الموضوع: صيانة 1000 كيلو للريو وانطباع سيئ عن التوكيل

السلام عليكم ورحمة الله وبركاته

انا الحمد لله عملت صيانة 1000 km لعربيتى هى ريو سيدان هاى لاين وكيل انا عملت الصيانة من فترة بس الوقت ضيق اوى فى رمضان عشان كده اتخرت فى عمل التقرير البسيط
فى الاول قبل ماعمل الصيانة كنت لسه ماستلمتش الضمان من الموزع وكنت خايف انى لو روحت التوكيل ميرداش يعملى الصيانة الا بالضمان المهم كلمت السيليز اللى كنت اتعاملت معاه وهو صراحة شخص محترم جدا قالى مفيش مشكلة خالص روح التوكيل وهما لما يكشفوا على رقم الشاسيه حيعرفوا انها وكيل وحتعمل الصيانة على طول المهم قولت اكلمهم على الرقم المختصر بتاعهم عشان احجز ميعاد كل ماجى اتصل بيهم من على التليفون الارضى الاقى الرقم مش مجمع المهم اتصلت بالدليل معندهوش رقم تانى وبعد كده قولت اتصل بيهم من على الموبايل لاقيتهم ردوا وعرفت بعد كده ان الرقم بتاعهم لازم تتصل بيه من على الموبايل بس مش الارضى بصراحة قولت هما عايزين يستنفعوا مننا ولا ايه ههههههههه
المهم روحت فى ميعادى ولاقيت عربيات كتيرة اووى هناك كانوا واقفين صفين واحد للكيا وواحد للرينو اول اول ملاحظاتى حسيت ان الاهتمام بالرينو كان اكتر وصفهم كان ماشى على طول ماشاء الله معرفش حسيتها كوسة بقى عشان الرينو فرنساوى واحنا كورى على قدنا ههههه المهم اول ما وصلت للدور بتاعى كلمنى المهندس ووسألى حنعمل ايه قلتله صيانة الالف و كان معاه جهتز صغير كده دخل فيه ال vin code بتاع العربية وعرف انها وكيل بس لاقيته بيسألنى هى العربية دى باسم مدام هدى قلتله هدى مين ياعم هى باسمى انا المهم قالى طب هات الرخصة عطيتهاله وبعدين قالى هو فيه اى ملاحظات على العربية طبعا انا كان فيه كذا ملاحظة بدأت اقلهم وهو كان بيسجلهم فى ورقة الصيانة وهى كالاتى
1 سماع صوت تكة فى الفتيس لما بجيبه على p والمشكلة انى مش بسمعه على طول يعنى ساعات وساعات لا وملهوش علاقة بالصوت مثلا فى الشارع او كده
الاجابة ان ده صوت اللوك بتاع الفتيس ومفيش مشكلة وبصراحة الناس هنا فى المنتدى كانت فهمتنى الموضوع ده بس انا قلت اتأكد
2 ساعات كان بيبقى فيه صوت تزييق من الدريكسيون وخصوصا لما بكون مبيت العربية فى الشمس
الاجابة تم عمل تشحييم للدريكسيون وانا الحمد لله من ساعتها الصوت ده راح خالص وان كمان جبت الشماسة دى ولا مش عارف اسمه ايه اللى هو الكفر اللى بيتحط تحت البربريز الامامى عشان الشمس
3 ينفع الابواب يتعملها auto lock بمجرد ما العربية تتحرك
الاجابة لا
4 لما بكون قافل السنتر وافتح باب السواق او الباب اللى جنبه من جوه بيتفتح على طول وكأن مفيش سنتر
الاجابة طبيعى عشان ده الامان اما البابين اللى ورا مفهومش كده عشان الاطفال

5 وده كان من الحاجات المخيبة للامال قلتله عايز اركب جهاز انذار ووحدة رفع وحساس ركن وكان الصدمة مينفعش يا فندم ليييه يا عم المهندس اصل كيا كوريا منعه اى لعب فى كهربه العربية يعنى ايه منعا ياعم الحج هو انا حركب كمبيوتر دانا بقولك حركب حساس ركن قالى طب انت ماشترتهاش ليه بحساس ركن قلتله يعنى انا غلطان عشان اشتريتها وكيل كنت جبتها خليجى احسن قالى لا الهاى لاين وكيل فيها حساس ركن قلتله يا عم دى هاى لاين وكيل قالى يبقى انت اشتريت الدفعة الاولانية عشان اخر دفعة دى نزلت بحساس ركن قلتله انا شارلى العربية بقالى اسبوعين صراحة كان الدنيا صيام ومحبتش افطر عليه فى الاخلر انا كنت سمعت عن نوع واحد اسمه spy كان فيه ناس بتقول انه wireless قلتله عليه قالى ممكن تجيبه التوكيل وانا لو لقينا انه مفيهوش مشكلة نبقى نركبه بس للاسف انا سألت عليه ملقتش حدعنده خالص مش عارف الاقيه فين
بس بجد حاجة تحرق الدم لما يقولك كيا كوريا مانعة اى لعب فى العربية طب ما الحاجات دى بتنزل فى الموديلات الخليجى يبقى هى اكيد عارف ان المهندسين عندنا بطيخة وخايفة لحسن التوكيل يخرب العربيات بجد مهزلة

