##مأساتى مع أبوغالى و سوبارو امبريزا Rk 2008 # هل 2008 غير مصممه لمصر###
%%%%%%%%%%%%%%%%%%%%%%%%%%%%%%%%%%%%%%%%%%%%%%
أنا عندى حكايه واقعيه جدا (للأسف انا مش قادر اصدقها لغاية دلوقتى) مع السياره سوبارو امبريزا 2008 Rk والوكيل المحترم أبوغالى ،وتبدأ منذ أول تعامل مع موزعه الأول عبدالهادى ثم مبيعات أبو غالى حتى الصيانه ومشاكل السياره حتى يومنا هذا .
واقسم بالله انى سأتحرى الدقه فى كل كلمه أكتبها والحمد لله كل كلمه ليها عندى ورقه رسميه تؤيدها.
وعلشان ظروف عملى القاسيه اللى كانت السبب انى لم اشارك فى المنتدى طوال هذه الفتره السابقه ،سوف احكى لكم ما حدث على أجزاء .
الجزء الأول:
بعد تفكير استمر حوالى سنتين فى افضل سياره زيرو من حيث الأمان والقوه ،وبعد البحث و المحص حول السياره المحترمه جدا باجماع الأراء فى مصر و الخارج وعلى هذا المنتدى ،استقريت على سوبارو 2007 (كانت 2008 لسه ما نزلتش) وكان معايا هونداى اكسنت 1300 ، المهم رحت لعبد الهادى اتفرج على 2007 وقابلونى مقابله حلوه اوى ،وعجبتنى العربيه جدا ولكنى فضلت انى أنتظر 2008 لسببين :
1- عدم توافر كامل الفلوس على سعر الهاى لين 2007
2 - أملى فى أن 2008 سوف تكون فيها الايرباج الكامله 8 مش 2 زى 2007 ،علشان انا اهم حاجه عندى الأمان من اللى بشوفوا يوميا على الدائرى من حوادث تشيب.
أول ما عرفت أن 2008 نزلت، رحت لعبد الهادى ما لقيتش غير عربيه واحده لونها أبيض مانيوال ، المهم قولتله أنا عايز الهاى لين الأوتوماتك ال 8 ايرباج وطلبت أشوف الالوان قالى كل الألوان جايه بكره المهم احجز دلوقتى و سوف أعملك تخفيض حوالى 2000 جنيه ،قولتله أنا معايا مبلغ الحجز لكن اللون مهم أشوفه الأول ،امال انا ححجز لون ايه؟
ولما عرف انى معايا عربيه قالى اخودها منك وبعد ما كشف عليها و لقاها فابريكه بره و جوه ادانى سعر اقل من السوق بحوالى 2500 جنيه و ساعتها فهمت انه ناوى يعوض الخصم اللى وعدنى بيه،ولما ناقشته اعترف بذلك فرفضت أنا و قلت أنا حبيعها بره و حديلك فلوسك كاش.
المهم اتفقنا أنه سيتصل بى عند توافر الألوان الأخرى فى خلال يوم أو أتنين لكى احضر وأحجز ثم ابيع سيارتى الهونداى و أجيبلوا باقى الفلوس عند الاستلام.
مر حوالى اسبوع كل يوم اكلمه يقولى بكره وللأسف بعت عربيتى ورحتله مالقيتش أى عربيات قالى انهارده بليل كل الألوان جيه من أبو غالى وسوف يكلمنى غدا.
وفات شهر وانا كل يومين اكلمه و لا جديد (وانا كل هذه المده معاييش عربيه) ،حتى فى يوم كلمته و قالى تعال بكره احجز الألوان كلها جت ،فرحت تانى يوم أنا ومراتى وابنى (علشان افرجهم على العربيه الجديده ) ما لقتش غير اللون الأحمر المانيوال وقالى كله اتباع امبارح،وطبعا أنا زعلت جدا ،ولما لاحظ ذلك قالى هو انت عايز لون ايه ،قلتله برغم انا ما شفتش الوان ياريت الفضى قالى طب انتظر ثوانى.
