الموضوع: عاجل استفسار بخصوص فيات 128 للشراء

اولا لازم واحد متخصص يبص على العربية الشاسيه الدواخل الموتور العفشة وهكذا -وطبعا الموتور الخفيف مالوش علاقة بتاخير الدوارة او انها تدور بسرعة او كده -الحاجات الباقة كلها حاجات بسيطة يعنى كبالن او طارة دركسيون او كده --الموتور بتاع العربية انا معرفش بكام استيراد حضرتك بتقول انه 1700 بس ال 128 مفيهاش كرونة لانها جر امامى مش خلفى --بس عايز اقول حاجة موديل 76 موديل قديم وعربيات ال 128 السبعينات مش مريحة فى الركوب مش عارف ليه وشكل التابلوه مش حلو طيب ما تفكر تجيب سوبر فيور مثلا موديل الثمانينات

المشاركة الأصلية كتبت بواسطة moury

السلام عليكم ورحمة الله

انا فكرت اشترى عربية تكون على قد امكانياتى من جهتين ( اولا انى لسه مبتدئ فى القيادة يعنى من الاخر يادوب اتعلمت وطلعت بالعربية مرتين تلاتة كده لانى للاسف مبعرفش اتقل على حد بأنى اتعلم على عربيته بس الملحوظة ان الواحد استيعابه جيد جدا ) الجهة التانية هى طبعا السعر يعنى عايز حاجة فى حدود بسيطة

المهم قدامى عربية فيات 128 هقولكم اللى اتقالى فيها من صاحبها وهو مالك للسيارة طبعا مش اول من سنه ونص
السيارة موديل 76
العربية شكلا كويسة جدا وداخليا مغيرلها فرش جديد كراسى وسقف وابواب ذوقيا رائع التابلوه الامامى نضيف فيها فتيس موديل 97
العيوب اللى قالى عليها فى السيارة على لسانه ( لسه مجبتش ميكانيكى او حد بيفهم فيها يفحصها ) ان موتورها قالى انه خفيف ولما سألته يعنى ايه باعتبارى مش خبير طبعا قالى يعنى العربية مش بتدور منك ف الاول بسرعة وخصوصا فى الجو البارد ومع ذلك هو دورها بسرعة مع العلم انى زرته فجأة يعنى مكنش مسخن العربية قبل ما اروحله ولا حاجة
وقال انه فيه مشكلة فى واحد من الكبالن الامامية بتخلى العربية تعمل هزة فى اول طلعتها وورانى الهزة فعلا وفى نفس الوقت قالى انه عشان متعود ع العربية بيتفادى الهزة دى فى طلعته وفعلا جرب بعدها طلعة تانية مكنش فيه هزة خالص
العيب التالت انه تارة القيادة او الدركسيون فيه شرخ وهو مش الدركسيون الاصلى بتاعها
العيب الرابع انا لاحظت فيها وهى دايرة وواقفة صوت تكتكة كده لما سألته قال ان ده من جسم الدركسيون ولما مسكه بايده كده الصوت اختفى تماما
رابعا العربية قال ان عفشتها كويسة
خامسا الاربع جنوط جداد ومفيهومش اى تآكل او عيوب
خامسا هو مغيرلها دايرة الكهربا كلها من فترة لاتزيد عن شهرين تقريبا

هو مقاليش سعر الصراحة بس اللى باعيتنى له قالى انه كان بيتكلم فى 12 الف
بس انا لما سالته عن السعر مرضيش يقولى وقالى هات ميكانيكى يشوف العربية ويقول السعر اللى يناسبها قبل منا اقول عشان تبقى انت مطمئن ومرتاح نفسيا
ملحوظة المالك لا اعرفه معرفة شخصية ولكن هو من نفس البلدة ( قرية ) يعنى من الاخر وشى فى وشه طول النهار واللى باعيتنى له عشان اشوف العربية هو تاجر سيارات


هل السعر اللى بيتكلم فيه التاجر اللى بعتنى له مناسب ولو مش مناسب كم سعرها المناسب من وجهة نظركم
وسؤال هل لو حبيت اعمل عمرة للموتور ده يكلف قد ايه ولو عايز اجيب موتور جديد يكلف قد ايه ( هو قالى انه عمه شارى موتور وفتيس بالكروانة بتاعته من بورسعيد استيراد عامل 1700 جنيه )

رجاء الرد السريع عليا مبدئيا وانا بكرة هشوف ميكانيكى مووثوق فيه يقيم العربية

وهل فيه حاجات تانية انا محتاج اسأل عنها او اركز عليها فى الفحص ولا ايه !!!