المهم سبت المفتاح فى العربية وقعدت فى كوستا طبعا الناس كلها قاعدة ببلاش عشان الدنيا صيام وبعد حوالى ساعة الاربع وده وقت انا شايفه كتير اوى نادوا عليا قالولى الصيانة خلصت وغيرنا زيت الماتور حطوا زيت شل التلرا 10000 كيلو وغيروه فلتر الزيت ومحدش جاب سيرة اذا كانوا ربطوا عفشة ولا لا وانا كمان نسيت المشكلة انى كنت حاسس انى باخد الكلام منهم بالعافية يعنى انا لاازم اسأل طب الدريكسيون عملته فى ايه طب الفتيس اه نسيت اقولكوا انا كمان اشتكيت من استهلاك البنزين حسيته عالى وقالولى انهم ظبطوا البوجيهات وعملى reset لل software بس ان محستش بفرق الصراح وطبعا دى حاجة تنرفز برده المهم اخت بعضى ومشيت وانا عندى انطباع سيئ الصراحة مع انى كنت بسمع اشعار فى توكيل كيا مش عارف هل المشكلة فى الفرع (بالمناسبة هو فرع سموحة الاسكندرية) ولا المشكلة فينا احنا طبعا واحد كتر خيره موظف قالى ان فيه صيانة مجانية على 5000 كيلو بيتعمل check على 26 حاجة فى العربية يا مسهل احنا فين وال 5000 فين عموما المكان نضيف وانا لما استلمت العربية لقيتهم عطينها ماسحة كده حلوة والصيانة كلفت 335 جنيه

اه اخر حاجة ودى كمان من ضمن الحاجات المستفزة انا لما مشيت من التوكيل واستلمت الفاتورة منهم مكنتش باصص فيها كويس المهم بعدها بيومين استلمت الضمان من الطارق فاقولت اروح بيه التوكيل عشان يسجلى فيه الصيانة ويفعله المهم ابصلك فى الفاتورة اللى معايا الاقيها مكتومة باسم واحدة اسمها هدى يادى ام هدى دى مين دى ياعم طلعتلى منين روحت رايح التوكيل الموظف اللى هناك قالى ان عربيتى متسجلى فعلا باسم الست دى و كل بيانات العربية صحيحة الراجل شك انى شاريها منها قلتله ياعم الحج ان شارى العربية زيرو من اسبوعين من الطارق وكانت ماشية 21 كيلو بس ورخصتها فى نفس اليوم المهم بعد مداولات قالولى تابع معانا بالتليفون عشان ماكنوش عارفين يعملوا لهدى دى delete ويحطوا اسمى مكانها بجد حاجة فلة واتصلت بيهم بعد كده والحمد لله عرفوا يحققوا المهمة المستحيلة دى بجد هدى دى شاكلها واصلة اووى هههههههههههه بس اسف بقى على الاطالة وان شاء الله ابقى اعمل تقرير عن مميزات وعيوب العربية و عن الفرش الجلد اللى ركبته

الف مبروك على العربية و الصيانة معلش المفروض تعرف ازاى العربية ديه زيرو و متسجلة فى الصيانة بكل بيانتها باسم واحدة فى مركز الصيانة من غير ما العربية تكون دخلت الصيانة قبل كده يعنى العربية ديه دخلت تعمل حاجة فى التوكيل قبل شراءك ليها ؟؟؟؟!!!!!! ياريت تتاكد ضرورى

المشاركة الأصلية كتبت بواسطة aymanshebl

الف مبروك على العربية و الصيانة معلش المفروض تعرف ازاى العربية ديه زيرو و متسجلة فى الصيانة بكل بيانتها باسم واحدة فى مركز الصيانة من غير ما العربية تكون دخلت الصيانة قبل كده يعنى العربية ديه دخلت تعمل حاجة فى التوكيل قبل شراءك ليها ؟؟؟؟!!!!!! ياريت تتاكد ضرورى

