طبعاً الحمد لله رب العالمين على نعمة العربيات عموماً اما تستعملها وتكون نعمة واما ان تستعملها وتصبح نقمة

كل عام والامة الاسلامية والعربية بخير بمناسبة عيد الفطر المبارك اعادة اللي علينا جميعاً بكل الخير والبركات اما بعد ,,

من اسبوعين عملت صيانة الـ10 الاف واليكم الاتي في الصيانات الدورية التي تمت كلها في توكيل كيا :

الصيانات الدورية

1- صيانة 1000 كيلو :
تغيير زيت موتور - تغيير فلتر هوا - كشف على 27 نقطة من السيارة (لازم تكون واقف علشان يكشف على العربية غير كده اذا قعدت ساكت بتشرب في المشاريب بتاعتهم يبقى متسألش بعد كده)
وده بيكون كشف على التيل والطنابير ومستوى الزيوت والسوا ا حتى سائل المساحات وكشف على كهربا العربية وكل الزراير اللي في العربية بيلعبوا فيها لو حاجات بايظة من نفسهم بيفكوها وانا بصراحة كنت واقف معاهم خلال الصيانة دي لانها كانت اول مره اتعامل مع توكيل كيا في مصر

تم تغيير الزيت الي زيت 10 الاف كيلو بدلاً من 5000 وده كان طلبي وكان برضه من نصايح الاخوه الكرام هنا وبرضه من نفسهم في التوكيل قالوا احنا بنفضل الـ10 الاف لكن براحتك

2- صيانة الـ10 الاف :
صيانة دورية عادية لان لم تحدث عندي اي مشاكل والجديد فيها ان عملوا Rotation للكاوتشات علشان نحافظ على نقشة الكاوتش لفتره طويلة ونصحوني بعمل Rotation كل 10 الاف كيلو طبعاً دي معلومة كلنا عارفينها انما انا بحب اسمعهم يعني كفاية بيقول ليك نصايح وانت هتعمل نفسك عليه ميكانيكي فطبعاً كنت بشكره على المعلومات

بعد كده نضف الفرامل كلها بالهوا ونضف الفلاتر قال لي صدقني مش عايزه تتغير انا هنضفها بس (ناس مشكوره جداً) وقال لي لو حسيت بأي ضعف في العربية تعالا ونغير الفلاتر لكن انا عن نفسي بقول خساره وننضفهم احسن

بعد كده قبل ما استلم العربية جه مهندس الاستقبال استلم المفتاح من مهندس الصيانة وركب العربية وقعد يجربها ويجرب الكهربا وكل شئ قبل ما استلمها وبعد ما نزل من العربية مضى في الورقة واداني الورقة قال لي اتفضل حضرتك حاسب في الخزنة

طبعاً قبل ما احاسب كعادتي جربت العربية بنفسي والنور وكل شئ وهم قالو لي اتفضل انت بعد كده واحنا هنطلعها لك من التوكيل برا في الشارع على ما انت تحاسب فعلاً حاسبت وطلعت لقيت العربية برا

طبعاً اديتهم حاجه كده الكل كان رافض وبشدة بعدين روحت للمهندس قلت له عايز ادي الواد ده حاجة لانه بصراحة انا شايفه من الازاز هلكان فيها بيمسح ورا المهندس وهو بيغير الزيت ووهو بيزود السوائل ... الخ كان شغال وراه بفوطه كده زي الساعة علشان متنزلش نقط على العربية قال لي هو حضرتك ممنوع ياخد بس خلاص ممكن تديله ورجعت فعلاً اديته 10 جنية فرح بيها جداً ولله الحمد

انطباعي عن التوكيل في الصيانات :

الخط الساخن : وقت رمضان هيكفرك ولو حد اتكرم ورد عليك كأنك هتهزر معاهم - التقييم للخط الساخن في رمضان 3\10 - بعد رمضان 8\10

مستوى مراكز الصيانة (هندسة السيارة والصيانات) : جيد جداً - 8\10 وممكن احيانا لما يكونوا فاضيين بيدوك حقك فممكن ياخد في الايام الفاضيه 9\10

مستوى مراكز الصيانة (خدمات واستقبال) : سئ - 4\10 يعني انا في المرتين اللي روحتهم ملقتش مهندس استقبال يقابلني غير لما ادخل اجيبه بأيدي يعني ايه ده ؟ انا داخل ورشه ولا مركز صيانة ؟ شئ غير مقبول

