الموضوع: ##مأساتى مع أبوغالى و سوبارو امبريزا Rk 2008 # هل 2008 غير مصممه لمصر###

################################################## #############
الجزء الخامس:
طلعت من صيانة جسر السويس وانا مش مصدق وطبعا كنت بفكر اقول لصحابى فى الشغل و لا لأ ،دول حيشتغلونى تريئه ليل و نهار بعد ما وجعت دماغهم شهور سوبارو سوبارو ما فيش زيها.
المهم قفلت الزجاج و فتحت التكيف وشغلت الكاسيت علشان اهدى وأنسى،وطبعا ماشى على اليمين بالراحه علشان عارف ان الفرامل حتبقى خفيفه لحد ما تطببع .
وبعد مدة تقريبا ساعه وانا داخل على المعادى بفتح الزجاج بالصدفه سمعت صوت طنه عاليه جدا من العجل قدام ،ركنت ونزلت لقيت العجل الأمامى طالع منه سخونه عاليه جدا جدا حستها فى وشى وانا واقف وبصيت على الطنابير لقيتها محمره لدرجة سرة الجنط البلاستيك اللى مكتوب عليها سوبارو اصفرت من الحراره.
على طول كلمت م/ايهاب على الموبايل وحكيتلوا اللى حصل قالى روح فورا على صيانة المعادى،قلتلوا بس الساعه داخله على خمسه و زمانهم حيقفلوا،قالى روح بس وانا حكلمهم وقلهم يستنوك.
روحت صيانة المعادى رفعوا العربيه وفكوا العجل وحاولوا يفكوا التيل ما عرفوش من الحراره الشديده جدا وبعد نصف ساعه حاولوا تانى ماعرفوش الا بعد ما مسكوا على بعضهم بحتت قماش مبلوله ،لقينا التيل محروق ولونه اسود والديسكات كأن عليها بودره بيضه من الحراره ولسه حمرا.
ومسكوا التيل بحتت القماش وقعدوا يصنفروا فيه ويصنفروا الديسكات وكل شويه يتلسعوا.
وسألت م/كريم
انا:هو ايه اللى حصل
هو: مش عارف...مافيش حاجه غلط
انا:يعنى ده سببه ايه
هو :ما عرفش ..انا مش شايف حاجه مش طبيعيه...ممكن يكون علشان التيل و الطنابير جداد،أو انت دوست فرمله جامده
أنا:يا سيدى أنا ماشى براحه زى ما قال الكتالوج عند تغيير التيل فى اول 1000 كم ،بالرغم اننا مغيرين تيل وطنابير يعنى التطبيع بيبقى سريع جدا كأن السيارة لسه طالعه من المصنع، وبعدين فرامل ايه اللى دوستها جامد تعمل كده... ولو ..ده يعمل كده؟ هو انا ما ركبتش عربيات قبل كده و لا ايه؟
هو:المهم ..ياله تعال نجرب
وطلعنا نجرب ورجعنا لقينا العجل سخن برده ولكن اقل من قبل كده.
انا: السخونه برضه موجوده وعاليه كتير عن الطبيعى
هو:عادى ..ماتخفش...خلاص يظهر ان التيل الجديد كان فيه كام مللى زياده واحنا صنفرناه.
انا:طب الحمد لله انها ما و لعتش بيه وانا جاى
أنا: يعنى على ضمانتك
هو:ايوه..ما تخفش
انا:طب لو سمحت اثبتلى ده فى كتيب الصيانه
هو:ليه
أنا:علشان العربيه لو ولعت ححملكم المسئوليه كامله
وفضلنا نناكف فى بعض و فى الأخر كتب: بالكشف على السياره وجد سخونه شديده فى العجل الأمامى وتم فك الكلابر الأماميه وصنفرة التيل وتم تجربة السياره والسياره تحت التجربه.
ومشيت وانا خايف.

مفاجأه رقم 5:
=======
تانى يوم الصبح وانا رايح الشغل جاى بضرب الكلاكس لقيت ما فيش كلاكس .

قلت *** "حذفت الكلمه بواسطتى انا علشان عيب"
وفى نهاية المشوار سمعت صوت تزييئه عاليه لما بدوس على الفرامل و ايضا وانا بسيبها.

