خبر في الجول رجال أعمال أتراك حضروا لمصر اليوم بيقولوا احنا مالناش دعوة باردوغان
يعنى المقاطعة عملت معاهم شغل جامد وهاتخرب بيوتهم في المسلسلات والعربيات والسياحة
ايه رايكم
عرض للطباعة
الشعب المصري اقرع و نزهي يعني لما ٨٠ ٪ من السلع اللي في السوق حاليا استيراد يبقى احنا كدولة بصنع ايه و لا مؤاخذة. شوية سيراميك على سجاد مع الكثير من الشيبسي. لما نبقى دولة محترمة و عندنا انتاج و اقتصاد قوي و شعب بيحترم النظام و القانون نبقى نفرض شروطنا على العالم و نقاطع اللي مايعجبناش انما الاعلام اللي ممشي الناس وراه بدون فهم ده عايز يتولع فيه هو و اللي ممولينه علشان غسل مخ الناس و توجيههم اننا دولة عظمى قادرة على محاربة امريكا نفسها لو ماوافقتش على القبول بالانقلاب الناعم رغم ان ٨٠٪ من تسليح الجيش من امريكا نفسها بقالنا ٣٠ سنة.
. خلي ال ٣٠ مليون المزعومين بتوع كرنفال ٣٠ يونيو يقاطعوا تركيا ، من يحترمون الصناديق و لا يسمحون للاخرين بتوجيه عقولهم و لا يحترمون اسلوب الاخوان في ذات الوقت هايشتروا من تركيا و خلص الموضوع على كده.
احترامي للجميع.
يا سلام... ايه التحليل العبقري ده؟؟
طيب.. حضرتك عرفت منين ان ال30 مليون دول (مزعومين) مش حقيقيين؟؟؟
انت بتفترض انك شايف الصح وبتفهم وال30 مليون دول كانوا موهومين وفلول ومخدوعين من الاعلام برضه؟؟؟
لما ده انقلاب... ايه اللي حصل لما الجيش طلع البيان رقم واحد في 2011 وجابوا التلفزيزن يصورهم وهم مجتمعين من غير قائدهم الأعلى وقتها؟؟؟ ده مكنش انقلاب؟؟ ليه مسمعناش الكلام ده من حضرتك -وغيرك- وقتها؟؟؟
هتقوللي علشان كل الناس كانت ضد مبارك؟؟ هقولك... مين اللي قالك؟؟ لو بعدد الناس اللي نزلت الشارع يبقى 2011 هي اللي كانت انقلاب بقى لأن العدد لا يقارن بأي حال بالفيضانات البشرية اللي نزلت في 30/6...
يا راجل ده احنا شغالين مرسى علم وتقريبا 80% من اللي شغالين في شركات السياحة واللي في الفنادق ظبطنا عربيات مخصوص ونزلنا على الغردقة (230 كم من منطقة مطار مرسى علم) علشان نشارك في المظاهرات... وايام 2011 مكنش في بني ادم في الشارع لا مع ولا ضد مبارك... انما فعلا المرة دي الناس كانت (طهقت) وجابت اخرها... وانت لسة بتقوللي انقلاب؟؟ ولو مش مصدق ياريت تسأل اي حد معرفتك شغال في البحر الأحمر واكيد فيه يعني!!
اسف لصاحب الموضوع للخروج عن السؤال الأساسي... بس في النهاية انا كنت اتمنى نكون في بلد ظروفه احسن من كده يقدر ب30 مليون (ثوري مزعوم) يقاطعوا منتج -أيا كان- وقت ما يحبوا...
اخي الفاضل احمد فوزي
١- لم تتفضل حضرتك بالتعليق على الجزء الاول من تعليقي بخصوص قدرة شعب يستورد ٨٠٪ من السلع الموجودة بسوقه على تطبيق حظر تجاري او مقاطعة لدولة ايا كانت هذه الدولة. الموضوع بيزنس بحت يا اخي الكريم و مالوش علاقة بالعواطف بدليل الاسمنت المصري ايام مبارك لما كان بيتصدر لاسرائيل علشان بناء الجدار العازل.
٢- بخصوص موضوع ٣٠ مليون فخليني اذكر حضرتك ان في بعض القنوات قالت ٣٣ مليون و توني بلير قال ١٧ مليون و الجزيرة قالت ٤ مليون فحضرتك بتلومني على ايه طالما مفيش اي احصاء علمي للاعداد التي نزلت مع كامل الاعتراف بانها كبيرة جدا. تحب اقولك ليه قالوا ٣٠ مليون لان البهوات بتوع تمرد قالوا مرسي نجح ب ١٣ مليون صوت و علشان نشيله عايزين نجمع ١٥ مليون ثم اعلنوا في النهاية تجميع ٢٢ مليون و كل ده كلام غير موثق فطبيعي علشان الحدوتة تكمل ان كل من وقع استمارة تمرد نزل الشارع و عليهم ٨ مليون من عندنا ياسيدي ماتحبكهاش.
