هو فين التقرير والتقييم اساسا؟!!!!
عرض للطباعة
هو فين التقرير والتقييم اساسا؟!!!!
باشمهندس سلامة
سبيك من جربتها او مجربتهاش
النقاط السلبية من وجهة نظرك
صوت الموتور اغلب العربيات الاقتصادية مش بيبقا فيها عازل للكبوت
وكمان لو الموتور بارد عدد لفات الموتور بيعلي لحد ما العربية تسخن احد 1.5 ثم يهبط الي 1.00
كمان حط في الاعتبار فترة التليين وكمان زيت موبيل بيعلي صوت الموتور
وكمان سير الكاتينة لو جنزير مش كاوتش بيخلي صوت الموتور عالي
بالاضافة الي نوع الصلب المستخدم في الموتور ونسبة الشوائب به
ومعلوم لجميع محترفي السيارات ان في عربيات بيبقي صوتها واطي علي السرعات البطيئة
وصوتها عالي ومزعج علي السرعات العالية
علي العكس بعض العربيات صوتها بيهدأ علي السرعات العالية
طبقا لتصميم الموتور واقصي عزم والتورك
ولو الموضوع بصوت الموتور كانت الفيراري والبوجاتي والبنتلي والميزاراتي وغيرهم عربيات تعبانة
ننقل للنقطة اللي بعدها
شكل الفوانيس ولونها
ده اسمها اضاءة صفراء (Worm)هالوجين
وطبعا في فروق كتير بينها وبين الاضاءة العادية والزينون
نيجي بقا وبسرعة لموضوع العرض والثبات
الثبات ملوش دعوة بعرض العربية له علاقه بقاعدة العجلات ووصلات العفشة والمساعدين
كمان عرض العربية لا يعني انها واسعة فأحدي سياراتي سيريون تبدو صغيرة وهي من الداخل من
اوسع السيارات
الاوربيين ليهم مواصفات واختبارات امان
العربية مكانتش بارده .. دي كانت سخنه جدا .. و صوت المروحه فيها كان عالي اوي و مزعج و دا نسيت اقوله ف التقييم
البيجو ال 301 المفروض انها مش عربية اقتصادية .. دي سعرها 130 الف .. احنا مش بنتكلم ع ال206 او ال 206+ اللي هما ارخص عربيات ف البيجو و دول فعلا الإقتصاديين
انا معرفش نوع الكاتينه ف العربية دي ايه و اعتقد ان ناس كتير لسه متعرفش هي جنزير ولا كاوتش ولو ان الفرق مش هيبان و العربية زيرو
و نوع الصلب و الشوائب اللي فيه .. اكيد الصلب اللي فيها المفروض يكون كويس لأن دي عربية اوروبي
العربية دي صوتها كان عالي جدا و مزعج و كله تكتكه علي السلانسية و كان حتي اعلي من اللوجان و من عربيتي الأوبتيما و الفيراري و البوجاتي صوتهم ف السلانسيه بيبقي هادي و العربيات دي صوتها بيبقي عالي اوي عشان نظام الأكسوست اللي فيها اصلا بيعلي الصوت و ف الماركات دي صوت العربية بيبقي زي العلامه التجارية كدا لازم يبقي قوي و مميز لأنها سيارة رياضية بالدرجه الأولي
اما بالنسبة للفوانيس .. ف لما نور العربية انطفا الفوانيس نفسها هي اللي كانت صفرا شوية
كأنها فوانيس قديمة .. نفس اللي بيحصل لما تغسل فوانيس عربيتك كتير و تسيبهم ف الشمس
موضوع الثبات دا انا قولت انه اكيد متراعي ف تصميم العربية طبقا للمواصفات الاوربية
و مجبتش سيرة وسع او ضيق العربية
نسيت اقول اني شفت واحده تانيه امبارح بليل و مكنش فيها الكلام دا .. غالبا البنت اللي معاها العربية هلكتها لأن العربية اللي شوفتها ف الأول كلها متخبطه
شفتها النهاردة جنبى في الزحمة
ما حسيتش بصوت الموتور ، موضوع المروحة شايفه عادى ، ما المرسيدس طول عمرها مروحتها عالية جدا
انا عندى في الكورولا صوت المروحة عالى مع التكييف ومش حاسس ان عندي مشكلة يعنى ..
المهم انى حسيتها احلى بكتير وهى وسط العربيات عن وهى في المعرض او وهى لوحدها
شكلها كان شيك اوى فعلا ما شاء الله وما حستش انها كنزة ولا حاجة ، ( مش كورسا مثلا !)
الاضاءة انا شايفها ممتازة كنا ماشيين اصلا في طريق ضلمة والاضاءة كانت حلوة ، وعلى فكرة النور القوى زيادة عن اللزوم مش دايما بيبقى ميزة واللى عنده نور جامد في عربيته عارف ليه ، لانك بتيجى في مواقف بتلاقى نفسك ما تعرفش تشغل النور الواطى نفسه لان الناس بتتأذى منه كأنه عالى وتلاقيهم ضربوا العالى في وشك ! الخلاصة النور شايفه حلو وبيفرش مسافة حلوة قدامه
الحاجة الغريبة اللى شفتها هى نور الفوانيس الخلفية والاستوب ، مش احمر صرف ، يعنى مدى على برتقانى شوية كأنه بهت من الشمس ( كـ لون الاضاءة فقط وليس الشكل او الحالة ) وكانت باينة اوى في الاستوب مش عارف ليه ، يعنى مش واخد حقه في اللون الاحمر !