مستوى مراكز الصيانة (قاعة الانتظار) : جيد - 7\10 القاعة صغيره انما خدمة حلوه وناس قمة في الذوق جوه وواقف لك بالمشاريب تخلص ده يقول لك عندي كذا وكذا وكذا ياعم خلاص انا بطني عامت ميا

ملحوظة : العربية مش بتتغسل بعد الصيانة ودي حاجة ضايقتني هيمشي بس عليها فوطه (مش فوطه زفره لانهم بيكرهوها جداً في التوكيل) لأ فوطه بمنظف عندهم اسمه غريب كده كوري بيحطه في الفوطه وبيمشي على العربية اهو احسن من بلاش بس من جوه مش بيلمسها

الحمد لله على كل حال تقييم نهائي للتوكيل في رمضان 5\10 بعد رمضان 7.5\10 ويعتبر جيد في المجمل

تقرير عن السيارة (HighLine - ABS - EBD - 2AIRBAGS)

العربية حالياً عاملة معايا 11800 كيلو يعني تقريباً 12 الف كيلو واليكم الاتي :

المميزات :

التسارع : موتور ممتاز جداً وخصوصاً من الكيك داون والستيب ترونيك لو كنت بتحب الجري - صوته هادي ويكاد معدوم ومش هتعرف شغال ولا لأ
مع التكيف : هيقل التسارع شويه بس الفتيس بيعمل كيك داون لوحده والعربية بتجري بس طبعاً عدد لفات الموتور بتزيد

الفرامل ووسائل الامان : بسم الله مشاء الله استعملت الـABS مرتين ولله الحمد كساح حب يعكس اتجاهه من غير اشارات ولا اي حاجه وانا على الطريق السريع وراه ومنور له ومدي اشاره هعدي منه وكلاكسات ولكن البيه شارب لما عميان ولف عليا
طبعاً دوست على الفرامل كأني هخلعها لو قدرت برجليا الاتنين كنت نزلت لاول مره طبعاً اسمع صوت الـABS العالي ده حتى صاحبي كان معايا في العربية قال لي العربية باظت ؟ قلت له لأ ليه ؟ قال لي ياعم انزل شوف العربية دبدبت 5 مرات كأنها اتخبطط في حاجة قلت له لأ متخفش ده نظام في الفرامل

الـEBD بتحسه في الفرامل خصوصاً في ركبت عربية من غير ABS و EBD هتحس ان الفرامل في الريو عندك متوزعه صح خصوصاً لو هتحود ملف وانت بتفرمل بتحس بكده وانت قاعد في العربية

معاك ايموبليزر وانذار و 2AIRBAGS مع الـABS - EBD في الهاي لاين بس

خامات العربية نضيفه ولاحظنا الموضوع ده من اول يوم نزلت فيه العربية - مع تحفظي على الدفعة الجديد اللي اتغيرت فيها خامات (سقف العربية) تحس الموضوع ده لما تركب هاي لاين دفعة تاني (اللي معايا) وتحاول تفتح السقف اللي قبل فتحه السقف وتجرب في التانية هتلاقي الدفعه الجديدة خفيفه جداً عكس سقف الدفعة القديمة كان اتقل من كده بكتير

الثبات : العربية ثابته معايا لغاية 140 مكنتش خايف - اكتر من كده مجربتش بصراحة لاني مش من هواه الجري انا اجري ايوه لما اكون طالع من واحد طالع من كساح كده ممكن اسقط غيار علشان اطلع منه صاروخ - ملحوظة الريو فيها نظام التعليق الجديد بتاع كيا اللي استعملوه برضه في السيراتو دلوقتي بس شاسيه السيراتو غير شاسيه الريو

عزل السيارة : يا سلام اقفل الازاز بتاع العربية كلها ولو عديت جنب فرح مش هتسمعه

التكيف : طبعاً كعادة السيارات الكورية التكييف ممتاز فيها

الفتيس : بينقل نقلاته في ميعادها واستجابته للستيب ترونيك سريعة في النقل على فتيس اوتوماتيك - لكن ليه عيب واحد هنتكلم عليه تحت

الباور : بصراحة في الزحمة هتعرف قيمة الباور اللي معاك ده قمة في الليونه وبيتقفل الباور كهربائياً على السرعات العالية لوحده

