السلام عليكم ورحمة الله
انا واحد من عشاق سكودا من زمان وتدرجت في امتلاكها بداية من الفليشيا في97 ثم ايه 4 1800 سي سي 20 صباب في 2004 ثم ايه 4 تاني زيرو اوتو 2008 وكنت مستني ال ايه 7 من زمان وناوي اشتريها لحد ما عرفت موضوع الفتيس ال دي اس جي وبصراحة خفت وماحبتش اجازف بان اكون انا حقل التجارب بتاع الشركة وبناء عليه استخرت الله وقررت اشتري الفانتازيا 1600 ام بي آي والحمد لله عربية تحفة وجباااارة وتحسسني اني راكب دبابة وهنا نيجي للمشكلة الكبيرة ...
وفي اليوم اللى استلمت فيه العربية من المعرض وبعد ما ركبتها وحصنتها بما تيسر من اذكار وادعية وأيات وبسم الله بقى عشان اوديها الجراج وعينك ما تشوف الا النور لقيت نفسي عمال افعص ف الدواسة يا باشوات والعربية مش بتتحرك !! افتكرت ان العربية مش دايرة قعدت ابص عالعدادات اتأكدت انها دايرة قلت ازود تاني يمكن لسه شرقانة وللا بتسخن ولا اي حاجة حسيت ان رجلي سحبت دواسة الاكسيلاتير حوالى 2 او تلاتة قول 4 سنتيمتر تجاه ارضية العربية وفين لما لقيت عداد ال ار بي ام ابتدى يعلى لما قبل ال 1000 لفة بشوية !!!
بصراحة اتصدمت ايه داااا
مشيت بيها قلت يمكن لما تتلين شوية الموضوع يتحسن والدواسة تفك وتلين مع الاستعمال ... ومن ساعتها لحد النهاردة ابدااا العربية طلعتها من الثبات قااااتلة وكل مرة اقف ف اشارة او تقاطع احس بالمعاناة عشان اطلع بالعربية لدرجة اني باحس كأني انا اللى باجر العربية مش الموتور اللى بيحركها ؟؟

وبعد ما كنت متعود عال ايه فور وسحبها وكنت (زمااان) انا اللى باقعد ادي كلاكسات للى قدامي عشان الاشارة فتحت حسيت اني وقعت ف شر اعمالى ودلوقت كل الناس هي اللى بتديني كلاكسات لما الاشارة تفتح وباحس اني بانتع ف العربية عشان تتحرك مش تجري لا مجرد تتحرك من مكانها ..

هو موضوع الجري مش مشكلة لانها بعد ما توصل 30 او 40 بتجري زي الريح مع ثبات وكلبشة ف الارض مالهمش حل بس المشكلة كلها ف الطلعة الاولى ..

انا قريت كذا موضوع ف المنتدى الجميل عن تسارع الفانتازيا بس حسيت ان الموضوع مش موضوع ان الموتور ضعيف عالعربية هو صحيح 8 صباب بس عربيتي ال ايه 4 كانت 8 صباب برضو ومع ذلك كانت بتجري كويس جدا .. بالاضافة لكدا ان مشكلة الدواسة اي حد بيحس بيها والعربية واقفة والفتيس على وضع الركن كمان ولما تيجي تزود بنزين عداد ال آر بي أم مش بيتحرك غير بعد ما الدواسة تنزل تجاه الارض ييجي ربع المسافة كدا

وهنا نيجي للسؤال المهم الموجه لاساتذة الاوكتافيا والملاك القدامى واذا كان في حد فني او مهندس يفيدنا يبقى يا ريت عاوز اعرف مافيش حل او طريقة نعالج بيها موضوع دواسة الاكسيلاتير بحيث نزود حساسيتها للضغط بحيث تدي استجابة اسرع للسيارة ؟؟؟ هل مثلا الخراطيم والمواسير الخالى بيمر بيها البنزين صغيرة مثلا بحيث ان البنزين بياخد وقت لحد ما يوصل من التنك للموتور ؟؟؟ وهل يمكن تركيب مواسير وخراطيم اوسع تسرع من تدفق البنزين تجاه الموتور ؟؟؟

موضوع ان الموتور ضعيف دا مش دقيق لان العربية بتجري كويس جدا بعد السرعة التالتة ، بس طبعا نسبة ال power to weight ratio ضعيفة لان وزن السيارة كبيبر والهورس باور واطي وان كانت ليست الاسواء بين الماركات الاوروبية
السيارات السابقة اللى ركبتها كانت جامدة جدا في السحب والجري وخصووصا ال ايه 4 ال 1800 كانت فعلا نعش طائر زي ما كانوا بيقولو عال504 زمان بالاضافة لقوة هيكل ال ايه4 المعروفة ولما نقلت لل1600 حسيت بفرق رهيب مع ان سحبها كويس جدا بس كنت باقارنها بال 1800 باحس انها سلاحفاة اما دلوقت انا فعلا عندي مشكلة جامدة مع موضوع بطء الطلعة من الثبات يا ريت لو حد عرف يحل المشكلة دي يفيدني لاني وصلت لمرحلة اني بافكر ابيعها وارجع تاني للايه 4 خصوصا ان اللى اشترتها مني واحدة من العيلة ومش حتمانع لو حبيت ارجعها تاني خصوصا ان موضوع الكماليات دا مش فارق معايا كتير وكل اللى يهمني التكييف وبالمناسبة تكييف الايه 4 ولا اروع بصراحة ولا يقارن بتكييف الفاانتازيا

انا اسف جدا عالاطالة بس انا حبيت افضفض واوضح سبب المشكلة بالتفصيل يمكن حد يقدر يساعد في حلها ولكم جزيل الشكر على صبركم وسعة صدركم