إزيكم يا أعضاء أحلى منتدى سيارات في الدنيا، أنا بقالي كتيرررررررر جدا بدخل كزائر وأقرا تعليقاتكم وأستفيد منكم وأتعلم من آرائكم، وفي الآخر قررت التسجيل وبقيت عضو جديد في المنتدى الرائع ده.

المهم مش هطول عليكم - قول طول - بعد 4 تجارب مريرة مع العربيات المستعملة بداية من 128 مرورا بالنوبيرا أوتوماتيك وحبة كده نيون كرايسلر ثم مسك الختام سيتروين سي 4، قررت أخيرا أجيب عربية زيرو بعد ما زهقت من المستعمل وبلاويه واللي بيجرى فيه، وناوى أجيبها قسط بإذن الله.

المهم بعد ما لفيت ودورت حسب الامكانيات المتاحة وبعد ما قريت كتير هنا على المنتدى توكلت على الله وقررت أجيب فيات لينيا لأنها الأفضل في فئتها السعرية.

بس أنا بسمع كلام سيء عن التوكيل وعن سعر إعادة البيع كسيارة أوروبية مش لاقية حظها في السوق المصري غير المنطقي.

المهم برضه ما زلت مصر على الفيات لينيا بإذن الله.

دلوقتي عايز أعرف إيه الإجراءات ومنين أجيبها، وسعرها كام بالظبط، وإيه الي ممكن تنصحوني بيه بخصوصها. ومستنى أعرف رأيكم علشان أنضم ليكم أخيرا كعضو فاعل في أسرة المنتدى بإذن الله.