الموضوع: تجربتي مع طناني باشا

انا بقي حكايتي حكاية

انا معايا عربية فيكترا بي موديل 96 اوتوماتيك 2000 سي سي العربية من اول ما اشتريتها وهية بترشح زيت من تحت وترشيح كتير مش قليل وكمان حاسس انها مكتومة في الجري ولما روحت الحرفيين من اسبوعين كدة عشان اغير العفشة وعديت علي احمد مكاوي بتاع الاوبل عشان اغير قواعد الموتور وشداد الموتور وكدة وسالته علي موضوع الزيت قالي لا ياباشا انت لازم تجيلي من اول اليوم عشان بنفك المكنة كلها برة العربية لان ده اولسيه الكرنك ومكانه رخم وسالته علي المصنعية قالي 250 جنيه

مشيت من عنده وانا مقتنع ان كلامه صح . المهم جيت اخر الاسبوع اللي فات نويت اغير الاولسيه ده وقلت انزل مصر السبت اغيره لان انا من السويس وبصراحة كنت محتاااار جدا لاخر لحظة اني اروح لمركز طناني ولا اروح الحرفيين .
المهم جيت يوم السبت واتكلت علي الله وروحت لطناني في المركز علي الساعة 10 الصبح وطبعا الباشا ماكانش لسة وصل :) صاحب المكان بقي هههههههه
لقيت هناك م/ احمد و م / شريف وماقدرش اقولكوا استقبلوني ازاي والله استقبال فوق الوصف لدرجة اني والله العظيم حسيت اني صاحب المكان مش مجرد زبون وماشي وعندهم صنايعية محترمين جدا وفاهمين وراحوا رفعوا العربية ولقوا ان عيب تسريب الزيت من اولسيه الكرنك واولسيه الكامة وحلوا الاولسيهات وم / شريف اصر انه يوصلني بعربيته لحد بتوع قطع الغيار اللي في صقر قريش لحد ما الواحد بقي في نص هدومه من ذوقه واحترامه وروحت اشتريت

اولسيه كرنك 45 جنيه
اولسيه كامة 45 جنيه
وش تقسيمة امامي وخلفي 240 جنيه
غطاة تانك البنزين الخارجي 110 جنيه

ورجعنا تاني علي المركز لقيت طناني وصل والناس غيرتي الحاجات دي كلها وكمان الفتيس كان محتاج فبرة طناني باشا عملهالي في لحظة واتضح ان موضوع كتمة العربية سببه ان سير الكاتينة الصنايعي اللي مركبه كان خالف تقسيمة في الموتور والحمدلله السحب بقي تمام ونيجي بقي للمصنعية والله والله والله الناس دي محترمة وحتي وقت الحساب مارضيش يحاسبني وقالي 200 جنيه واللي انت عاوز تدفعه ادفعه يا احمد لان احنا اخوات
وبصراحة انا كنت متخيل ان الحوار ده هيتكلف اكتر من كدة وحسيت ان المبلغ ده كويس جدا ومش مبالغ فيه خالص لان الناس فضلت شغالة في العربية من 10ونص الصبح لحد الساعة 4 العصر

من الاخر كدة مركز اوتو ماستر ده خلال سنة هيسمع جامد جدا في القاهرة ومش هيلاحق علي الشغل وبكرة افكركوا بالكلام ده وملوووووووون تحية لمحمد طناني