٣- كل اعتراضي و الكثير من الناس هو عى انقلاب ٣-٧ و ليس ثورة ٣٠-٦ لانها في علم الثورات لا يمكن ان تكون اكثر من كرنفال بشري كبير جدا و شماريخ و ليزر و طيارات بتصور و سيناريو معد مسبقا بحرفية كبيرة لاستغلال الحشود التي نزلت للشارع في قلب الطاولة على الجميع و عزل مرسي ومعاه الدستور المستفتى عليه و مجلس الشورى و قبلهم جميعا مجلس الشعب و استعادة دولة مبارك بشخوص جديدة و محمولين على الاكتاف المرة دي علشان العالم الخارجي مايتكمش و يقول انقلاب عسكري.
شوف يا سيدي الكريم.. هرد على حضرتك نقطة نقطة:
1. أنا بالفعل رديت على نقطتك الأولى في آخر جملة ليا لما قلت اني كنت اتمنى يكون عندنا بلد ظروفه تسمحله انه ياخد قرار زي مقاطعة سلعة -أيا كانت- وقت لما يحب!! وده طبعا احنا متفقين عليه بس الفرق اني شايف ان العائق هوه ظروفنا ووضعنا الاقتصادي اللي زي الزفت.. وحضرتك شايف ان محصلش لأن اساسا مكنش في ثورة وان (الانقلابيين) هم اللي (بيزعموا) ان الملايين نزلت الشارع علشان تشيل البني ادم ده!!
2. انا ما قلتش ان الاعداد موثقة ولا حاجة... مش القضية اصلا... انما اللي ما شفش الأعداد كانت عاملة ازاي في 30/6 لحد 3/7 وبعدين يوم 26/7 يبقى معلش بقى... في حاجة غلط (غير انها فوتوشوب يعني يا إما انا وكل الناس اللي اعرفهم فوتوشوب اصلا وانا معرفش)...
3. هسألك سؤال... يعني 30/6 ثورة زي مانت قلت؟؟؟ طيب فين المشكلة؟؟؟ ان الجيش جه يوم 3/7 وعزل الرئيس؟؟؟ طيب كنت عايز حضرتك ايه اللي يحصل يعني؟؟؟ ايه رأيك انا هقولك على فكرة... المفروض الجيش كان يسكت خاااالص ويفضل على الحدود وبعدين الأعداد اللي انت نفسك اعترفت بضخامتها كانت تفضل تلطم وتصرخ في الشارع لحد يوم القيامة... ولا اقولك... لحد ما كانوا يزهقوا ويروحوا... ولا اقولكم.. لحد ما كان (انصار الشرعية) ينزلوا بقى يعلموهم الأدب صح؟؟؟ انا شخصيا متأكد ان لو الموضوع كان اتساب كده كانت قلبت بمجازر بين الطرفين... ولا ايه؟؟؟ وبعدين... لما هوه انقلاب... يبقى الأزهر انقلب؟؟ الكنيسة كمان انقلبت؟؟؟ كل الرموز اللي محدش يقدر ينكر وطنيتهم زي البرادعي والمسلماني والببلاوي ومصطفى حجازي وغيرهم بيدعموا انقلاب عسكري؟؟؟ طيب ليه ما بنشوفش ملايين (مش فوتوشوب بقى) نازلة الشوارع والميادين كل يوم اعتراضا على (الانقلاب)؟؟؟ وليه ملايين؟؟ ليه حضرتك متمشيش في الشارع بين الناس البسيطة وتسألهم هم مبسوطين ان الاخوان غاروا في داهية ولا زعلانين؟؟
وبعدين... ايه تعليقك على خط انابيب الغاز اللي كان بيتفجر كل 3 دقايق ايام طنطاوي ووقف تمااااما اول ما مرسي فاز بالانتخابات واذ فجأة رجع يتفجر تاني اول ما (الشعب) اسقطه؟؟؟
الكلام كتير وده مش مجاله بس أحب اقولك اني -للأسف الشديد- انتخبت مرسي في الجولة التانية مضطرا لأني كان مستحيل انتخب شفيق اللي اعرف كتير عن فساده بحكم شغلي في شركة سياحة واحتكاكي اليومي بالعاملين في الطيران!!