وعمل نفسه بيتكلم فى التليفون و رجعلى قالى فى عربيه سوده Rk بس سعرها زاد 2000 جنيه علشان الين اليابانى زاد ومش حقدر اديلك الخصم اللى قلتلك عليه قبل كده ، ولو مش عايز الاسود احجز فى الدفعه اللى جايه.
وساعتها عرفت انى بيتنصب عليا فمشيت ،وكلمت ابوغالى روكسى و حكيت اللى حصل قالى مين اللى قالك كده عند عبد الهادى ادينى أسمه بسرعه ،أنا الألوان كلها عندى دلوقتى تعالى شوف وأحجز بالسعر العادى.
رحت لأبو غالىتانى يوم الصبح مالقيتش غير اللون الأبيض المانيوال و قالى كله طلع امبارح ،معلش احجز فى الدفعه الجديده اللى جايه علشان الدفعه القديمه خلصت لكن الدفعه الجديده زادت 2000 جنيه علشان الين اليابانى ارتفع ،والدفعه الجديده جايه كمان اسبوعين.
ساعتها فهمت ان عبد الهادى كان منفضلى علشان ميلتزمش بالخصم اللى وعدنى بيه وكان عايز يبيعلى عربيه فاضله عنده من الدفعه القديمه بزياده 2000 جنيه كمان .
قولتله أنا بقالى شهر و نصف بسبب اللى عمله معايا عبد الهادى و المفروض تحاسبنى على السعر القديم قالى مش حينفع انزل و لا جنيه.
أشتكيت لمدير مبيعات أبوغالى ،وحكيتله على كل اللى حصل و قالى حشوف واكلمك وأتصل بيه وفضل يعتزر على اللى عمله عبد الهادى و ادارة عبد الهادى كمان اتصلت تعتزر، المهم قاللى معلش احجز دلوقتى فى الدفعه الجديده ولكن مش حنقدر ننزل جنيه ،روح لمديرمبيعات فرع روكسى وهو ممكن يعوضهالك بهديه مننا كاعتزار.
ورحت لمدير الفرع أ/أحمد يسرى وبعد مباحثات قالى مش حقدر انزل جنيه لكن ممكن احطلك زينون هديه + عضوية نادى سوبارو (يشمل خصم 25% على المصنعيات ).
المهم وافقت لكن قولتلوا أنا عارف ان الزينون مهم يكون نوع كويس علشان ما تحصلش مصبيه فى كهربة العربيه ،اللى بتركبوه نوعه ايه ؟ ،فرفع سماعة التليفون وكلم مركز الخدمه الرئيسى وقالى Hid المانى ،قلتله كويس بس معلش لو كان حاجه غير كده بلاش و الف شكر على الهديه كانها وصلت ،قالى عيب المانى المانى .
دفعت مبلغ الحجز (10000 جنيه) ،وطلبت منه طلب وحيد وهو بالنص "انا جيت هنا لأبوغالى الوكيل لسوبارو بعد الكلام الفاضى اللى حصل مع عبد الهادى فلو سمحت انا دفعت الحجز هنا فى أبوغالى لو سمحت أنا عايز اخد العربيه منكم انتو مش عايز أتعامل ولا اشوف حد و لا اى ورقه من عبد الهادى " قالى عيب انت بتتعامل دلوقتى مع أبو غالى وكل ورق العربيه حتستلمه مننا و عليه اسمنا.
الاسبوعين امتدوا لشهر واسبوع وفى النهايه اتصل بيه علشان اروح استلم ، روحت لفرع روكسى صباحا و أنا فى قمة الفرح لقيت عربيتى مش موجوده و بعد انتظار دام لخمسه ساعات لقيت اثنين من عبد الهادى جيبين العربيه وبيفرجونى عليها وعايزين بقية الفلوس ومعاه ايصال بباقى المبلغ من عبد الهادى.