امان الموتور + الفتيس : العربية مش هتشتغل الا لما تجيب الفتيس على الـP ودي حصلت معايا كذا مره واكتشفت اخيراً اني جايب الفتيس على D او R - حاجة تاني المفتاح لو مكنش نضيف العربية مش هتشتغل وده بسبب الايموبلايذر لكنه مزعج وهنتكلم عنه في العيوب

عيوب السياره :

المرايات كبيره اوي : الناس هتقول لي ميزه هقول لك في الزحمة هتعرف انا كل ما ادخل زحمة ايدي على زرار المرايات اقفلها والا كان زماني مغير المرايات 5 مرات لغاية دلوقتي الحمد لله ان المرايات بتضم كهرباء من الزرار جنبك

ابعاد السياره : انت ولا شايف وشك ولا عارف فين ضهرك والعربية من غير حساسات - نصيحة اول ما تجيب العربية جديد متدخلش في الزحمة وانزل كل يوم بليل الساعة 4 الفجر مثلاً وامشي في الشوارع وهي هادي وخد ملفات لغاية شويه شويه ما تتعود على الابعاد العقيمة دي

ارتفاع السياره : مش على طول العربية عالية - في مطبات جنونية بتحك فيها طبعاً - مع التحميل تقريباً هتحك في معظم المطبات اللي عاملاها الناس انما مطبات الدولة مش هتحك حتى ولو محمل معاك ناس

تنك البنزين قليل جداً : بصراحة تنك البنزين قليل كانوا يعملوه اكتر من كده شويه 43 لتر بالاحتياطي دي حاجة مستفزه خصوصاً مع البنزين المغشوش هتلاقي التنك ده ازازه بيبسي 2 لتر
لكن فول من بنزينه نضيفه 92 وتوكل على الله

الفتيس : لما تجيب الفتيس على R العربية هتاخد حوالي ثانية او نصف ثانية على ما تغير الغيار انا الموضوع ده مش مضايقني وده طبيعي انه بيغير التروس لكن عايزينه اسرع شويه يلا شويه تطويرات يعني

الايموبلايذر : يعني خير الامور الوسط - الايموبلايذر في العربية اذا كان المفتاح عليه تراب شويه العربية مش هتشتغل ولو دخلت المفتاح وفيه تراب جوه الكونتاكت اديك قاعد بقى تنضف في الكونتاكت وتنضف في المفتاح علشان العربية تشتغل ويا حظك لو حصل معاك كده على الطريق اديك واقف تنضف في الكونتاكت - حصلت معايا قبل كده وبمشي بالمنظف بتاع الالكترونيات ده معايا على طول

نور العربية العالي : هو فعلاً عالي - عالي اوي يعني انا نورته في مره (مش بنوره كتير بستعمل العادي) في مره نورته جاب راس الراجل اللي قدامي وده طبعاً عالي اوي كده - انا عادتاً بنور الشبوره على طول وبستعمل النور العادي في الطرق السريعة او للسيارات المقابله

حجم الرؤية من الازار الخلفي - حجم الرؤية قليل لعدة اسباب اول سبب العربية عالية من ورا عن جسم السيارة كله فمش هتشوف الارض دي اول حاجة - تاني حاجة الازازر واخد منحنى جامد جداً وده بيصعب الرؤية شويه - الموضوع مش مستفز ولكن في رؤية افضل من كده بكتير زي مثلاً الفورد فوكس الجديده مع عمي انا شايف الارض في المرايا اللي في الوسط افضل من عندي بكتير

نقشة الكاوتش : نوع الكاوتش حلو كومهو سولوس ممتاز مع الفرامل ومسكت الكاوتش في الارض حلوه وناعمه وملهاش صوت بس بصراحة النقشة كبيره وبتلم زلط كتير لازم انقى الزلط يا اما اطلع على الطريق اجري شويه في حته مفيهاش مطبات علشان تطير لوحدها وفي بيطير وفي مش بيطير وبطلعه بنفسي
ملحوظة : لما تطلع الزلط من الكاوتش متستعملش اله حاده استعمل اي حاجة ملهاش سن او حواف
ده كل شئ ظهر معايا في العربية لغاية دلوقتي
انا اشتريت العربية ايام مكانت بـ122 الف جنية دفعة تانية هاي لاين وكيل
الدفعة التانية كانت بحجز 3 شهور مع دفع 50 الف جنية والباقى بعد الاستيلام والاسبقية للدفع الكامل فتره الحجز وانا الحمد لله دفعت المبلغ بالكامل وقت الحجز

اي استفسار انا في الخدمة وباقى الاخوه بأذن الله