وعليك يا كبير,,
ربنا يخليك.
عرض للطباعة
السلام عليكم
انا روحت التوكيل امبارح بأمانه شويه حمير اخرهم يعملوا الصيانه العاديه اي حاجه تانيه انسى....المهم بعد انتظار اربع ساعات للعربيه عندهم روحت قلت للمهندس هيا خلصت قالي لا دي سليمه قولتله شوفت الزيت بتاع الفتيس قالي طب هبصلك عليه....شافه وجه قالي دا محروق خالص وهنغيره لو ظبطت يبقى الزيت هوا السبب لو مظبطش يبقى فالفات...قولتله ماشي ...طبعا زيت مع الفلتر مع المصنعيه 1350 جنيه ومشيت الحمد لله...مش عارف كدا بقى هوا السبب الزيت ولا ممكن تظهر المشكله تاني الله اعلم.....بس المهندس هناك قالي لو الفالفات بايظه مش هتحس بالزيت الجديد وهتدي ايرور ع طول...فايه رأيكوا؟؟
وعليكم السلام,
ودا كان المتوقع منهم انهم زي مانت قلت عليهم,,
عشان أنهم واضح انهم مكشفوش عليها اول مرة, لما جه وقالك انها سليمة,, وانت قلت له شوف الزيت.!
ربنا يسامحهم ,
وتعليقاً علي اخر جزئية المفروض لو الڤالڤات بايظة, هتخلف وتغربل الضغوط وهتدي أيرور.
دا المفروض بس مش شرط انها تدي دايماً أيرور,
بس انت المهم دلوقتي انك غيرت الزيت, ودي البداية الصح لعلاج المشكلة,
لان اي زيت في العمر دا في الغالب بينزل محروق وبيكون فقد لزوجته ومش بيتحمل الحرارة وبيكون السبب الرئيسي في مشاكل الفتيس واختلاف الضغوط.
واللي عليك دلوقتي انك تسوق عادي الفترة دي ومتقرصش عليه يعني علي مهلك ومتحرقش عليها,
وتشوف غيار الزيت دا هيفرق معاها في الاسبوع اللي جاي دا ولا لأ.
لو مفرقش نبدأ نكشف عال ڤالڤات.
لأن مينفعش تبدأ حل وتشخيص مشكلتك بتغير ڤالڤات وانت الزيت عندك فاقد لزوجته ومحروق.
ومفيش حاجة اسمها الڤالڤات بايظة ومش هتحس بالزيت, وألا مكنتش العربية مشيت بيك لما غيرت لها زيت وطلعت بيها من عندهم ونقلت غيارات بشكل طبيعي,
بصراحة لا تعليق عال هري اللي بيتقال. وحاجة مؤسفة في نفس الوقت ان الكلام دا من توكيل او مركز خدمة!
اقولك انا ع كلامه بالظبط ....قالي اني الفالفات دي بتكون مشحونه الكترومغناتيك ولو الزيت فيه مشكله او رايش مثلا هيبوظ الشحنة بتاعت الفالفات وساعتها مش هتحس بلزوجة الزيت والزيت الحروق كان بالنسبالها تقيل فلما نغير الزيت ونحط جديد بيكون خفيف فلو بايظه مش هتحس ان فيه زيت اصلا وتدي ايرور...........
دا الي اتقالي تقريبا وطبعا انا واقف لا واثق فيه ولا حاسس انه فاهم حاجه ...بطيخه ع رأيك...اشتريت منه وقولت الزيت كدا كدا لازم يتغير طلعت فلفات مطلعتش فالفات فأغيره عشان ميكملش ع بقيت الفتيس ...دا بعيدا عن هوا فاهم ولا مش فاهم بقى فمش هيضرني يعني
سؤال كمان معلش....هوا كان مفروض يحط حاجه ينظف بيها الفالفات ولا مينفعش؟؟
أحب أشارك ببعض معلومات بسيطة عن الموضوع لو سمحتولى....بداية البادى فالف هى نقدر نشبهها بمخ الجيربوكس....هى اللى بتتحكم فى الضغوط و مسارات الزيت علشان تدى النقلة المضبوطة على حسب معطيات كتير جدا من كذا منطقة أهمها الكنترول يونيت بتاعت الفتيس.
السائل الأساسى اللى بينضغط علشان ينقل النقلات و فى نفس الوقت بيبرد وحدة الجيربوكس كلها هو الزيت.....إذا لزوجته و كميته و نوعه شىء فى منتهى الأهمية....تغييره الدورى لا يخضع لمقياس معين...طبعا فى حد أقصى مش لازم أعديه و لكن على حسب ظروف سواقتى (نقلات كتير و زحمة و درجات حرارة مرتفعة و و...) يفضل تغييره كمان أسرع من المفروض و ذلك لحماية الجيربوكس كله...
فكرة أن موديلات 2008 كان فيها مشاكل و موديلات الفانتازيا مفهاش أو قلت أعتقد فكرة مش سليمة قوى و ذلك لأن ده مش عيب فى الفتيس ذات نفسه و أتصلح فى الموديلات الحديثة و لا هو عيب فى السكودا..لأ ده عيب صيانة دورية للفتيس....موديلات 2010 إبتدت دلوقتى تعمل حوالى 45000 كم و أنت طالع و ده ميعاد تغيير زيت الفتيس....أى حد مش هياخد باله أو هيتأخر أو عامل كم عالى أو سواقته كلها فى ظروف صعبة هتلاقى عنده هذه المشكلة....نصيحة لأى حد عامل فى حدود 45000 و أنت طالع أنو يغير زيت فتيس على طول....بعد سنة من الأن هنلاقى شكاوى كتير من مالكى فانتازيا 2011 و هكذا......المفروض 50000 كم هو الحد الأقصى لتغيير الزيت فى ظروف بلدنا (30000 miles)
أى عيب فى لزوجة الزيت أو كميته أو نوعه....مع طبعا الحر و الزحمة الشديدة فى بلدنا بيؤدى إلى مشاكل فى التزييت، مشاكل فى الضغوط لأن كله مبنى على لزوجة معينه و خواص معينه للزيت ( الضغط مع درجة الحرارة)....الموضوع بيبتدى بنتشة أو تعليقات و هنا يجب الأسراع فوراً و على طول بتغيير الزيت بزيت أصلى جيد و ذلك لتلافى أى عيب أكبر يمكن حدوثه لا قدر الله....
لو الموضوع ده متمش بسرعة رهيبة و نتيجة لسؤ التليين من الزيت و الإحتكاك بين القطع المعدن ممكن يحدث رايش معدن بسيط يؤدى إلى أذى فى البادى فالف نفسه....و فى هذه اللحظة و جب تغيير بادى فالف كامل لأنه غير قابل للإصلاح....السعر فعلا فى حدود 14000 مصرى فى توكيل سكودا....
وشعورك ايه بعد ما حضرتك ختها من التوكيل واحساسك بالفتيس بعد تغير الزيت ايه اعتقد ان في الأغلب تم علاج المشكله ولا يوجد نتشه في الوقت الحالي ان شاء الله وخاصه ان الزيت القديم نازل محروق ولكن هل تم سؤال الفني ما اذا كان الزيت ناقص كمان ام لا
تحياتي