استاذ mimi83
برجاء مراجعة السعر لأنه فعلاً مبالغ فيه للأسباب التالية:
(1) حضرتك طالب 110,000 في العربية بالرغم من ان الـ EX بتاعتها دلوقتي زيرو بـ 97,000 (ده بعد زيادة الأسعار لأنها كانت بـ 93,000 جنيه)
(2) اللي هايخدها هيدفع 110,000 + حوالي 2,000 مصاريف شهر عقاري + حوالي 3,000 جنيه كاوتش وبطارية لأن الكاوتش ما ينفعش يمشي اكتر من 3 سنين بعد تاريخ انتاجه يعني الاجمالي هيتدفع حوالي 115,000
(3) العربية واضح ان حضرتك شاريها شهر 5 - 2011 يعني شهر 5 - 2014 اللي جاي (يعني بعد حوالي 7 شهور) هتخرج برة الضمان (وضمان العربية بيغطي اعطال وتلفيات كتير)
(4) كوبونات خضم السبع بيكون 20 كوبون × 50 جنيه خصم لكل صيانة 5000 دورية (مش 50% خصم زي ما حضرتك كاتب)
(5) بغض النظر عن اسعار البيكانتو والفيرنا والكوري معروف ان اسعار الصني اقل وكمان المقارنة تكون بصني مش بكوري
أنا آسف انا عارف ان كلامي ممكن يكون ضايقك وعارف انك من جواك بتقول (وهو ماله) بس انت حاطط اعلان في منتدى يعنى من حق اللي عاوز يعلق يقول رأيه
نصيحة حاول تنزل سعرها شوية وممكن تعمل اعلان على كونتاكت وتحط صور ليها هتتباع أسعر ان شاء الله
ويارب ربنا يوفقك وتبيعها بأغلى ما انت عايز
المفضلات