السلام عليكم و رحمة الله
الموضوع ده ترددت كثرا فى كتابته - و ترددت اكتر فى اختيار القسم المناسب ليه
اسمحولى احكي ليكم حكايه صغيره
الناهرده الصبح روحت رابعه العدويه اشوف بقايا معركة فض الاعتصام
مش حتكلم عن تفاصيل اللى شوفته من اثار للطلقات و لا الحرائق
لكن هالنى منظرين - هو العدد الكبير من عربيات الربع نقل اللى راحت تلم "فى العلن" بقايا المعركه الى درجة انهم كانو بيشيلو السور الحديدي الخاص بالحديقه اللى فاصله فى نص الشارع اللى كانت سليمه و لكن مخلوعه من مكانها امام اعين الشرطه و الجيش و بدون ادنى اعتراض منهم !!!
الحاجه الثانيه اللى خلتنى فعلا اتألم نفسيا : منظر مسجد رابعه العدويه و هو محترق تماما
و جدت تجمع عن السور المحترق للمسجد كان مركز التجمع ده واحد راجل بيهلل و بيتكلم بعصبيه و حمقه (على غرار الشيخ محمود شعبان) و بيقول "كتاب الله و يخرج بقايا مصحف محروق و ما احترموش حرمة المساجد (يقصد على الداخليه ) ... الخ
فى المقابل الست كانت بترد عليه و تقوله : ده (و تشاور على مسجد رابعه العدويه) عندهم اشد حرمه من الكعبه و هما بيحجو حوليه و شويه كانو حيعملو تمثال عجوهه لمرسى و يعبدوهه زى ماكان اجدادهم بيعبدو هبل ... الخ
رغم انى عارف ان الاوقات بتاعت دلوقتى ماحدش فيها يتناقش مع اى حد مختلف معاهه فى التفكير - الا انى اتغظت اوى من كلام الست و اسلوب الدفاع الساذج من الراجل
وكمان اطمنت لما لاقيت الراجل بيقول وجهة النظر المختلفه و ماحصلوش حاجه
فقررت اتكلم : فقولتلها هو اللى بتقوليه ده مبرر لحرق الجامع ؟؟ - اول لما قولت كده لاقيت كل المجموعه بصتلى
قولتلها مين اللى حرق الجامع : قالتلى الاخوان - قولتلها ماشى بس فيه فيديو متصور باليل و باين الجامع فيه والع و الدنيا مضلمه ليه ما اتطفاش
انا ماخلصتش كلامى و الاقى كل اللى حوليا هاجمونى فى نفس واحد !!!!!
و كل اللى فى المجموعه (بدون استثناء) ابتدو يهاجمونى مع بعض الزق باليد اللى هو مقدمة الضرب
اللى فاكره واحد ان واحد ورايا لاقيته بيخبطنى و يقولى : ومين اللى حرق الكنيسه اللى فى الحته الفولانيه و ابص قدامى الاقى الست بتقولى "يا اخوانى يا كافر" وواحد تانى يقولى "اطلع بره " و التالى يقول "احنا نموته الارهابى ده"
ستر ربنا لاقيت واحد ابن حلال شدنى من وسطهم و قالهم انا حتعامل معاه و خدنى و "جرى " بيا يبعدنى عنهم و وهو بيبعدنى عنهم كان فيه واد بلطجى جرى ورايا و عاوز يضربنى لولا الشخص " اللى انقذنى" خلاه يبعد عنى - و لما بعدنا قالى بالحرف ( انا معاك بس ماينفعشى تتكلم مع حد دلوقتى)
الفيلم ده كله استغرق 7 ثوانى من اول اللحظه اللى قررت افتح فيها بقى و لغايه لما الراجل هربنى
اسألتى بقى
احنا ليه بقينا كده - كل واحد مش قادر يسمع وجهة نظر مختلفه عنه
ليه التعصب اصلا المفروض اصلا ان اختلافنا سياسى لأنى لا انا و لا انتا قتلنا حد
يبقى ليه تعدى عليا لمجرد انى بناقشك - طيب ماهو ده نظام امن الدوله و مبارك (كل واحد فينا عنده مبارك صغير جواهه)
ليه العنف هو الحل - مش بتكلم فى اخوان و لا زفت - ثقافة العنف منتشره فى اى حاجه دلوقتى
انا اتذكر ان فى 18 يوم كانت بتعرض وجهات نظر مختلفه و مناقشات حاده بين الناس ,ممكن فى المناقشات الصوت يعلى و يبقى زعيق قصاد زعيق , لكن عمرى ماشفت اتنين مسكو فى بعض فى الميدان بسبب مناقشه و الكلام ده منطبق على كل مظاهرات التحرير اللى انا حضرتها , اول مره فعلا اشوف اتفاق العدد ده على الايذاء او الخروج عن السلميه بالمنظر ده
السؤال الاخير - هما ليه كانو سايبين اللى بيزعق و بيتحمق ده يقول اللى هو عاوزه من غير ماحد يعتدى عليه بينما انا لما اتكلمت بهدوء و عقلانيه كانو حياكلونى من قبل ما اخلص اول جمله ليا - هو ده النظام يعنى , البقاء للاقوى
وملحوظه صغيره : التجمع ده معظمه شخصيات نضيفه و كان فيه للاسف شخصيات كبيره فى السن وواضح عليهم المستوى الاجتماعى الراقى
- انا اجبرت انى اذكر قناعاتى لأن ماكنشى ينفع القصه تتفهم من غيرها
ياريت نتكلم بعيد عن السياسه و نتناقش فى الموضوع ده من الناحيه الاجتماعيه الانسانيه