ناديت لأحمد يسرى و قلتله احنا متفقناش على كده قالى معلش اصلى انا حاسبها على حصته،قلتلوا ازاى ادفع العربون عند ابوغالى و الباقى لعبد الهادى، قالى مافيهاش حاجه وبعد حوار عنيف لمدة ساعه قالى على العموم لو مش عاجب حضرتك فلوسك معاك و العربيه معانا.
فكلمت مدير المبيعات و بعد محادثات لمدة ساعتين أخيرا وافقوا انى اسدد باقى الثمن (126900 جنيه) فى خزينة ابوغالى واستلمت الايصال منهم والسياره + الزينون متركب لكن لم استلم الأفراج الجمركى و لا ورق العربيه و لا عضويه نادى سوبارو و لا كتالوج اليساره ولا المفتاح الثانى وقالولى سوف تستلمهم بعد يومين ان شاء الله.
اليومين امتدوا لأسبوعين و طبعا علقت نمر تجاريه علشان مركنش العربيه كل الوقت ده (60 جنيه لليوم)
ولما اشتكيت لمدير المبيعات اعتزر واخيرا بعتولى ورق السياره فقط بدون الكتالوج وبدون النسخه الثانيه من المفتاح وبدون عضويه النادى.
المهم أخيرا رخصت
تعليقى على ما سبق هو أن الناس دى درسوا المبيعات والتسويق من وجهة نظر أخرى و هى ازاى تجيب الزبون وتدبسه وتاخد منه أعلى مكسب ممكن،الأضافه الى عدم الألتزام بالوعود والأتفاقات.
################################################## ###########
##مأساتى مع أبوغالى و سوبارو امبريزا Rk 2008 # هل 2008 غير مصممه لمصر###
اقتباس:
المشاركة الأصلية كتبت بواسطة vet mitcho
انا معايا العربية وعاملة دلوقتي 14 الف كيلو امبريزا مانيوال
الصراحة مكنش فيه تاخير في التسليم خالص
اما عن المشاكل فلم تواجهني
وعلى فكرة المساعد الامامي لم يحدث به تغيير هوه هوه القديم
يعني با>ن الله الموضوع حالة فردية لو الخلفي كنت اقلق شوية
ربنا يستر و ميبقاش فيه مفاجات اخري لا تسر
وربنا يباركلك في عربيتك
################################################## ###########
لسه فيه باقى كتير مش حتصدقوه ، والله لولا ظروف شغلى لكتبته كله مره واحده
وفى الأخر احكموا حاله فرديه ولا لأ ، وهل المشكله من ابو غالى ولا العربيه
################################################## ###########
##مأساتى مع أبوغالى و سوبارو امبريزا Rk 2008 # هل 2008 غير مصممه لمصر###
################################################## #############
الجزء الثالث:
حاولت انسى موضوع تغيير المساعد و قولت ايه يعنى ما المرسيدس و البى ام بيحصل فيها حالات زى كده برضه.
المهم جبت جهاز انذار محترم جدا من امريكا بحوالى 2000 جنيه مصرى و كلمت المهندس ايهاب:
أنا:لو سمحت أنا عايز أركب جهاز انذار فى العربيه انا جيبته.
هو: لا...العربيه غير مجهزه لجهاز انذار
انا:العربيه ما فيهاش غير ايموبلايزر فقط علشان متدورش بس،لكن أنا ساكن فى منطقه هادئه جدا وممكن انزل الصبح الاقى الزجاج مكسور و العربيه مسروقه.
هو:ركبه بره على ضمانتك انت ، ولكن ضفيرة العربيه حتخرج بره الضمان
أنا: أنا مش عايز حد يحط ايده فى العربيه غيركم،وبعدين يعنى ايه مش مجهزه دى الهيونداى كل عربيتها غبور بيركبلها انذار، وVW بتركب الجهاز ده وتوكيله فى مصر بيقولكم هو مستعد يقدم أى دعم فنى فى تركيبه.