طبعا علشان الكلاكس مهم رحت التوكيل بعد ما استئذنت من الشغل ساعه ورحت فرع المعادى وانا رايح فضلت دماغى تودى وتجيب يا ترى حغير ايه؟ ضفيرة ولا كلاكس و لا كبوت ولا.... ؟
ورحت ل م/كريم
هو:طيب اصل دلوقتى الساعه داخله على 5 ممكن تيجى بكره نشوف الكلاكس و تزييئه الفرامل
انا:طب شوفلى الكلاكس دلوقتى علشان مهم
المهم فكوا الشبكه فوجدوا سلك الكلاكس و الفيشه سايحين وغيروهم
أنا : ياترى ..يا هل ترى ايه السبب
هو:عادى
أنا:انا والله ماضربته جامد ولا حاجه
هو:"بيضحك" بسيطه
أنا:طب بكره اجيلك علشان الفرامل
هو:ماشى ..ممكن تكون الصفيحه اللى خلف لقمة التيل وامام بستم الفرامل فيها مشكله او السوست بتاعت التيل مش مظبوطه.
أنا: اه ربنا يسهل... ياريت تثبتلى تصليح الكلاكس فى كتيب الصيانه
هو:ليه
انا:عادى ..عميل دخلكم بعربيته فيها مشكله وانتوا صلحتوها ..ادينى ما يفيد ذلك
هو: ما ينفعش.. ما عندناش ورقه نطلعهالك بكده
أنا: دا من حقى ...اومال انتوا بتدخلوا العربيات حبى كده تصلح و تخرج؟
هو:دى حاجه بسيطه
انا:ولو
هو:مش حينفع
انا:طب ادى العربيه جوه الورشه خليها كده ومش طالع الا لما تدينى الورقه او تثبت فى كتيب الصيانه.
هو:على راحتك
وقفلت العربيه و طلعت وقفت بره الورشه،وكلمت ادارة ابو غالى "نائب المهندس غالى" وقلتلوا
قالى برضه ما ينفعش و مفيش حاجه رسميه عندنا فى سستم عمل الشركه بورقه زى دى
وبعد ساعه لما فقدوا الأمر بأنى حمشى وهمه عايزين يمشوا جالى م/كريم وقال :لو سمحت طلع العربيه و هات كتيب الصيانه اكتبلك فيه اللى انت عايزه
أنا: لأ اكتب الأول وبعدين حطلع العربيه
هو:طيب
وكتب فى كتيب الضمان ومشيت
............
والى القاء فى الحلقات القادمه....قريبا جدا

################################################## #############

المشاركة الأصلية كتبت بواسطة cars_lover

################################################## #############
الجزء الخامس:
-
-
-
-
-

............
والى القاء فى الحلقات القادمه....قريبا جدا

################################################## #############

هو لسة فى كمان
معلهش طلب رخم منى
هل ممكن تعمل SCAN لكتيب الصيانة الاجزاء اللى محددين فيها عملو اية و خاتمين عليها
ارجو الا تتجاهل طلبى

وكل سنة و انت طيب

المشاركة الأصلية كتبت بواسطة شريف

هو لسة فى كمان
معلهش طلب رخم منى
هل ممكن تعمل SCAN لكتيب الصيانة الاجزاء اللى محددين فيها عملو اية و خاتمين عليها
ارجو الا تتجاهل طلبى

وكل سنة و انت طيب

بالضبط ، المفروض تعمل سكان لكتيب الضمان إللي مثبت فيه كل المصايب دي وتبعته للشركة الام مباشرة ، يابيه إنت كده مش سايق عربية إنت سايق كارثة متحركة ، وربنا معاك.

تحياتي

المشاركة الأصلية كتبت بواسطة شريف

هو لسة فى كمان
معلهش طلب رخم منى
هل ممكن تعمل Scan لكتيب الصيانة الاجزاء اللى محددين فيها عملو اية و خاتمين عليها
ارجو الا تتجاهل طلبى

وكل سنة و انت طيب

################################################## ############
وانت طيب وكل اخوتى فى المنتدى طيبين ورمضان كريم.

طبعا قريبا جدا لازم حنشر كل المستندات على الملئ علشان كل الأخوه يشوفوها ...بس انا بستأذنكم علشان أنا مرتبط بكلمه مع صحفى كبير بجريده يوميه بخصوص السبق الصحفى بالنشر.

و أوعدك فى نفس اليوم سأعرض جميع المستندات فى المنتدى ,وابلغكم بأسم الجريده وتاريخ الطبعه.

لأنى لو نشرت حيزعل ويقولى خلاص انت كده نشرتها على النت و يكون موضوع محروق.

ولكن معلش لو ما فيهاش تضييع لوقتك ممكن نتقابل ووريهالك كلها بشكل شخصى انت وكل من يريد من الأخوه فى المنتدى
################################################## ############