الموضوع: عايزة حد فاهم يساعدني لو سمحتوا

نصيحة مني أبعدي عن العربية دي,
ملعوب فيها لعب هيقرفك بعدين كا بنت في الصيانة
مش هينفع تجري علي ميكانيكة وصنايعية بعربية متسقط لها موتور مش بتاعها وممكن الورق يكون فيه لعب وحصلت مع ناس أعرفهم قبل كدا, ومتعرفيش أي اللي حصل للعربية عشان يتسقط لها موتور,

واللعب اللي كان فيها عمتاً هيقرفك في السواقة وهتلطع لك مشاكل في وقت قليل جدا ومش هتلحقي تستمتعي بالعربية, لأن واضح أنها كانت عربية لعب وروشنة, مش عربية بيت وحالتها نضيفه..!

أولاً مش منطقي انو يغير ماتور عشان كانت بتسخن منه, اللي بتسخن منه العربية بيراجع علي دورة التبريد من مياة تبريد وترموستات الكوعة ومروحة الرادياتير وطلمبة المياة بس مش بيغير ماتور.
البي أم اللي تغير ماتور معناها أنها كانت عربية لعب وكتر تفحيط عال أسفلت, وبالمناسبة كتر اللعب والتفحيط دا اللي بيسخن الماتور ويهلكه وممكن يكون سبب في تغير الماتور.

اللي يخلي لمبة ال abs تنور علي طول في الغالب بيكون بسبب حادثة حصلت للعربية وبقي فيه مشكلة في مكنة ال abs.
أو من كتر اللغب بالعربية وأنو يدوس بنزين وفرامل في نفس الوقت, عشان يخلي الكاوتش الخلفي يلف عال فاضي لحد كا يطلع دخان وهوا مثبت الكاوتش الأمامي عال أرض.


اخر حاجتين , انا مفهمتش قصدك بمضخم الصوت اللي مركبة هل هيا عدة كاسيت ولا شكمان ولا فلتر أسبورت صوته عالي. ؟
وحتة إن الماتور مش مثبوت علي الرخصة دي, حاجة لوحدها تخليكي تصرفي نظر عن العربية إلا لو غاوي. وجع قلب ومشاكل.
لما تيجي تجددي هيقرفوكي في المرور. ولو الورق طلع فيه غلطة او مضروب هتشربي الموتور وتجيبي ماتور جديد عشان ترخصي وتخشي ف موال شراء و تسقيط ماتور جديد تاني.!

انتي المفروض مش حمل البهدلة دي, وممكن يكون تركيب الماتور اضر بمكنة ال abs او باسلاك ف الضفيرة لو اللي كان بيسقط الماتور ميكانيكي اي كلام.


الصح انك متشتريش العربية غير لما يكون الماتور اللي فيها هوا اللي مثبوت علي الرخصة, عشان دلوقتي غير قانوني انك تشتري وتمشي بالعربية وهيا كدا حتي لو اخدتي ورقة واتعملك تنازل. لازم يتثبت عال رخصة.
ولو جيتي في التجديد تثبتيه وطلع ورق مضروب يبقي الماتور دا هيتركن وتدوري علي ماتور مستعمل استيراد عشان تسقطية.

خلاص لو هيثبت الماتور علي الرخصة, يبقي تمام,
وتكوني أتاكدتي ساعتها من أن ورق الماتور سليم, وأنك تقدري تمشي بيها قانوني ومتجيش تلبسي الماتور بعد كدا لما تيجي تجددي الترخيص لو كان ورق الماتور مش سليم.

ولو صلح مكنة ال abs كمان يبقي كتر خيرة.

لكن قبل ما يعمل الحاجتين دول, نصيحة أصرفي نظر عن العربية بدل ما تتعبك لو مش غاوية وجع قلب,,

ولو متشبسة بموديل العربية دا أوي كدا, دوري علي كونتاكت كارز علي حاجة تكون حالتها نضيفة, عاملة كيلو متر مش علي وتكون مش مسقطة ماتور,, أكيد هتبقي أحسن من العربية دي.