هو:افرض الانذار بوظ كهربة العربيه
أنا:وافرض الضفيره باظت لوحدها (زى المساعد)،مش ممكن برضه ؟
هو:ممكن.
أنا: ساعتها حتقولى من الانذار؟ على العموم بلاش اللى أنا جايبه هل انتو معتمدين جهاز معين؟
هو: لأ
أنا:طب فى حاجه معتمده من سوبارو؟
هو:حسألك وأرد عليك.
أنا:طب عايز أركب وحدات رفع زجاج وkenwood GM
هو: لا...العربيه غير مجهزه لذلك واحنا مبنركبهمش ممكن تركبهم بره بس كده حنطلع مكن رفع الزجاج والAudio head unit من الضمان
أنا: يا سلام...طب هل انتم بتنصحوا باجهزه معينه؟
هو: لا
أنا:طب سوبارو؟
هو:لأ بس حسألك
وفضلت أتابع الموضوع حتى وصل لأستاذ خالد عماره مدير خدمات ما بعد البيع ، وللأسف قالى نفس الكلام + أن همه كلموا سوبارو الأم وقالت ان العربيه غير مجهزه لتركيب انذار أو وحدات رفع أوGM ولا توجد اجهزه recommended منهم.
بالمناسبه فى واحد هناك مع م/ايهاب يدعى م/تامر كان بيقولى بخصوص جهاز الانذار "مش مشكلتنا احنا ان المنطقه عندك مش safe"
صيانة ال 5000 كم:**********************
روحت المعادى وقابلت المهندس كريم , قولتله:
أنا: عايز اعمل صيانة الخمسه وcheck على الزوايا علشان (تصور) أنا غيرت مساعد.
هو:معلش جهاز ضبط الزوايا عندنا عايز يتعاير، وهو المهندس ايهاب مقالكش انه رجع المساعد لكوالتى سوبارو و قالت المساعد سليم والزيت اللى نزل ده زيت زياده .
أنا:يا راجل..وهمه ليه بيحطوا فيه زيت زياده.
هو: معرفش.
أنا :طب على فكره انتوا بتظبطوا هواء العجل على كام؟
هو: 30 قدام و 28 ورا
أنا:لأ توكيل برجستون ملاه 33 قدام و 32 ورا ،وهمه ورونى الكلام ده مكتوب على القايم بتاع السواق.
هو: يا راجل..ورينى كده.........أه صحيح .........مش مشكله، بس ده احسن للكاوتش فى طرق مصر.
أنا:الشركه المصنعه قالت 33 قدام و 32 ورا أو 33 ورا عند الحمل الكامل وده مكتوب ومرسوم على القايم ومقالوش يختلف من طريق لطريق..............ما علينا
أنا : أنا عندى بعض الملاحظات.
1- من ساعت ما أخذت العربيه وكل ما روح أغسلها ألاقى الجنط الشمال اسود من بودرة التيل و اليمين لأ.
2- لما بفرمل على سرعات منخفضه بلاقى الكاوتش الشمال قدام بيصرخ واليمين لأ
3- لما بهدى وأشيل رجلى من على الفرامل والبنزين والعربيه بتكون على سرعة 40 بلاقى العربيه بتترعش زى رعشه الدواره.
4- عند السرعات العاليه 110-120 لما بدوس فرامل بلاقى رعشه خفيفه فى الدركسيون
5- لما بدخل ملف فى حته مكسره وانا كاسر الدريكسيون شويه بلاقى دبدبه و خبط فى العجل الامامى زي مايكون عفشه مفكوكه
هو:
طب نعمل صيانة الخمسه و نجرب......بس بالنسبه للنقطه 5 فعلا ده عادى ،لان بيبقى فيه صمام امان فى علبه الباور هو اللى بيعمل الصوت ده علشان علبه الباور ماتضربش وده لان عفشه امبريزا 2008 هى نفس عفشه الليجاسى 2004 وده عادى
وبعد الصيانه طلعنا نجرب وقالى كل ده عادى و العربيه زى الفل .
