السلام عليكم يا شباب
اكتب لكم بعد غيبة طويلة نظرا لظروف لطيفة
اعذروني لاني هبقي هجومي شوية في الموضوع دا
__________________________________________________ _____
انا : ازيك يا ............
الكائن اللزج : الحمدلله عامل اية يا عم بيدو
انا : تمام والله والدنيا زي الفل
انا : بقول اية يا عم الحج - اية رائيك في البيكس المتعمرة
الكائن اللزج : قصدك المكن الحالل يعني
انا : هتفرق يعني ؟
الكائن اللزج : اوعييييييي هتلبس يا معلم
انا : طيب اقنعني لية المكن الحالل وحش
الطائر المجنح : يابا مفيش صنيعي بيرجع الحاجة زي الاول
انا : يعني المشكلة مشكلة صنايعية بس؟
التنين الارجواني : ايوة يعم والخامات يسطي كمان بص هاتلك مكنة افراج وريح دماغك
انا : يعني انت بردة عاوز تقنعني ان الافراج احلي وانضف ومش حالل؟
برنس الليل : ايوة يا عم الحج - دول ناس برة ناس نضاف كدة وانفين يركب المكنة شهر ويقوم رافعها
انا : طيب نفترض انو جابها سنة 1988 وركبها شهرين ورفعها اكيد المدة دي الموتور بيبوظ من جوة
اينشتين زمانة : يعم انت شكلك ملكش في الميكانيكا وهتغلبنا معاك دول بيملو الموتور علي اخرة من جوة زيت حوالي 26 لتر وبيكون زيت خروع كمان
انا : يااه معلومة جديدة دي .... يابن ال الاية يا لعيب .. سيبك بس وقولي المكن الحالل هنا وحش لية ولا انت سمعت حاجة وعمال تردد فيها علي اساس انك بتفهم في الموتوسيكلات
البتنجانة : يعم انت هتوجع دماغي لية .. المصري فلحوس مبيعرفش يعمل الحاجة مفيش خراط ايدة تتلف في حرير وبيصب سبايك كويس
انا : امم حسبي الله ونعم الكويل :01964E~163:
انا : +18 .................................................. .................................................. ..............
هتقولي مكن حالل
هتقولي المكن الحالل لية صوت معين غير التاني
هتقولي السيليكون بتاع الفابريكة
هتقولي جوانات
هتقولي هتقولي
هقولك ارجوك مترددش
انت انسان ربنا ميزك بالعقل
__________________________________________________ _
موضوعي مثير للجدل
so what
لو المكن الحالل كان معيوب كانت شركات الموتوسيكلات نزلت المواتير مصبوب حتة واحد مش اجزاء عشان يتفكك
هتقولي يا عم الفلحوس طيب لية المكن الحالل واخد سمعة كدة
هقولك عشان احنا كمصريين مش بنصرف علي الحاجة
عاوز تعرف المكن الحالل وحش لية هنا وحلو في بلاد برة
__________________________________________________ _______
اولا ناخد الموتور واحدة واحدة من فوق
1
الشنبر والشمايز و جوانات وش السليندر
برة لو الشميز وسع ( المكان اللي البستم بيطلع وينزل فية ) بيترمي ويتجاب غيرة
في مصر بنجيب حاجة اقل قطر شوية وبتتحط جوة الشميز عشان اسمنا ضيقناه
طيب بتبقي مصنوعة من اية ؟ من حديد زهر - الشميز نفسة معمول من اية ؟ من الومنيوم حضرتك
طيب اية الفرق
خاصية التمدد والانكماش لكل مادة يا فندم
ميجيش الشميز يقفش علي البستم وتقولي اصل الخراط وحش
طيب لية بنلجاء لكدة محنا نغير علي طول
تكلفة الشميز = 100 جنية مصري لكل بستم = 400 جنية مصري اجمالي القيمة
تكلفة بلوك بساتم ستاندرد = 1500 جنية مصري فقط لا غير
البستم
لنفس الشي المذكور للشميز البستم بيتخرط
يعني حسب الخراط يا يجيب بستم في نفس الحجة ويبتدي ياكل فيه عشان يخلية نفس حجم وشك البستم المطلوب ( ودا المتداول )
او يجيب مادة مسمطة ويبتدي يشكلها ( نادرة لو لقيتها في مصر )
نفس حكاية خواص كل معدن
طيب لية بنعمل كدة ؟
تكلفة خراطة البستم = 70 جنية مصري * 4 = 280 جنية مصري للاربع بساتم
تكلفة بستم استاندرد = 180 جنية لكل بستم *4 = 720 جنية مصري للاربع بساتم
ومش هتكلم عن الجوانت
_______________________________________________
نتكلم عن السبايك والكرنك شوية ؟
السبايك للمواتير ذات الاداء العالي ( نقصد بيها ذات الاجزاء الصغيرة و عدد اللفات العالي ) بيبقي اسمها سبيكة رباعية
يعني اية ؟ يعني بتتصنع من اربع مواد فوق بعض
اول طبقي اللي هي اسفل السبيكة صلب كربوني ( عشان تفاعلة مع الحرارة ضئيل ولا يتمدد بسهولة )
طبقة من النحاس
طبقة من مادة عازلة
