الموضوع: سيارات اوبل الرياضية ذات الاداء العالي . تعرف على opc

السلام عليكم , طبعا كلنا عارقين ان عربيات اوبل محترمة و تتحمل جميع المشقات و سيارة عائلية تتحمل

متطلباتهم بس مش سيارة رياضية ذات اداء عالي زي ال BMW M power او المرسيدس AMG و مش

معروف ان الاوبل سيارة High Performance لكن الكلام ده غير صحيح تماما ! اوبل ليها قسم يسمى "OPC " او " Opel performance Center " يعني مركز اوبل للاداء و ده انشئ عام 1997 و المركز ده بيطلع عربيات زي الفكترا و الكورسا و الاسترا اللي احنا عارفنهم عربيات رياضية و قوية جدا و بيتسمى في اختها فوكسهول ب VXR بدل OPC .


اول عربية انتجت من المركز ده كانت الاسترا G و كانت بتنزل بموتور 2.0 لتر بيولد قوة 158 BHP و ده اللي اعرفه عنها لأنها مكنتش منتشرة كتيير و دي صورة ليها :

و أولا الاسترا

بعد كدة نزلت الاسترا H OPC و دي نزلت على شكل ال GTC و كانت نازلة بموتور 2.0 لتر تيربو بيولد قوة 240 حصان بس كانت مشكلتها ان كم القوة دي بتتنقل للعجلات الأمامية يعني دفع أمامي و ده كان بيخلي في ثقل و صعوبة في التوجيه و كان في Understeerلكن كسرعة كانت رهيبة ممكن توصل ل 250 كيلو متر و دي صور ليها :






و في 2012 كانت المفاجأة الكبرى , الاسترا J OPC و كانت برضه على شكل ال GTC لكنها احلى و شكلها اكثر رياضية و الجنوط اكثر من روعة + عادمين ضخام و الكراسي رياضية و الفرامل من شركة Brembo
و اما عن الموتور فهو برضه 2.0 لتر تربو لكنه بيولد قوة اكبر 280 حصان و تسارع من 0 الى 100 خلال 6.1 و الدفع برضه امامي لكن الوضع مختلف هنا تماما عن الاسترا H لأن في ال J خلو التوجيه هايدروليكي و استخدمو نفس التكنولوجيا اللي قيراري بتعملها في التوجيه فامكنش فيه اي عيوب في التوجيه ده بالعكس العربية بقى الثبات بتعها رائع و هي اثبت و اقوى عربية في فئتها اللي هى ال Hot Hatches بس مشكلتها الوحيدة السعر و هو انه غالي نسبيا عن بقية منافسيها و في منها ال DTM اللي بتشارك في البسباقات و بكدة نكون خلصنا الاسترا بس مش هنساكو بالصور للاسترا J :







Astra Yellow Motorsports :

ثانيا الفكترا

الفكترا بقى نزلت OPC في شكل الفكترا سي اللي هو الاخير بتاع 2008 و كان في منها موديلين واحد ستاشن واجن و الثاني كان شكل الهاتشباك و السيدان مع بعض و دي كانت من اسرع العربيات اللي اوبل انتجتها شفت ناس جايبين بيها على اليوتيوب 290 kmh و كانت بتسبق عربيات كتير منها البي ام ال M5 وده لانها كانت خامس اسرع عربية صالون او سيدان عام 2005-2006 و ده لان كان بيها موتور 2.8 لتر يعني (2800 cc ) تيربو بيولد قوة 280 حصان مع عزم عالي جدا 355 nm لدرجة ان الثالث بتعها بيجيب 175 و التسارع بتعها سريع جدا من 0 ال 100 خلال 6.2 ثانية و كان فيها برضه مشكلة التوجيه زي اللي في الاسترا H و مكنش سعرها غالي اوي كانت بتعمل حوالي 21000 جنيه استرليني و كانت بتنزل مانيوال و اوتوماتك و دي صور ليهاو هتلاحظوا انها ليها جنوط كبيرة جدا و عادميين ضخام :

ثالثا الكورسا

الكورسا OPC نزلت بشكل الكورسا D الجديد و السيارة فيها محرك 1.6 تربو بيولد قوة 200 حصان للعجلات الامامية و بيها كراسي رياضية و مزينة قي التابلوه ببعض اللمسات الرياضية و في منها اصدار اللي هو اوبل كورسا نوربورجرينج وده تم تطويره على حلبة نيربورج في المانيا و دي صورة للسيارة :

اخيرا الانسيجنيا

و اخيرا و اهم حاجة الانسجنيا OPC و دي اعلاهم اداءا و اغلاهم و دي مش بينزل منها مصر الشكل العادي حتى , اما الانسيجنيا OPC فهى بتنزل بموتور قوي 2.8 لتر تيربو بيولد قوة 325 حصان للعجلات "الاربعة" يعني دفع رباعي و ده اهم ما يميزها و ده اللي بيديها انطلاقة قوية جدا بدون هدر القوة في غزل العجلات و فيها فرامل من شركة Brembo و جنوط رياضية مقاس 20 انش و كل ده بيديها ثبات على الطرق عالي جدا في السرعات العالية لدرجة انه تم اختبارها على حلبة بيضاوية زي بتاعة الناسكار و جابو بيها 298 كم في الساعة ده في النمط الستاشن و نسيت اقلكوا ان هى متوفرة بثلاثة انماط سيدان , هاتشباك و سبورت توريور اللي هى الستاشن و متوفرة بناقل حركة يدوي 6 سرعات او اوتوماتك 6 سرعات و قيها فوانيس LED خلفية و LED امامية و نظام AFL بزينون و نظام عادم مزدوج بيطلع صوت جبار رعدي , ده غير التجهيزات الداخلية الفاخرة و الرياضية و مشكلتها و عيبها نفس عيب الاسترا J OPC السعر الغالي و سعرها في الامارات 175000 درهم يعني حوالي 333000 جنيه من غير جمارك طبعا يعني لو اجمركت توصل ل 850000 جنيه و يمكن اكثر كمان و دي صورها باللون الابيض المشهورة بيه :

و بكده نكون انتهينا من قصة سيارات اوبل القوية و عايز اقلكوا ان ده اول موضوع كبير متكامل اشارك بيه و ارجو اكون افادتكم