اعمل عمرة ولا اشتري موتور جديد ؟ نصر 127

**ahmed wahab** · 04-09-2013 12:16 AM

سلام عليكم

اولا انا دورت على النت بس ملقيتش الجواب اللي يريحني :d

اخش في الموضوع حاليا الموتور جاب شنبر " الدخان الابيض "

انا ماشي بيها كده و كنت ناوي اعمل عمره بس قلت اخد رأي ناس كانت في نفس موقفي

فعايز رأي الناس اعمل عمرة ولا اغير الموتور ؟

و ايه عيوب و مميزات كل حاجه ؟

مع العلم اني لسه مجدد الرخصه :d

**zastaffa** · 04-09-2013 02:00 AM

ماتور أستيراد بيعمله في حدود 1600 جنيه غير مصاريف النقل والميكانيكي اللي حايروح معاك ومصنعية الفك والتركيب ناهينا طبعا عن موال الرشاوي والأكراميات وحق الشاي في المرور لأثباته ع الرخصة
يبقي تعالي كدا تاني نحسب مع بعضينا واحدة واحدة
ماتور 1600ج
مصاريف مرواح الميكانيكي معاك ومصنعية فك القديم وتسقيط الجديد قول كله 200ج
مصاريف نقل الماتور علي عربية سوزوكي من المحل اللي هاتشتريه منه لحد ورشة الميكانيكي قول 50ج
رشاوي وأكراميات وحق شاي وتفتيح دماغ في المرور عشان تثبته ع الرخصة قول 200ج بالميت
يبقي المجموع كله 2050جندي وفي الأخر هاقولك برضوا بطيخة مقفولة ومش عارف اللي فيها أيه وممكن بعد 6شهور أو سنة ع الأكتر يحتاج طقم شنبر أو يطلع محتاج سبيكة زي ماتور عربيتي أل128 اللي أشتريتها من 7شهور وساعتها ماحدش هايعرفك لا اللي باعهولك ولا حتي اللي ركبهولك
تعالي بأه نشوف العمرة الكاملة بقطع غيار جديدة زيرو وأنت اللي هاتنقيها علي مزاجك هاتتكلف كام:::
طقم بستم بولندي 320 جنيه
طقم شنبر كوفاب برازيلي((الكل بيشكر فيه برغم وجود شنابر ألماني وياباني أغلي منه)) 100جنيه
طقم سبيكة كرنك 100ج
طقم جلب كامة 75جنيه
كاتينة كاملة 75جنيه
طرنبة زيت 175جنيه
طرنبة ميه 140جنيه
طرنبة بنزين75جنيه
طقم صبابات فيرا أيطالي 140جنيه
دسك وأسطوانة وبلية 230جنيه
طقم جوانات 75جنيه
خراطة 400ج
مصنعية ميكانيكي400ج
مصاريف نثرية زيت ماتور بعد التليين وبنزين تليين وخراطيم بنزين وكوليهات وسليكون وجملكة وأبلاتين وكوندنسر وبوجيهات قول 300جنيه
يعني المجموع 2600جنيه بس دا طبعا علي أعتبار أن ماتورك خلصان وضايع ومافيهوش أي حاجة سليمة
يبقي تجيب ماتور أستيراد مش مضمون ب2000ج وبييجي كمان من غير طقم الدبرياج بتاعه ولا تقرص علي نفسك شوية وتكمل 500جنيه وتاخد ماتور متأسس كله جديد في جديد ومتربي علي أيدك وتنساه لحد ماتبيع العربية؟؟!!! الحكم ليك
ملحوظة::الأسعار ديه تقريبية من 10شهور بس لما جيت أعمل عمرة لل127 قبل مابيعها

**ahmed wahab** · 05-09-2013 12:28 AM

اولا شكرا ليك جدا " ............d " انا كنت مقلق من موضوع اني اجيب الموتور بس اول ما قريت التراخيص و تفتيح الدماغ قلت شكرا المرور بتاع فيصل اسوأ مرور يعني دا مش تفتيح دماغ بس دا احنا فنفتح كتير :d

بالنسبه لقطع الغيار هجبها كلها ؟ ولا انت بتقول على اسوء ظروف ؟

معلش اعذرني لاني لسه جديد في الموضوع دا :)

