان) انا مش هقدر اتكلم عنها ،، لان يكفى اللى قالوه عنها الاعضاء اللى موجودين هنا وفى اى منتدى ... من الاخر عربية فوق الخيال.
لكن لما تيجى لأرض الواقع وتكون الفلوس فى ايدك دلوقتى !! وخلاص هتشترى عربية بقى والدنيا هتضحكلك وكله فى اللذيذ .. تقوم ترجع تفكر تانى فى القرار اللى خدته بالنسبة للعربية ،، تيجى تقرء تانى وتالت مواضيع الاعضاء اللى هنا ،، والشك يدق بابك اللى يقولك جيت ادورها الصبح مدارتش لازم تشيل اواطيش البطارية لمدة دقيقتين وترجع تحطهم وتدور واللى يقولك تخبط على مش عارف ايه تلاقيها دارت !! واللى يقولك الرسايل اللى بتطلع على الطريق وهو ماشى ،، اذا كان اوفر هييت مش عارف فى ايه ، و الاير باج ماله ،، وترس الديفيزور اللى تقريبا تلات تربع المواضيع بتتكلم عنه والكويلات واللى يقولك متشتريش الميجان البانوراما علشان ساعات السقف بيعلق و بيسرب مايه ،، و المفتاح بتاع فتحة السقف تمنه 1500 جنيه !!! والخ الخ الخ من المشاكل !! وحوارااااااات !!
طبعا دى حاجه متخلنيش اكره الميجان بعد سنوات الحب دى كلها (عشق من بعيد لبعيد :d) لكن لما تيجى تقرب وتطلب ايديها ،، ممكن ترجع تفكر تانى ... فالسؤال المشهور .... هل تنصحونى بيها (بغض النظر عن اللى هيقول لو شوفت واحده كويسة مش هتشوف منها المشاكل دى ولو حافظت على صيانتها مش هتلاقى فيها الحوارات دى ) انا بتكلم عن الميجان كعربية ،، هل فعلا الحاجات دى بتظهر فيها لوحدها كدة يعنى ممكن ابقى مغير كذا وكذا و ابقى ماشى فى امان الله الاقيها تعطل على الطريق و حساس مش عارف ايه ماله وترس ابصر ايه ماله وتخلينى اكره اليوم اللى جبتها فيه و الخ الخ الخ ... و وجع قلب !!
فأرجو ان حد يطمن قلبى لانى المفروض هشتريها الأسبوع دة ان شاء الرحمن... وشكراً
