اقتباس المشاركة الأصلية كتبت بواسطة rameahmed مشاهدة المشاركة
السلام عليكم
انا الصبح قبل مروح الشغل فتحت الكبوت لقيته كله شحم اسود و اكن في حاجه انفجرت فيه فببص لقيت في كاوتشه مقطوعه و منزله شحم و زيت اسود فروحت سألت واحد كان وافف قلي دي كاوتشة الكوبلن الشمال اتقطعت فانا صورتها بالموبايل بتاعي عشان عاوز اعرف هي ايه ده و اسمها ايه و هل موجوده في شارع دمشق و لو حد يعرف هل الميكانيكي ممكن يركبها ولا اركبها فين و ياريت لو حد يعرف سعرها كام و مصنعبة تركيبها كام و معلش طولت عليكم و جزاكم الله كل خير و معلش انا ماشي علي العربيه و هي كده فهل ده في مشكله و لا اركنها لغايت مركب الكاوتشه ده
كاوتشة الكوبلن بتبقى بحوالى 15 جنيه عند اى محل قطع غيار سوزوكى و يفضل تعملها فى اقرب وقت علشان الكوبلن ميبوظش من الاتربة و اللى بيغيرها الميكانيكى او العفشجى و ان كان يفضل الميكانيكى لأنها شغلانه بسيطة و متنساش تشترى 2 افيز بلاستيك علشان يربط بيهم الكاوتشة و المصنعية حوالى 20 جنيه و تقوله يخرج الكوبلن برا و يغسل بلى الكوبلن بالجاز مطرح ما الكوتشة اتقطعت للتخلص من اى اتربة ممكن تكون دخلت جوا و ينشفه كويس بمسدس الهواء و يكبسه شحم (يفضل تشترى علبة شحم نوعية نظيفة تستحمل الحرارة و تخليه يستخدمه و تاخد العلبة و انتا ماشى و تخليها معاك لأى استخدام مستقبلا) و هتحتاج بعد ما تخلص الحوار دا تعمل ظبط زوايا لأنه هيفك الشمعدان بالكامل علشان يخرج الكوبلن و دا ممكن يخلف زوايا علبة الدركسيون


من خلال تجاربى مع انقطاع كاوتشة الكوبلن اقدر اقولك حاااااااااول تجيب كاوتشة كوبلن تكون الخامة بتاعتها نظيفة لأن معظم اللى فى الاسواق كنت بركبها تقعد سنة و تتقطع تانى
و انصح كل الناس بالكشف الدورى بالنظر على الاربعة كاوتشات بتاعة الكوبلن (داخلى و خارجى يمين و شمال) و الكاوتشتين البيانو بتوع علبة الدركسيون لأنك كدا هتفادى تلف البلى بتاع الكوبلن او علبة الدركسيون

بالتوفيق و ابقى انقلنا تجربتك