بعد ما كنت هشترى كورسا تعليقات الناس احبطتنى

**clip0aldo** · 30-08-2013 11:48 PM

مش ممكن بجد الناس كلها عندها مشاكل فى اوبل كورسا 2005 .. اية يا جدعان مش كدة راعوا مشاعر الناس اللى لسة هتشترى انا لسة النهاردة متفق مع واحد اشوف عربيتة علشان اشتريها دخلت المنتدى هنا مش ممكن بجد الناس كلها بتقول ان العربيات الاوبل كلها مشاكل ووحشة وفيها العبر ومحدش يشتريها ..

لازم تراعوا مشاعر الناس اللى هتشترى حاجة مش لدرجة ان العربيات كلها وحشة يعنى ومفيش ولا حد هنا بيقول عن العربية انها حلوة - طيب يا عم العضو لمة العربية وحشة لية متمسك بيها لغاية دلوقتى وبعدين سؤال للناس اللى بتشتكى من قطع الغيار .. يعنى بالله عليك انت مش عارف ان قطع الغيار غالية قبل ما تشترى العربية !

لا حول ولا قوة الا بالله

**Ramyhamdy** · 31-08-2013 12:11 AM

باشا الكورسا من احلى عربيات الاوبل فى الفئه المتوسطه ماتور 1600 جميل و سحبه روعه شكلها انسيابى تكيفها قوى جدا و عاليه عن الارض يعيبها فقط ان الثبات قليل شويه مقارنه بباقى فئات الاوبل فيها كماليات تغنيك عن اى عربيه فى نفس الفئه السعريه
تقفيلها برازيلى و قطع غيارها غاليه لكن معمره يعنى ركب و انسى و افضل مثال عندك عربيتى مغير تيل فرامل امامى بالطنابير من اكتر من 6 شهور ولا قالت بم
و انهارده مغير تيل خلفى بالطنابير عشان الى فييها كانو بتوع الفبريكه :d
اتكل على الله و اكشف فى التوكيل بلاش بنزينات و اتاكد ان لمبات التابلوه كلها شغاله قبل ما تدور و اكشف على البودى كويس و خصوصا السقف فى الكورساا

**micho129** · 31-08-2013 01:43 AM

I don't know what to say just buy it !!

**meko0o** · 31-08-2013 05:27 AM

انا كنت في نفس الحيره دي وناس شكرت وناس كرهتني فيها بس قررت اني اشتريها هيا عجباني عربيه عاليه و فيها كمليات مش موجوده في فئتها و احسن من الانس و الفرنا الي في نفس السعر و بازن الله حخدها يوم الاحد

**Mohamed Fahmy** · 31-08-2013 11:58 AM

يا باشا أنا كان عندى لانوس و بيعتها و إشتريت كورسا 2004 فى شهر رمضان إللى فات و فعلا حاسس بفرق كبير بين الكورى و البرازيلى .. على فكرة هى برازيلى مش ألمانى .. إشتريت تيل فرامل أمامى بـ 180 جنية ماركة ريمسا الأسبانى و ده كان أغلى حاجة فى السوق و كان فية تركى و صينى و هكذا بأسعار أقل 130 و 150 و 160
أنا عاوز أقولك المفيد ..
تحب تركب عربية كورى و تصرف عليها كل يوم جنية = 30 جنية فى الشهر
و لا تحب تركب عربية أوروبى و تصرف 20 جنية مرة واحدة كل شهرين
كل العربيات أى نوع و أى فئه لازم لها صيانة و قطع غيار والموضوع يرجع لك إنت و إمكانياتك المادية مع إحترامى للجميع .. بمعنى أخر تدفع عشرة جنية كل شهر و لا 100 جنية كل سنة يعنى الغالى رخيص بجد.
أنا مش عاوزك تحبط و لا حاجة دى كلها قناعات عند الناس و كله بتمنه مفيش مستوى متانة و إمكانيات و رفاهية أعلى عن إمكانيات و رفاهية أخرى ببلاش.

كله بتمنه .. و الغالى رخييييييص .. مع خالص إحترامى و التقدير للجميع.

**EGYPTIANDR** · 31-08-2013 12:44 PM

محدش عاقل يقدر يتريق على عربية المانى او يقارنها بعربية تانية "حتى ولو كان تقفيلها برازيلى"
العربية ممتازة فى كل شىء ولكن العيب الوحيد ان عفشتها ناشفة شوية تقريبا عشان يزودوا الثبات...توكل على الله وهاتها ومش هتندم....انا ركبت لانوس وفيرنا وكليو قبلها وهى لا تقارن بيهم

**damasry** · 31-08-2013 01:05 PM

المشاركة الأصلية كتبت بواسطة damasry

انا معايا العربية موديل 2007 وماشية 145 الف كم.

العربية كويسة وجميلة، مفيش مشاكل معايا غير تغيير طقم الدبرياج (اللى مزود احساسى ان معظم طرقى زحمة)

بس كأى عربية دايما خلى ايدك فيها ومتستناش على قطعة غيار محتاجة تتغير.

المشاركة الأصلية كتبت بواسطة damasry

مميزات العربية:
1- واسعة إلى حد ما مقارنة بفئتها.
2- شنطتها كبيرة بس مدخل الشنطة ضيق.
3- عالية عن الارض ومفيش مطب بتحك فيه مهما كنت محمل والحمدلله.
4- ثباتها حلو فى الطريق وفى الملفات (انصحك بتركيب جنوط 15 بوصة)
5- اوبشنز بتاعتها حلوة بالنسبة لسعرها.
6- صاجها قوى (الابواب طبقتين دبل صاج) ويديك احساس بالامان.
7- صيانتها سهلة لأن الموتور قديم شوية.
8- العربية جراية خصوصا فى الأول والتانى.
9- اماكن تخزين كتيرة فى الصالون.
10- مفيش بارومة حصلت معايا والحمدلله.
11- فرامل العربية قوية خصوصا مع اطارات محترمة.
12- كراسيها مريحة فى السفر عكس عربيات كورى كتير.
13- تكييفها قوى ويقارن بكفاءة الكورى (بشرط عدم اللعب فيه وعدم تغيير اى قطع فيه بقطع غير اصلية)

عيوب العربية:
1- عزل صوت الموتور جوه الصالون مش قوى اوى وصوت الموتور مسموع فى السرعات العالية.
2- البوية بتاعتها ضعيفة وانا رشيتها بعد ما كلحت.
3- استهلاكها للبنزين جوه البلد عالى شوية لكن فى طرق السفر موفرة (بسافر شرم الشيخ بتنك بنزين واحد وانا محمل العربية 5 افراد والشنطة مليانة على اخرها ومشغل التكييف طول الطريق)
4- بتستهلك طقم دبرياج على فترات متقاربة.