طبقة من الاومنيوم ( ودي الطبقة اللي بتتلامس مع الكرنك
سواء كانت بقي سبيكة صيني سبيكة يباني مدام مصنعة من المواد دي يبقي من السبايك الموصي بها
طيب السبايك المصري ؟
السبيكة المصري عارف بتتعمل ازاي؟
الخراط بيروح يجيب طقم سبايك بتاع عربية وبالذات بتاعت ........* (عربية معينة مش هقول عليها ) ويفضل يشكل فيها لحد متبقي نفس شكل السبيكة المطلوبة
انت عارف خواص السبيكة دي اية ؟
اول طبقة حديد
تاني طبقة المونيوم
طيب لو اعتبرنا الخواص كانها لم تكن
هل هتحط سبيكة مصممة تستحمل 7 تلاف ار بي ام (بالريد زون ) في موتور الار بي ام بتاعة 14 الف ار بي ام وفي مواتير 16 الف ومواتير 22 الف
طيب لو سبنا حكاية الاستحمال دي ؟ هي الشركات غاوية تكلف نفسها متعمل كل حاجة نوع واخد من المعدن وخلاص
تخيل بقي يجتمع المصيبتان تصميم السبيكة لاستحمال قدر معين من الحركة وكمان عدم مطابقتها لمواصافات التصنيع
سبب تاني من اسباب خراطة السبايك رداءة السبيكة مما ادي الي تاكل اجزاء الكرنك الملامسة للسبيكة
طيب والحل ؟ كرنك جديد
تكلفة السبايك المصري (المخروطة ) = 620 جنية مصري
تكلفة السبايك الاستنادرد = 2400 جنية مصري فقط لا غير
تكلفة كرنك جديد= 1700 جنية مصري فقط لا غير
-------------------------------------------------------------------------------
خلصنا من الكلام اللي ولا بيودي ولا بيجيب دا
طيب وحكاية الصوت بتاع نغمة الموتور الحالل غير نغمة الموتور التانية !!
مفيش حاجة اسمها كدة
في حاجة اسمها ان كل مسمار لية عزم ميعن يتربط بية جوة الموتور بل ان كل مسمار في البيك لازم يتربط بعزم معين (لية ؟ عشان ميفكش من جراء الشغل والحركة المتكررة )
الموتور عامل زي اوتار الجيتار كل وتر بيبقي مشدود شدة معينة وبيدي نغمة معينة
لما المتور يتربط بالعزم المطلوب لكل مسمار هيديك نغمة معينة (عشان كدة المكن المسمي بافراج بيبقي لية نغمة لطيفة لانه البروجيكت عندهم بيتعمل صح وبادوات صح علي عكس هنا اربط لحد متسمع طقة اصل دي طقة الفبريكة يا بورنس )
تكلفة مفتاح سيستيم عزم 1\2 + 1\4 + 1\8 = 480 لكل مفتاح دا غير طبعا اللقم يبقي تكلفة اجمالي حوالي 2000 جنية للطقم كامل طيب لية لية المفاتيح دي كلها ببساطة لان المفاتح النص ميقدرش يربط مثلا المسمار ال 8 وهكذا
-------------------------------------------------------------------------------
خلصنا من النغمة نخش علي السيليكون والجوانات ؟
طقم الجوانات النضيف بحوالي 300 جنية طقم الجوان المصري ب 35 جنية
طيب السيليكون ببساطة لان السيليكون انواع والوان واشكال وخواص وتحمل درجات حرارة والخ الخ
طيب لية البيكس الافراج مش باين علية كل دا
عاوز تعرف لية ؟
لان في الدول المتقدمة في اداة اسمها gasket scraper
نعم عزيزي المصري انها كالسحر
انها خيالية
انها اداة تزيل اثار السيليكون والجوانات
نعم عزيزي المصري انها سحر
---------------------------------------------------------------------------
يعم انت داخل فينا شمال لية
هات ما يثبت كلامك
من عيني يعم الحج
http://nileup.com/up/uploads/nilemotors_13766176031.jpg http://nileup.com/up/uploads/nilemotors_13766178161.jpg http://nileup.com/up/uploads/nilemotors_13766180461.jpg
عرفت لية المصري فاشل في عمراتة ؟ مش عشان قلة خبرة
عشان قله علم
عشان الاسترخاص
فبعد اذنكم بدل ما نقعد نتجادل علي شي والعالم يتفرج ويضحك علينا ( ودي حقيقة زي محنا بنخش علي منتديات اجنبية عشان العلم بالشي مش من المستحيل انك تلاقي اجانب بتتفرج علي منتدياتنا )
جملة عجبتني يعتبر في كل السيرفس اللي قريبتة من اول هوندا لسوزي للكواساكي
هتلاقوها في سيكشن الموتور والترانسميشن
بما يفيد
انك لما تيجي تعمل صيانة داخلية للموتور يستحسن انك تعمل صيانة كاملة للموتور من الداخل لانك بكدة بترجع الموتور للمواصفات اللي الموتور الجديد بيبقي بيها فبالتالي بيبقي خالي من المشاكل قدر لا باس به من الوقت
:floating::floating::floating::floating::floating: :floating::floating::floating: