وبدات مشاكل التكييف في اوبل استرا ٢٠١٣

النهارده كنت مسافر بالعربيه وفي نص الطريق قررت اشغل التكييف ؛؛ لقيت التكييف علي سرعه المروحه الاولي بيدخل يدوبك نسمه هوا خفيفه ولما ازود المروحه الاقي هواء سخن اوي داخل مش ساقع انا شغلت التكييف قبل كده مرتين تلاته وكان زي الفل معرفش ايه اللي حصل ،العربيه مكملتش لسه الفين كيلو ؛؛كنت متعصب جدا علشان اللي حصل ،، كمان علي السرعه الاولي بسمعً زي الفريون ماشي في ماسوره ،، العربيه انا فرحان بيها جدا بس حاجات بتعكنن علي الواحد؛؛ يا تري ايه الاي حصل ،، انا رايحلهم الصيانه الاسبوع ده اعمل صيانه الاربع شهور واشوف في ايييه

طب حضرتك كنت مدخل هوا من برة ولا قافل الدورة

فلتر التكييف يا باشا

مره قفلت دوره التبريد ،، ولما عملتو اوتو هوا فتح الدوره لواحده ،، هوا مفروض ايه الصح؟

الف سلامه ان شاء الله تكون حاجة بسيطةهو في حوار ان كل ما تدور العربية لازم تدوس علي الزرار بتاع غلق الهواء اللي هتلاقيه اخر زرار تحت شمال ( مش متاكد من مكانه بالضبط ) عشان ميدخلش الهواء السخن عليك لانك في كل تدويرة لازم تشغله والا هيدخل عليك الهواء السخن
عند تشغيل التكيف انا بتاكد من ثلاثه زراير شغاله منوره زرار المروحه اللي هو سته سرعات وزرار غلق الهواء اللي بره والزرار اللي فوقه واستنا شويه عقبال متدخل هواء سائع لان درجه واحد ضعيفه علي الجو ده
موضوع صوت المواسير ده انا مبسمعوش
انا ماستنتش علي العربيه بمجرد ما استلمتها وانا مشغل التكيف وكان الصيف لسه مجاش وكنا في الخريف وبشغله بالليل عشان معرفش امشي والزجاج مفتوح
ربنا معاك

اتأكد ان هو مش علي السخن

اللي هي العلامه دي:
http://i258.photobucket.com/albums/h...ps6078d559.jpg

حصلت معايا وافتكرتالتكييف فيه حاجه واكتشفت انى مش دايس على زرار ال ac الى هو اول زرار من ناحيه اليمين زى ما قالك الزملاء لازم تكون متاكد ان 3 زراير شغالين ومنورين

متابع ...

متابع حشدددددددددد !!!!!!!!!!!

يا جماعه انا كنت عامل كل اللي انتوا قلتو عليه ,, ونزلت جربتو تاني النهارده التكييف مبيسقعش المراوح ةالتكييف بيشتغل ومبيسقعش ولما العربيه بتمشي وتسخن بيدخل هوا سخن حتي وانا قافل الدوره وبعدين فيه صوت زي ما تكون حاجه ماشيه في ماسوره ومبتفصلش متهيالي ده الفريون معرفش انا حجزت للصيانه الاسبوع الجاي وهشوف ايه الموضوع .

اقتباس:

---

المشاركة الأصلية كتبت بواسطة karim gamal

يا جماعه انا كنت عامل كل اللي انتوا قلتو عليه ,, ونزلت جربتو تاني النهارده التكييف مبيسقعش المراوح ةالتكييف بيشتغل ومبيسقعش ولما العربيه بتمشي وتسخن بيدخل هوا سخن حتي وانا قافل الدوره وبعدين فيه صوت زي ما تكون حاجه ماشيه في ماسوره ومبتفصلش متهيالي ده الفريون معرفش انا حجزت للصيانه الاسبوع الجاي وهشوف ايه الموضوع .

---

أصل تبقي مصيبة لو أوبل محلتش مشكلة التكييف اللي كانت في الفيكترا
حضرتك لازم تروح تعمل معاهم الجلاشة في التوكيل:01964e~163:

بدام بتسمع صوت هوا فى السربنتينه يبقى الفريون هرب

الصوت ده معناه نقص فريون

لو الصوت عندك (فسسسسسسس) يبفي من الاكسبنشن فالف ومعناه ان شحن الفريون قليل

شكرا يا جماعه علي ردودكم انا روحت النهارده التوكيل وكشفوا علي التكييف لقوا العيب ان التلاجه فيها تسريب وبعدين طبعا عقبال لما خاطبوا الشركه في المانيا وقلولهم عيب تصنيع والشركه ردت عليهم ان هما يغيروها كانت الساعه ٤ فالعربيه هتبات في التوكيل وهستلمها بكره ان شاء الله ،، عايز رايكم في اللي حصل الله يكرمكم ،، وهل التةييف فعلا مش هيتاثر واكنوا لسه جاي

هو نفس الحواااااااااااار اللي كان في فيكترا C وكان بردو بختك يابو بخيت..:pffft:
إن شاء الله هتتظبط وترجع زي الفل..ولو إني شايف ان ده سقطة من أوبل جامدة ولا يستهان بها

انشاء الله يبقى زى الفل
ومعرفة العيب نص الحل
و متضايقش نفسك و افرح بالعربية
و المهم انك بخير
معلش العربية بتحسسك بغلاوتها فى الاول :)

طب الحمد لله
طلعت حاجه بسيطه
علي فكره نفس العيب ده حصل في عربية والدي ال x5
بس التسريب كان من السربنتينه الداخليه
و حصل فجاه و بدون سابق انذار و بلا اي تفسير
و اتغيرت و العربية رجعت زي الاول و احسن

المشكلة ان فك و تركيب التلاجة في الأوبل مقرف جدا .. و العربية لسه جديدة .. مش عارف في التوكيل مدربين على الموضوع ده بحرفيه و لا لأ.

يعنى عربية موديل السنة ويحصل العيب الغريب دة عار عليهم بجد وربنا يستر فى التوكيل بقى العربية لسة جديدة واعتقد دى اول عربية يحصل فيها العيب دة ويا ترى هيقدروا يعملوه بحرفية ولا لا زى ما قال زميلنا كريم ربنا يستر وطمنا

الحمد لله يا جماعه التكييف اتصلح ، وغيروا التلاجه ،، وبصراحه التوكيل كان محترم جدا في تعاملهم وطلعوا جربوا معايا العربيه ،، لغايه دلوقتي الموضوع تمام وتسلم ايديهم

اقتباس:

---

المشاركة الأصلية كتبت بواسطة karim gamal

الحمد لله يا جماعه التكييف اتصلح ، وغيروا التلاجه ،، وبصراحه التوكيل كان محترم جدا في تعاملهم وطلعوا جربوا معايا العربيه ،، لغايه دلوقتي الموضوع تمام وتسلم ايديهم

---

طاب الحمد لله وكويس انهم طلعوا محترمين ربنا معاك

الحمد لله عدت على خير وربنا يكرمك ويكفيك شرها

الحمد لله ان التوكيل طلع كويس وانجز الموضوع بس غريبة ان عيب زي دا يطلع من اكبر شركة عربيات في العالم حتي الالمان بيغلطو مش زي ماحنا كنا فاكرين

ده عيب صناعه ونادر جدآ الكويل الداخلى مفسو فى تسريب بس خير انت فى الضمان يعنى اي حاجه هتتغير وترجع جديده مفيش اي مشكله والجمد لله على كل شئ