السلام عليكم ورحمه الله وبركاته..
حد لاحظ ان اثناء تشغيل مكيف السياره وسرعه المروحه (اللي في التابلوه) 4 مثلا وثبات امبير حراره الموتور عند 85د مثلا انه لو خفضت سرعه مروحه التكييف , امبير حراره الموتور بينزل !!!
-كده بالمنطق هتقول ان اكيد في علاقه بين كمبروسر التكييف وحراره الموتور . طبعا كلامك صح ..
بس ايه علاقه سرعات المروحه بالحراره؟؟ هقولك . علاقه غير مباشره..ازاي؟
-في بلف اسمه الاكسبنشن فالف وده بيضغط الفريون لتحويله من ساخن لبارد
-لما سيادتك بتقلل سرعه مروحه التكييف بتخلي بلف الاكسبنشن يفتح اكتر فيسمح بمرور الفريون بمرونه اكتر وبدون ضغط وبكده بتقلل الحمل علي الكمبروسر اللي بالتالي بيقلل الحمل عن الموتور
ويريحه في الحراره. والعكس صحيح لما بتعلي سرعات المروحه بتقلل فتحه بلف الاكسبنشن فيضغط الفريون اكتر علشان يسقع زياده ...
-مثال بسيط.. لو في بيتك مشغل موتور الميه والحنفيه مفتوحه وفجاه ضغطت عليها وسديت الميه لفتره , مش هتلاقي الموتور صوته علي ويسخن؟ هو ده اللي بيحصل للكمبروسر
-اذن حمل الفريون او ضغطه الزياده من شانه انه يرفع درجه حراره السياره نتيجه تحميل الكمبروسر عليها.
-اخر حاجه . بلف الاكسبنشن بيوسع ويضيق ب3 طرق اما ميكانيكي او كهربي او كهروحراري.
الشائع استخدامه هو الكهربي عن طريق ترموستات..تحياتي