فعايز اقولك ان اللي خلى الأعداد مهولة في 30/6 وما بعدها ان كان فيها نسبة كبيرة جدا من الناس اللي انتخبته ضد شفيق!!
في النهاية... شخصيا بقول الحمد لله ان ربنا خلص البلد من نظام مبارك ثم الإخوان اللي ميتخيروش عن مبارك في حاجة...
ومعلش انا اسف... حضرتك برضه مرديتش على سؤالي: ايه هوه الوصف العلمي (والدولي) للي حصل في ايام 2011 لما الجيش نزل الدبابات والمدرعات وقادته اتصوروا في التليفزيون بدون قائدهم الأعلى وطلعوا البيان رقم 1 وأعلنوا عن خريطة طريق بالظبط زي اللي حصل دلوقتي؟؟؟
ياريت حضرتك تشرحلي يمكن انا مش شايف الحقيقة... طبعا بجانب الاجابة على موضوع تفجير انابيب الغاز... زائد سؤال: لما حضرتك شايف ان الجيش غلط لما اتدخل في 3/7 طيب المفروض ايه اللي كان يحصل؟؟؟
احمد باشا
وجهة نظري ببساطة ان ثورة ٢٥-١ كانت ثورة ربانية غير مخطط ليها و ارادها الله تعالى كوسيلة وحيدة جمعت الشعب للتخلص من نظام مبارك اللي خد فرصته ٣٠ سنة و سلم البلد زي ماحضرتك عارف
بينما ثورة ٣٠-٦ هي ثورة تم دفع الناس اليها دفعا للنزول و تصويرهم لاقناع العالم الخارجي ان ما حدث ليس انقلاب عسكري لاستعادة السلطة التي فقدوها في ١١ فبراير ٢٠١١.
مع كل احترامي لمن نزلوا بالملايين في ٣٠-٦ و لهم كل الحق في التعبير عن كل الضيق و الغضب و القرف من اسلوب مرسي و الاخوان في الحكم الا ان المقارنة تكون ظالمة لان مرسي و نظامه لم يتحصلوا سوى على سنة واحدة مش ٣٠ سنة لتطبيق فكرهم و ثانيا لم يفسدوا فساد مبارك مثلا بما يستدعي النزول ضدهم بترتيب حملة اسمها تمرد معروف مين وراها و مولها و يقودها محمود بانجو و اللي معاه و كانت حملة تمرد هي نهاية المخطط الشامل لاستعادة السلطة من الاخوان بعد سنة اعتمادا على حرب مؤسسات ضد الرجل من الداخلية و الحرس الجمهوري و القضاء و اكيد الاعلام.
بالمناسبة هو باسم يوسف راح فين دلوقتي يا ابو حميد و لا هو مهمته خلصت خلاص.
هولاند رئيس فرنسا المنتخب شعبيته النهاردة اقل من ٢٤ ٪ و حتى الان لم تنظم حملة تمرد فرنسا لازالة الرجل و كوادره لان ده شعب محترم و عارف يعني ايه صناديق انتخاب و معاه مؤسسات تقبض رواتبها من الدولة و ليس منه شخصيا حتى تقول احنا اجازة الاربع سنين بتوع هولاند. فاهمني يا باشا.
حضرتك ببساطة و من نزل معك بغرض عزل مرسي اهديتم السلطة ثانية لنظام مبارك و رجالته الذين اطلقوا الان على ثورة يناير انها نكسة يناير. فاهم يا باشا ده معناه ايه. طب فاهم ازاي عكاشة الاهبل بعد غلق قناته بالقانون تم فتحها ثانية و محدش عارف ازاي للنهاردة بينما القنوات الاسلامية اغلقت. طب تقدر تفسرلي ليه مات ١٠٠ انسان عند دار الحرس الجمهوري و زيهم عند المنصة و ادهم خمس مرات في رابعة ده غير كل مظاهرة للاخوان في المحافظات لازم فيها قتلى بالرصاص من بلطجية المحافظات دي التابعين للداخلية و في حمايتها. يا راجل ده حتى القتلى عند الاتحادية في ديسمبر ٢٠١٢ كلهم اخوان و معاهم ابوضيف الصحف و كله ركز مع الصحفي و ساب التانيين.
لو كرهك للاخوان مخليك مغمي عنيك عن كل ده فاسمحلي الموضوع محتاج اعادة نظر منك كمثقف.
كما قلت سابقا الاخوان سذج جدا ان يوافقوا على تسلم البلد بحالتها المزرية بعد نظام مبارك او بمعنى اخر طنطاوي شربها لهم مؤقتا لاستعادتها لاحقا. وصلت يا باشا.
احترامي يا ابو حميد