وشكرا مقدماااااا ومنتظر الردود لانى للاسف معنديش خبرة اوى فى شراء السيارات فانا طبيب وغير محترف فى سوق السيارات

سيبك من الهرى دا كلو اهم حاجه تجيب سمكرى يبصلك على جسم العربيه علب وركب وفرد شاسيه وقوايم ........بعد كده لو طلعت كويسه اتكل على الله واشترى وبدل ما تعمر الموتور دا هات موتور جديد او شورت بلوك ارخص بكتير وربنا يوفقكك

طيب ايه مشكلة الموتور الخفيف وهل ده يعتبر مشكلة كبيرة يعنى هحتاج اغيره او اعمله عمرة فى وقت قريب ولا يقدر يشتغل معايا سنه او سنتين مثلا من غير ما اغيره ؟؟

وبالنسبة للفيورا للاسف شكلها مش عاجبنى او يمكن انا ميال شكلا لل 128 عنها شوية

وكمان هو المفروض اخد سنكرى ولا ميكانيكى معايا كمتخصص يشوفها ؟؟؟

كمان بالنسبة للسعر ايه الوضع لو كان زى ما التاجر قالى 12 ؟؟ ولو كان ده عالى مثلا ايه السعر المناسب للمواصفات اللى قولتها لو افترضنا ان كل حاجة تانية تمام

وان شاء الله انا هنقلكم رد المتخصص لما يفحصها برضه

ايوه السعر عالى يعنى لو هتعمر او هتجيب موتور ومصنعيتة وتعمل باقى الشغل اللى فيها قول يتكلف 2000 -2500
يبقى 15 الف فى عربية موديل 76 طيب ماتريح دماغك وتشوف عربية موديل الثمانينات وموتور سليم وحالتها حلوة وهتبقى بنفس السعر 14 -15

طيب استاذ ابو عمر معلش هتقل عليك للاسف انا امكانياتي فى حدود 12 مش ازيد من كده

طيب بالنسبة للعربية دى سعرها المفروض يكون كام تقريبا بحيث مبقاش اخدتها غالية لان الحقيقة الراجل متكلمش لسه معايا فى سعر السعر ده قالهولى تاجر بعتنى له
ولما سألت صاحب العربية انت عايز فيها كام مرضيش يحددلى سعر وقال شوف ميكانيكى يجى يقيم العربية ويقولك تستاهل كام عشان تبقى انت مقتنع وراضى وبعدها انا هقول اللى عندى
فحسيت انه مش قافلها على سعر معين بل سايبها على حسب تقييم الميكانيكى اللى هيشوفها وممكن ساعتها لو هيزود هيكون اكيد حاجات بسيطة

بس برضه حابب اعرف من حضرتك المفروض بالوضع ده يكون سعرها كام تقريبا ؟؟

انت فى الاول خد معاك ميكانيكى يبص عليها كويس وهو اللى هيقدر يقيم على اساس اللى شايفة لو طلع موتورها خفيف وفيها الشغل اللى حضرتك قلت عليه يبقى تساوى حوالى 10 الاف برضه نشوف تقييم اخواتنا هنا اكيد هما هيكونوا ادرى منى

تمام يا جماعة النهاردة انا اخدت العربية لاتنين ميكانيكية شافوها
الاول فيهم قالى الموتور تقييمه 50 % .. ( ده معناه ايه ) وقال فعلا انه بيدخن
والتانى قال ان العربية طبعا راشة دواخل وخوارج ومش عارف قال ان الشاسيه مدقوق عليه مش عارف يعنى ايه برضه انا بكلمكم لانى خبرتى ضعيفة وكان معايا ابن عمتى هو بيفهم فيهم بس للاسف فى النص نقل اكتر من البنزين

المهم الاتنين قعدوا يقولوا بلاش 128 ومش عارف ايه والكلام اللى اكيد حضراتكم عارفينه وهات حاجة اعلى بس الاعلى هتكون اعلى سعرا وانا مش معايا السعر بتاعها

بس انا لسه موريتهاش لعفشجى

بس الكل بيخوفنى وبيقولى انها هتحتاج منك شغل علطول ( مش بيتكلم على العربية اللى انا شايفها بالذات لكن بيتكلم عن ال 128 بصفة عامة )
وقالى انها مش هتساعدك فى شغلك كطبيب هيكون وراك مواعيد يعنى ممكن تيجى الصبح تدورها متدورش مثلا هتعطل منك فى الطريق كتير هتسخن منك كتير وهتضطر توقفها وتبردها وكل شوية هتعوز سنكرة وتصليحات

هل فعلا ده عيب فى ال 128 بصفة عامة ولا ده متوقف ع العربية ولا ايه رأيكم يا جماعة
وفعلا كل شوية هروح اصلح فيها ولا هتبقى على قد الصيانة الدورية مثلا كل شهر مرة او كده ؟؟؟

وبالنسبة لكلام الميكانيكى عن الموتور انه 50 % ده معناه ايه وهل كده يعتبر كويس ولا تعبان جدا جدا ولو هيحتاج مثلا عمرة هتبقى على مدة قد ايه تقريبا ؟؟؟

وشكرا جزيلا مقدما ليكم يا اخوة الخير