انا ماخبيش عليك انا فعلا كنت قلقان اووى اول ماعرفت الموضوع ده بس اللى طمنى ان ورق العربية اللى استلمته من المعرض كان كامل كله و سليم و لما قدمته فى المرور كان تمام ورخصت بدون مشكلة فاده يقطع الشورت فى البسين زى ما بيقولو هههههههه بس انا اللى اعتقده ان هدى دى لما جت تعمل صيانة لعربيتها مهندس الاستقبال دخل ال vin code بتاعها غلط فا اتسجل اسمها على عربيتى و ده وارد يحصل انا اهم حاجة انى اطمنت من التوكيل على ان الموضوع ده مجرد لغبطة فى ادخال البيانات وبرده لما اروح اغمل صيانة ال 5000 حبقى اتأكد تانى

توكيل هيونداي نفس الكلام اللي قلوه لحضرتك ممنوع تركب سنسور بارك ممنوع كاميرا ممنوع اي كماليات علشان ضفيره الكهرباء ولو عملتها برا تخرج من الضمان وشكرا علي كدا

المشاركة الأصلية كتبت بواسطة john55

توكيل هيونداي نفس الكلام اللي قلوه لحضرتك ممنوع تركب سنسور بارك ممنوع كاميرا ممنوع اي كماليات علشان ضفيره الكهرباء ولو عملتها برا تخرج من الضمان وشكرا علي كدا

الكلام ده انا سمعته هنا في السعودية
وبيقولوا ان الضفيرة ضعيفة
بس بلاقي شباب مركبة سنسور وزنون وكاميرات وكله تمام ومفيش اي شكوى
المهم ان الكهربائي يكون شاطر وفاهم

المشاركة الأصلية كتبت بواسطة john55

توكيل هيونداي نفس الكلام اللي قلوه لحضرتك ممنوع تركب سنسور بارك ممنوع كاميرا ممنوع اي كماليات علشان ضفيره الكهرباء ولو عملتها برا تخرج من الضمان وشكرا علي كدا

طب سؤال ده يخرج العربية كلها من الضمان ولا يخرج كهربة العربية بس من الضمان لان ده حيفرق

المشاركة الأصلية كتبت بواسطة moh.saladin

انا ماخبيش عليك انا فعلا كنت قلقان اووى اول ماعرفت الموضوع ده بس اللى طمنى ان ورق العربية اللى استلمته من المعرض كان كامل كله و سليم و لما قدمته فى المرور كان تمام ورخصت بدون مشكلة فاده يقطع الشورت فى البسين زى ما بيقولو هههههههه بس انا اللى اعتقده ان هدى دى لما جت تعمل صيانة لعربيتها مهندس الاستقبال دخل ال vin code بتاعها غلط فا اتسجل اسمها على عربيتى و ده وارد يحصل انا اهم حاجة انى اطمنت من التوكيل على ان الموضوع ده مجرد لغبطة فى ادخال البيانات وبرده لما اروح اغمل صيانة ال 5000 حبقى اتأكد تانى

طيب الحمد لله و الف مبروك على العربية و ربنا يحفظهالك و اتاكد تانى لان لا قدر الله ممكن تكون عاملة حاجة و دخلوها التوكيل باى اسم بس ان شاء الله الكلام ده مش موجود عندك بس اهو نوع من الاطمئنان فى الزمن اللى مايعلم بيه الا ربنا

المشاركة الأصلية كتبت بواسطة moh.saladin

طب سؤال ده يخرج العربية كلها من الضمان ولا يخرج كهربة العربية بس من الضمان لان ده حيفرق

ضمان الكهربا بس هو اللى بيخرج من الضمان

هي ازاي الهاي لاين مفيهاش جهاز انذار ووحدة رفع وحساس ركن

امال فيها ايه ؟؟؟ انا كنت ناوي اشتري البيزلاين بس كده شكلي هغير رايي في الريو اصلا

المشاركة الأصلية كتبت بواسطة sehs15

هي ازاي الهاي لاين مفيهاش جهاز انذار ووحدة رفع وحساس ركن

امال فيها ايه ؟؟؟ انا كنت ناوي اشتري البيزلاين بس كده شكلي هغير رايي في الريو اصلا

بص بلاش البيزلاين فى الريو ممكن تجيب ال 301 احسن لكن لو حتجيب الهالى لاين اعتقد الريو افضل وبالنسبة للسعر انا شارى عربيتى ب 142500 بخصم من الطارق و ال301 بتتباع استلام فورى ب 142000 عشان بيحوطوا اوفر برايس فا تقريبا مفيش فرق فى السعر