حد نفسيته مدمره الايام دى ذىى ولا انا حاله فريده

السلام عليكم

بقالى كام يوم حالتى النفسيه وحشه جدا من كام يوم سمعت ان جارى عربيته اتسرقت وانهاردا اخو زميلى فى الشغل اخده منه عربيه بالاكراه وبقيت خايف على كل حاجه ومن كل حاجه خايف على عربيتى خايف على اهلى خايف على ابنى ومراتى حاسس ان كل يوم هنزل فيه مش هلاقى العربيه حاسس ان كل يوم بخرج فيه انى ممكن مركعش البيت

هل الوضع دا حد غيرى بيمر بيه وخاصه الايام دى


الموضوع ملوش اى علاقه بالسياسه ارجو من الناس كفايه حديث عن السياسه فى الموضوع بس اكيد جزء كبير من الحاله النفسيه بسس البلد وال بيحصل ثواء مع او ضد

اقسم بالله العظيم انا شبه يوميا بحلم ان العربية اتسرقت
من كتر ما الموضوع ده مقلق الواحد

ههههههههههه انا لسا اول امبارح حلمت ان العربية اتسرقت وكانت مولعة مش عارف ازاي اتنين مع بعض الوضع مش مطمئن

مش لوحدك والله
ده كلنا نفسيتنا متدمره
حسبى الله ونعم الوكيل فى اللى كان السبب

يا استاذ احمد كل الناس عايشة فقلق
لكن لازم تنزل وتتوكل علي الله علشان الحياة تمشي
حضرتك انسان طيب وخلوق جدا ومن ساعة المقابلة وانا مش ناسي زوقك
ان شاء الله ربنا هيكرمك بالخير ويحفظلك كل انسان او شئ غالي عليك
تحياتي ..

مش انت لوحدك حتى المغترب حاسس بالموضوع ده جدا انا جالي اكتئاب من اللي بيحصل في مصر وخايف جدا على ابويا وامي واخواتي جد وربنا يسترها عليهم وعلى الناس كلها يارب

كلنا في حالة اكتئاب
بس اعتقد اننا لازم نحاول نمارس حياتنا الطبيعية وننزل شغلنا ودة هو الطريق لعودة الاستقرار وطرد هذا الشعور

انا حاسس حيجيلي اكتئاب من الوضع العام للبلد . دا غير اني بشتغل اسبوع و اسبوع بكون طول اسبوع الشغل مرعوب علي اهلي . الواحد معدش مطمن خالص

والله الواحد حالته ذي البلد ذي السفت انا مثلا حلمت ان العربيه الانزار عمال صوته كل شويه يعلي وفجئه العربيه عملت صوت اقتحام ام نازل لقيت حرامي عايز يفتح العربيه وفعلا فتحها قام جاري جيه وضربه وحاول يسرقها هو ههههههههههههههههههههههههه ههههه حلم غريب جدا

ربنا يعدى الايام دى على خير
ان شاء الله غمه وربنا يفرجها من عنده

ابنى الصغير لم يتجاوز 4 سنوات لاقيته من نفسه بيقولى
يابابا لو العربية ولعت هتجيب واحده جديده ولا هتعمل ايه؟

تصدقوا وتامنوو بايه. ... انا الي مكنيتش الدحكة بتفارق بوقي حتى في عز المصايب بدحك بدحك على كل شيء ... لكن دلوقتي بقيت مبووز والبوز ضارب شبرين ... ده انا حتى بقيت اخاف اهزر مع حد زي زمان حتى لو القافية حكمت بخاف بقول يواد بلاش الناس بقيت روحها في مناخيرها وعطاسة وحدة. حد يتزربن عليك فبلاش منوا احسن ... اقسملكم بالله انا المفروض متوسط مشاركاتي اليومية ١٤ او ١٣ مشاركة دلوقتي بكتب مشاركة وبعد ما بكتبها بعمل ديليت وبخاف .

حتى وانا في الشارع ببقى خايف من كل شيء ... حتى وانا على رجلي بخاف تطلع عربية فوق الرصيف تطيرني من عليه ... الامن انعدم خلاص ... والبلد كل مادا في الاسوء. ... الناس مقطعه بعض علشان الكرسي والكل بيغلط التاني وبيشمت حتى في موت. الطرف التاني. ... الناس بتعامل بعض على انهم خوونة لمجرد الاختلاف في الراي ... سيبك من ده كلو احساسك مرير ان واحد ينيمك في بيتكم. من سبعه المغرب ده شعور فظيع اليوم كلو بيروح على كده وتحس نفسك متكتف ومقيد ... والي يفتشك والي يقلك اذا كنت ماشي بعد الساعه ٧ المغرب يقلولك نام في العربية لحد الصبح وحاجة غريبة عجيبة يا راجل .