**zastaffa** · 05-09-2013 02:30 AM

خلينا نتفق الأول يابرنس أنك لازم تعمر عند ميكانيكي أمين وثقة عشان مايشتغلكش ويخليك تجيب حاجات مالهاش لازمة....أنا كنت بفترض معاك علي أسوء الظروف أن الماتور ضايع بالكامل ودا طبعا مستبعد الي حد كبير
عشان كدا لما الميكانيكي هاييجي يفتحه ويشوف اللي فيه هايقولك ع الحاجات اللي محتاجها....وأنت بكياسة وشياكة كدا قوله ياسطي أنا مش عاوز أتعبك وهانزل أجيب الحاجة بنفسي عشان معطلكش عن ورشتك....بمرونة كدا وبسلاسة خليه يكتبلك الحاجة اللي هوا محتاجها والخيارات جنبها سواء مثلا أيطالي أو تركي أو بولندي أو أو....وممكن يقوم قايلك وديه للخراط وهوا هايقولك محتاج أيه....برضوا الخراط هايكتبلك ع الحاجة والمقاسات وحاول تاخد وتدي معاه في الكلام عن الأنواع البديلة المناسبة لو مثلا قالك علي حاجة أيطالي..تقوم مفترض جدلا معاه أنك مش لاقيها وتسأله طب أجيب أيه بدل الأيطالي؟؟؟طب ينفع التركي؟؟؟طب ينفع البولندي؟؟؟ طب أنهي أحسن من وجهة نظرك...كدا يعني
وبعد كدا هاترجع للخراط بالحاجة اللي أنت جايبها وهوا هايظبط مقاسات الخراطة عليها وهاتروحله بعد يومين تلاته تاخد ماتورك في تاكسي وترجع للميكانيكي بعد كدا تبتدي تتناقش معاه في طقم الشنبر وطرنبة الزيت وباقي لوازم الماتور اللي محتاجه تغيير أو ممكن تكمل بيها في العمرة الجديدة
معلش أنت هايطلع عينك شوية كعب داير مابين الميكانيكي والخراط وشارع زكي في التوفيقية بس أستحمل شوية وخلي كل حاجة تتم علي أيدك وأدام عينك خطوة بخطوة....وماتعملش بيه وتسيبله العربية وتقوله عاوز أخدها ع المفتاح
مرة تانية لازم الميكانيكي يكون معرفة وثقة ناهينا طبعا عن كونة شاطر وهوا اللي هايرشدك عن الخراط اللي بيفضل يتعامل معاه

**hugan** · 05-09-2013 02:41 AM

اهم حاجه في العمره المكيانيكي يكون نضيف
هو والخراط بتاعه
لو مش واثق انك عندك ميكانيكي شاطر وامين
خليك في الموتور استيراد

**ahmed wahab** · 07-09-2013 03:11 AM

سؤال اخير
فنرة العمرة بفرض انها عمره كامله
بتاخد اد ايه اسبوع اسبوعين ... ؟؟

**عمرو خليفة** · 13-09-2013 07:22 PM

السلام عليكم
ا / احمد
حضرتك عاملت عمرة الماتور ولا لسه
انا عندى نفس المشكلة و نفس الموديل
و محتار بين الاستيراد و العمرة
ارجو الافادة
شكرا

**ahmed wahab** · 23-09-2013 03:46 AM

المشاركة الأصلية كتبت بواسطة عمرو خليفة

السلام عليكم
ا / احمد
حضرتك عاملت عمرة الماتور ولا لسه
انا عندى نفس المشكلة و نفس الموديل
و محتار بين الاستيراد و العمرة
ارجو الافادة
شكرا

اسف على التأخير في الرد
هوا الموضوع اتأخر شوية عشان الميكانيكي جاله كذا ظرف ورا بعضه
الموتور الحمد لله خلصان و كان النهارده بيركبله الجوانات و الكلام دا و ناقصلي بس بدور على امكانية اني احط خامس في العربية عشان المكنه تستريح

بالنسبه للاستيراد و العمره

اما كلمته قالي اللي يقدر يحدد الكلام دا الميكانيكي نفسه و يفتح الموتور و يشوف و طبعا يكون حد كويس عشان ميغشكش
لو الموتور بايظ خالص هتلاقيه يقولك هات موتور جديد احسن بدل ما يدفعك فلوس على الفاضي في موتور بايظ

مشكلة الاستيراد انه مش عارف ايه اللي جوا الموتور و ممكن يكون موتور مستهلك و طالع عين اللي جابوه بس من برا شكله كويس
و بردو موضوع الورق و بصمة الموتور و الحوار بتاع المرور

فانت الاول شوف ميكانيكي كويس و امين و هوا اللي يجبلك الزتونه