محتار أجيب ايه يا جماعة انا مركز في التيدا بس خايف

**obdima** · 04-08-2013 04:56 PM

السلام عليكم عايز حد ابن حلال ينصحني بالصح انا معايا 95 الف جنية كان معايا فولكس جيتا 2007 وطلعت عين اللي جابوني كلهم (آسف في اللفظ ) بس هي دي الحقيقة المهم الحمد لله بعتها بعد خسارة 30 الف جنية ..........لا تعليق طبعا بس كانت كابوس بالنسبالي انا كان معايا ماتريكس 2005 قبلها وكانت ملاك بالنسبة للجيتا ......المهم قريت على المنتدى مع سماع ان التيدا عربية معمرة غير بس ....هل قطع غيارها موجودة ومنتشرة و سعرها ايه في متناول اليد ولا اوفر زي الجيتا كده اروح اجيب سدر للعربية بالف جنية ليه؟؟؟؟ فأنا محتار جدا عايز اشتري تيدا هاتش باك وانا مستريح هل دق قرار صحيح ولا غير مناسب خصوصا اني موسوس جدا مش بحب اسمع صوت في العربية وخصوصا لو كانت عفشة ايه أخبار عفشتها ؟؟؟؟؟ و موتورها وعلبة الدريكسيون ايه أخبارها ؟؟؟ التكييف ؟؟؟ وتوكيل السبع ؟؟؟؟ كل ما هو يخص العربية دي ارجوكم المساعدة

**د.عماد صلاح** · 04-08-2013 05:29 PM

طب ماتجيب اوبترا كسر زيرو ...انا لسه جايبها ثابته سريعه قطع غيار متوفره صالون واسع و تكييف ممتاز و اعتماديه في الصيانه وقطع الغيار

**Batman372** · 04-08-2013 06:13 PM

اختيارك للتيدا ممتاز جدا و سوف لا تندم عليه ... بالتوفيق
تحياتى ...

**mohjarr** · 04-08-2013 06:23 PM

التيدا عربية ممتازة بس طبعاً بما إنك هاتجيب مستعمل يبقى تكشف فى التوكيل وتاخد تقرير بحالة العربية أولاً .

**sayco100** · 04-08-2013 07:04 PM

انا زيك كنت بفكر ولاااااااااازال رأيى ف التيدا
بس المشكلة عندى ان مبلغى فحدود ال100الف تقسيط
والتيدا فوق عن كدة
ومبحبش المستعمل ولا افضله نهااااااائى
وفالمبلغ دة زى اللى معاك بعد شهوووووووووووور
من البحث والمرواح رايح جاى عالمعارض واركب واشوف مع ناس صحابى
فأفضل عربية اقل من ال100الف
الكيا ((الكورى)) البيكانتو
ومع زعلى انها صغيرة لكن والله قعدت ورا كنا 3 وشالتنا تمام قدام القعدة زى الفل
وشياكة ومتانة خامات ومفيش اى شكوى فيها
مينى هاتشباك
ادفع فيها فلوسى
ولا اركب
صينى او هندى (اى تن) ولا مصرى ولا مغربى
وربنا يريحك ويدلك عالصح والخير ان شاءالله يارب
ولاتنسى تصلى استخارة

**jojojojo** · 04-08-2013 07:25 PM

التيدا ممتازه بس لو هتجيب مستعمل اكشف عليها في التوكيل واسعار قطع غيارها في رينج اسعار قطع غيار السيارات اللي في فئتها وبالتوفيق ان شاء الله

**amr011111** · 04-08-2013 11:10 PM

التيدا عربيه قيمه مقابل سعر
لان اول فئه سيدان فى التيدا زيرو ب 19500 لحد 120000 تقريبا على حسب المعرض
والفئه ديه فيها فرامل abs+ebd+ba
واتنين ايرباح وعربيه واسعه وخاماتها كويسه
وطبعا مفيش عربيه زيرو بالسعر ده فيها الاوبشن ديه
فلو تقدر تقسط الفرق البسيط ده يبقى كويس وساعتها هتبقى راكب زيرو بدل موضوع انك تكشف عليها ويا عالم هتبقى حالتها كويسه ولا
بس بالنسبه لموضوع انك مش بتحب تسمع اى اصوات
بعض ملاك التيدا بيقولوا ان فيه صوت بيطلع من التابلوه نتيجه انه كذا جزء

وبالتوفيق

**Omar_4ever** · 05-08-2013 02:37 AM

بالنسبة لقطع الغيار هي متوفرة في التوكيل وخارج التوكيل

واسعارها حاجات وحاجات

يعني المساعد الأمامي ب 850 جنيه
بوجيهات بلاتينيوم بتتغير كل 100 الف ل 525 جنيه
تيل فرامل امامي 525 جنيه بس معمر جدا
المقص ب 750 جنيه
الفانوس الأمامي ب 1200 جنيه، الخلفي 1700