بس سيبك من ده كلو ... التلفزيون وجميع البرامج الي فيه. تجيب الاكتئاب اكتر ... ياتلاقي الطرف والطرف الاخر ونازلين في بعض هتتك بتتك وعمالين يشتموا في بعض على الهوى ويخونوا في بعض على الهوى .
يا تلاقي قناة. طرف واحد منحازة ونازلة شتيمة في فصيل طول الحلقة شتيمه وردددح ... يعني ياريت في معلومة جديدة. الا كلو كزب ونفاق وشتيمة. وكل ده يا بوحميد ومش عاوز تكتأب. ... أحمد ربك يا أحمد إنك لسه عايش ومنفجرتيش لغايت دلوقتي ... انتا من الاحرااار يا علي :) ... وتحياتيى

اقتباس:

---

المشاركة الأصلية كتبت بواسطة احمد المصرى

السلام عليكم

بقالى كام يوم حالتى النفسيه وحشه جدا من كام يوم سمعت ان جارى عربيته اتسرقت وانهاردا اخو زميلى فى الشغل اخده منه عربيه بالاكراه وبقيت خايف على كل حاجه ومن كل حاجه خايف على عربيتى خايف على اهلى خايف على ابنى ومراتى حاسس ان كل يوم هنزل فيه مش هلاقى العربيه حاسس ان كل يوم بخرج فيه انى ممكن مركعش البيت

هل الوضع دا حد غيرى بيمر بيه وخاصه الايام دى


الموضوع ملوش اى علاقه بالسياسه ارجو من الناس كفايه حديث عن السياسه فى الموضوع بس اكيد جزء كبير من الحاله النفسيه بسس البلد وال بيحصل ثواء مع او ضد

---

لا تقلق ... حالتك طبيعيه :-) .... كلنا هذا الرجل .

كلنا كدا بس ايه صحيح الاحلام ان العربيات بتتسرق ده انا بقالى يومين كدا برده بحلم ان العربية بتتسرق بتتخبط حاجة كدا

انا برضه بحلم بنفس الحلم الكئيب ده ...الواحد اكتشف بعد ما جاب العربية ان جابها عشان يزود بيها قلقه وخوفه مش عشان تبقي مصدر لراحته وخدمته !!!!

مش لوحدك انا كمان ققان و زعلان و مكتئب جدا و نفسي الوضع يبقى أحسن من كده بدل ما إحنا عايشين مش مرتاحين

كلنا كندنا قلق و حاله حزن و اكتئاب غريبه

ربنا يعدى الايام دى على خير

تذكروا ارهاب التسعينات

ربنا يسترها بجد يا شباب الوضع مش مريح خالص كل يوم مشاكل لدرجه ان الواحد بيهرب من نشرات الاخبار والتلفزيون والناس مش بتتكلم غير فى السياسه والجيش والبلد والاخوان

على رأي دكتور يحي الرخاوي أما قال "اللي مش مكتئب اليومين دول يبقى انسان معندوش دم"

بس سحابة وهتعدي ...

كلنا هذا الشخص

ألزموا الأستغفار وأذكركم وأذكر نفسي بحديث الرسول صلي الله علية وسلم

رُوي عن ابن عباس رضي الله عنهما أنه قال : قال رسول الله صلى الله عليه وآله وسلم :
(من لَزِم الاستغفار جعل اللهُ له من كلّ ضيقٍ مخرجاً ، ومن كلّ همّ فرجاً ، ورزقه من حيث لا يحتسب)

محدش يقلق من حاجة واتوكلو على الله وكل ما تقلقو افتكرو كويس ( قل لن يصيبنا الا ما كتب الله لنا )
يعنى لو لا قدر الله عربيتك اتسرقت ده نصيبها واحمد الله انك بخير واهلك بخير وابنك ومراتك بخير
وفى الاول وفى الاخر دى علامات قيامة يعنى الواحد ما يفكرش فى الدنيا تانى ويفكر بقى فى اخرته والقبر والحساب
وربنا يسترها علينا