السلام عليكم
الحمد لله رب العالمين، ربنا وفقني اليوم واستلمت نيسان صني شكل قديم من احمد مرعي في اسكندرية استلام فوري، بعد ما خصلت من عربيتي القديمة الاوكتافيا لانها كانت خلاص فتحت بوقها وبتطلع في الروح
الاسعار كانت كالاتي
109 استلام بعد شهر صني شكل جديد
113 استلام فوري للالوان المتاحة الشكل القديم
113 استلام فوري لاي لون للشكل الجديد

طبعا بعد استخارة المولي عز وجل ثم استشارة اهل الخبرة في المنتدي هنا
http://www.nilemotors.net/Nile/371064-a.html

رسيت على نيسان الشكل القديم
العربيتين كانو قدامي النهاردا قبل ما اقرر وتفحصتهم بشكل كويس جدا
وزاد تمسكي بالشكل القديم بعد جولة الفحص للعربيتين

وجدت نفسي ميال للشكل القديم اكتر من عدة جهات

صني الجديدة محبتش شكلها خالص، حاسس ان تصميمها مع اعتذاري الشديد لملاكها (دي وجهة نظر شخصية) مستفز جدا
كبيرة وصاجها لاحظت انه اضعف من صاج القديمة
شكلها غير انسيابي تماما
عالية بطريقة مش حلوة عن الارض
حسيت في خطوطها وانحنائاتها انها معمولة شغل فض مجالس (عك) ، مش عربية محترمة من شركة محترمة
دة بخلاف كل الاراء من ملاك الصني الجديدة عن سوء الفرامل والتيلات والطنابير والكاوتش والتقفيل

اخدت العربية بعد مفاصلة مع احمد مرعي ب112 استلام فوري وكان لونها اسود
الصراحة الناس هناك تعاملهم محترم جدا وهروح لهم يوم الاثنين بعد العيد عشان ارخص

طلعت بالعربية وطبعا اول حاجة حسيتها سحب العربية
ما شاء الله ممتاز، يتفوق على الاوكتافيا اللي كانت معايا بمراحل
التكييف قوي جدا، برضو يتفوق على الاوكتافيا
الكرسي مريح نوعا ما
ابعاد العربية اتعودت عليها بسهولة
فرامل العربية متوسطة الجودة، الاوكتافا تتفوق عليها
التابلوة جيد نوعا ما وصوت السماعات مرضي بشكل متوسط
صوت الموتور جيد جدا والعزل ممتاز
اعيب على العربية نعومتها الشديدة، ودة بيسبب شعور طفيف بعد الاتزان، يمكن الامر شخصي علشان الاوكتافيا كانت تقيلة جدا وراسية بشكل مخيف على الارض
الكنبة اللي ورا متوسيطة الحجم لكن مرضية

كنتيجة عامة انا معجب بالعربية بنسبة مش قليلة وبقول الحمد لله واللهم اكفني شرها واعطني خيرها
وكتير قالولي مش براحة نفسية في الاول لانك كنت راكب اوكتافيا وبعديها ركبت صني
مش بنكر طبعا الكلام دة لكن الزيرو له زهوته برضو مع احترامي لكل الماركات

واخيرا مشكلة ضيقتني جدا
حاسس ان مكان الفرامل بعيد عن البزين، ودة بيسبب ان رجلي مش بتكون مرتاحة طول ما هي على الفرامل لانها بتكون مش مسنودة على المكان اللي جنب الفيتيس، بخلاف لما تكون على البنزين بتكون مرتاحة جدا

غير كدة الحمد لله العربية جميلة وانا مبسوط بيها وربنا يديمها عليا نعمة ويحفظها من كل شر يا رب

الف شكر لكل واحد قدملي النصحية على العربية الجميلة دى في المنتدي في الموضوع الاول
وانا مستعد لاي نصيحة لو يحب احد الافاضل انه يوجهالي بخصوص الصني