بالنسبة لى ما زالت صفقة رابحة جدا جدا ، وهى فعلا في الفئة الاقتصادية ، وللاسف العربيات غليت وبقت ال130 الف اقتصادية ، بصوا على الاكسنت ار بي عربية مالهاش لازمة بتبدأ بـ 115 ، النيسان صنى الجديدة سيارة فاشلة بكل المقاييس ، لما اتردد في البيجو شوية ، او اقلق من حاجة ، مجرد ما ابص للعربيات دى ، عقلى بيرجعلى و احترامى يزيد للبيجو واعجب بيها وبسعرها الممتاز جدا جدا 108 للمانيوال ( ده البيكانتو بقت ب100 دلوقتى !)
الفكرة في حاجة ، ان من كتر شكر الناس في العربية ، الواحد بيرسم صورة خيالية مثالية اوى في دماغه ، يعنى انا بصراحة اول مرة رحت اتفرج عليها ، ما ابهرتنيش لان الواحد من اللى بيسمعه بيبدأ يرسم في خياله صورة احلى بكتير من الواقع ، فتكون النتيجة انه ممكن يقول سيارة عادية ( ايه يعنى طالعين بيها السما على ايه !) لانه بدأ يقارنها بعربيات في فئة الـ 200 الف ! من كتر ما الناس شكرت فيها وطلعتها من الفئة بتاعتها الاصلية
الواحد شاف عربيات كتير وقليل وياما عربيات وماركات مشهورة وفيها عيوب ، والبيجو 301 لحد دلوقتى شايفها مفيهاش عيوب او عيوب قاتلة يعنى
يعنى هل هى واطية ؟ لا عالية وكويسة
العفشة ؟ متوسطة لا ناشفة ولا ناعمة اوى (رأي كل الملاك)
يبقى ثباتها ضايع ؟ لا دى بيجو
طب تقيلة في طلعتها وبطة ؟ لا دى بتجري كويس جدا وموتور 115 حصان بتجمع 0-100 في 9 ثوانى للمانيوال
يبقى بتاكل بنزين ؟ لا استهلاكها ممتاز جدا بعد التجربة وكل العربيات لسة ما عدتش الـ 10 الاف كيلو
يبقى خفيفة وصاجها ضعيف ؟ لا ناشف ومحمل
ضيقة او ضيقة من ورا ، او الشنطة صغيرة ؟ لا والله واسعة جدا جدا
الفرامل ضعيفة ؟ لا ممتازة وفيها اي بي اس من اول فئة وكل وسائل الامان
التكييف تعبان ، لا ده يابانى وزي الفل
بس ، يبقى قطع الغيار غالية وسوقها هيبقى واقف ؟ طب انزل شوف كدة ، كنت تصدق ان ييجى اليوم وعربية بيجو تتباع بأوفر برايس ومش موجودة الا بالحجز شهرين ؟
فاضل ايه تانى ؟
بصراحة انا شايف الحاجات التافهة زي جودة الخامات ( رغم انها مش سيئة ) و عرض العربية وشكل الشنطة وشكلها من الجنب وشكل المراية وشكل اوكرة الباب ! وشكل مقبض الباب وفرش الباب ، والنتشة الطبيعية في الفتيس وصوت الموتور والكلام ده كله ، من باب "مالقوش في الورد عيب"
من الاخر لاي حد مهتم بالعربية دى ومتردد ، عشان ما تتعبش قارنها بالاكسنت والنيسان صنى الى في نفس سعرها وانت ترتاح اوى اوى
انا متفق معاك جدااا انها صفقه رابحه بالنسبه للكوري و الياباني اللي نط ف السما و جوذة زي الزفت
علي فكره العربية اللي انا شفتها كانت متهانه جدا و بالنسبة لصوت المروحة اعتقد انه مكنش مع التكييف لأن الإزاز الأربعه كانو مفتوحين
و شفت واحده تانيه لونها ابيض بصراحه محترمه كتير عن الأولانية اللي انا شفتها
و مكنش صوت الموتور عالي ولا باين فيها صوت المروحه
ممكن العربية الأولانية تكون اتهلكت .. مش ممكن دا أكيد
بس أتهلكت بالسرعة دي ؟ هي كلها كانت خبطات بس هل الموتور بنت تقدر تهلكه كدا ف شهرين ولا تلاته !!
شيء غريب فعلا !اقتباس:
ممكن العربية الأولانية تكون اتهلكت .. مش ممكن دا أكيد
بس أتهلكت بالسرعة دي ؟ هي كلها كانت خبطات بس هل الموتور بنت تقدر تهلكه كدا ف شهرين ولا تلاته !!
مهما كان هى ممكن تخبط العربية زي ما هى عايزة ، بس مش هتهلك العربية بالمعنى الكامل
ولو انى عندى مثال والله افتكرته حالا وانا لسة بكتب دلوقتى ، واحد زميلى في الشغل مالوش في العربيات واول ما جاب جاب كورولا زيرو
العربية طبعا اتخدشت من كل حتة في الجراج ده اول حاجة
تانى حاجة مشي بيها على الصحراوى الشرقي على 170-180 وخبط في حجر وهو ماشى
طبعا هو مش عارف اي حاجة، الجنط اتعوج منه ، زيت الفرامل سرب من الخبطة ، الكارتيره اتخرمت ، زيت الموتور نزل اكتر من نصه وكمل الطريق لحد المنيا ، ورجع تانى على القاهرة بنص الزيت فقط ! (ربنا يستر ع الموتور عنده !)
بعدها بأسبوع واحدة خبطتله العربية في العتب وقالوله في التوكيل لازم تغير الباب ، والجنط لوحده هناك بـ 3000 جنيه !
دى عينة للى ممكن حد مش فاهم يعمله في العربية ! والكلام ده كله العربية ما بقالهاش 3 شهور !