الموضوع: تحذير من شراء سياره من الحارج ... ارجوا القراءه للتحذير

أولا ربنا يعوض عليك
ثانيا أنا مستخلص جمارك بالأسكندريه
ثالثا إزاي حضرتك ما تسألش عن الشق الجمركي في الموضوع قبل ما تتصرف كده
رابعا ما فيش أي معلومه هتوفرهالك السفاره ولا شركات الشحن إلا عن طريق الجمرك

بص يا باشا نظام الجمارك عندنا نظام إبن كلب عقيم وخصوصا جمارك السيارات
أي سياره بتخرج بره مصر بموجب شهادة تصدير نهائي لا يمكن ترجه مصر تاني لأنها في الحاله دي بيتطبق عليها نظام شرط العمر (اللي هوا بيقول إن ممنوع إستيراد أي سياره مستعمله من الخارج) والسيارات المستعمله بتدخل مصر في حاله واحده بس اللي هيا إن مالكها يكون المالك الأول
وبما إنه الخواجه كان عايز يبعتلك السياره بإسمك فطبعا ديه أول غلطه لأن في الحاله دي إنت مش المالك الأول وبالتالي الجمارك عمرها ما هتوافقكلك على دخول السياره
الحاله الوحيده اللي الخواجه كان يقدر يرجع بالعربيه لمصر هيا إنها تكون سافرت بدفتر تربتك ودا من كلامك واضح إنه محصلش
وبعدين في حاجه مهمه فايتاك متجرب تستفسر عن أرقام اللوحات اللي إنت بتقول إنها كانت على العربيه (لأنه في الأصل المفروض إنه يسلم اللوحات لو هيسافر وطالما مسلمهاش يبقى العربيه دي ممكن تكون في مصر فعلا والخواجه عامل نفسه خواجه وليه حد قريبه برا بيحاول يقنعك من خلال الإيميلات إنك بتتعامل مع حد بره)

على فكره ميقدرش أصلا يخرج بره مصر بلوحات ولو عمل محضر فقد للوحات وإستلم غيرها يبقى كده بقت أسهل وأسهل لأن اكيد صورة المحضر هتكون موجوده في ملف المرور وهتعرف كانت بإسم مين ومين اللي إستلم اللوحات الجديده

وفي حاجه كمان مهمه بردو
الشركه الأجنبيه اللي الخواجه بيقول إنه بيشتغل فيها عندها قسم لشحن السيارات إيه اللي خلاه يقول هيشحنهالك مع شركه تانيه
والغريب إن الشركه أصلا ملهاش فرع في مصر
في حاجات كتير تقدر تعرف بيها معلومات عن الشخص اللي عامل نفسه خواجه دا
وممكن تراسل الشركه نفسها وتعرف هل فعلا عندهم حد بالإسم دا ولا لا

حاول متكسلش ربنا معاك
وأنا في خدمتك على قد ما اقدر
تقبل تحياتي