********************************
لاحظوا أن الشكاوى السابقه هى نفس شكاوى الأخ Adel Magdy
اقرئوها على الرابط http://www.nilemotors.net/Nile/showthread.php?t=29110
********************************
المهم كلمت م/ايهاب علشان اعرف ايه اللى حصل بخصوص المساعد (ولأنى نفسى اعرف ان المساعد مكانش بايظ)
أنا: ايه موضوع المساعد اللى بيقولى عليه م/كريم
هو:اة..سوبارو بتقول لما المساعد ينزل زيت ده عادى طالما ان الزيت منزلش من قاعدة السوسته وده بيبقى زيت زياده و عادى.
أنا: طب ما المساعد اللى غيرناه كان الزيت نازل لغاية الدشمه.
هو:اة..المساعد اللى غيرناه فعلا بايظ
ثم قولتله على الملاحظات اللى قولتها ل م/كريم قاللى تبقى تعالى ونشوف .
وفى يوم كنت قريب من جسر السويس رحت ل م/ايهاب
أنا: من ساعت ما أخذت العربيه وكل ما روح أغسلها ألاقى الجنط الشمال اسود من بودرة التيل و اليمين لأ.
هو:ممكن ..أصل السيرفو بتاع الفرامل أقرب للعجله الشمال قدام عن باقى العجل.
أنا: لأ لأ يا باشمهندس أنا بعرف فى الميكانيكا كويس وده مش كلام ميكانيكا
هو : على العموم معنى كلامك ده اننا لما نغير التيل عند 15000 حنلاقى الشمال خلص قبل اليمين
أنا:أيوة ده قصدى ..وده معناة مشكله.
هو:ساعتها يبقى معاك الحق .
أنا:طب. لما بفرمل على سرعات منخفضه بلاقى الكاوتش الشمال قدام بيصرخ واليمين لأ
هو:ممكن ده يبقى زوايا بعد تغيير المساعد.بس للأسف جهاز الزوايا لسه بايظ
أنا:طب .. لما بهدى وأشيل رجلى من على الفرامل والبنزين والعربيه بتكون على سرعة 40 بلاقى العربيه بتترعش زى رعشه الدواره.
هو:أيوه...فى الاوتوماتيك عند حوالى السرعه 40 بيبقى كأن الجير بوكس مش عارف ينزل غيار ولا يثبت على الغيار ده.
أنا: عند السرعات العاليه 110-120 لما بدوس فرامل بلاقى رعشه خفيفه فى الدركسيون.
هو:عادى ممكن تكون الحته اللى كنت ماشى فيها الأسفلت مش كويس.
أنا : لما بطلع على مطب صناعى بسمع صوت تكه عاليه من العفشه قدام
هو:ممكن نربط عفشه دلوقتى
أنا :مهم ربطوها فى صيانه الخمسه
هو:على فكره ياباشمهندس انت حساس جدا للعربيه وودنك معاها.
أنا : طبعا ,انا كمان غاوى ميكانيكا.
ثم رفعنا العربيه نشوف المساعدين لقينا **********المساعد الأمامى شمال معرق زيت*********** فقالى عادى عادى ده تعريق بس
ومشيت
وبعد أسابيع لاحظت أن الرعشه فى الدريكسيون وأنا بدوس فرامل زادت حتى على سرعات أقل فكلمت م/ايهاب فقال:
*************************
تبقى تعالى ،وممكن نقيس الطنابير الأول ولو كانت محتاجه خرط نخرطهم و تروح الرعشه، لأن ده غالبا بسبب الطنابير.**************************
طبعا انا سمعت طنابير كان حيجيللى سكته قلبيه .وقفلت معاه..........................
أنتظروا المفاجأت العجيبه فى الجزء القادم
################################################## #############