ايه احسن شركة تامين؟؟

**A_Mando** · 06-09-2008 11:02 PM

مساء الخير

كل سنة و انتم طيبين و رمضان كريم:).

انا كنت بستفسر ايه احسن شركة تامين من ناحية قيمة التامين و كمان الى بخده منها مقابل ده يعنى تامين شامل و لحد اد ايه ممكن يدفعوا لقدر الله فى حالة الحوادث .. يعنى كل التفاصيل الى متعلقة بالموضوع ده معلش اصلى اول مرة اشترى عربية و اءمن عليها مع العلم انى هاشترى كاش ان شاء الله .. و جزاكم الله كل خير.

**A_Mando** · 07-09-2008 03:56 PM

بجد مش مصدقة ان ما فيش حد عايز يساعدنى !!!!!!!!!

**R A N A** · 07-09-2008 04:13 PM

بصي ياستي هي المسألة مش مسألة ان مفيش حد عايز يساعدك ولا حاجة بالعكس الناس هنا كلهم متعاونين جدا وعمرهم مابخلوا علي اي حد بإجابة سؤال بس تلاقيهم مش فاضيين عشان رمضان او وراهم مشاغل يعني نعذرهم شوية.
بالنسة ليا برده انا كنت بسأل عن الموضوع ده وجه كتير في بالي مع اني لسة مشترتش زيرو بس بفكر يعني بس سمعت ان شركة كونتاكت كارز تأمينهم محترم اوي بس غالي شوية تقريبا نسبة 4.25% ل 4.5% من تمن العربية عشان مميزاته اكتر طبعا ولو حضرتك عملتي بحث في المنتدي عن التأمين هاتلاقي ناس كتير جربت التعامل وبتحكي تجاربها مع الشركات دي وتقدري تحكمي بنفسك وتختاري.
بالنسبة للتأمين بتاع كونتاكنت لو محتاجة تعرفي تفاصيل اكتر عنه انا بعتلك لينك الموقع علي الخاص عشان مينفعش اكتبه في العام هنا عشان قواعد المنتدي.

**amir** · 07-09-2008 04:25 PM

طيب
عند سمير الريان بتوع التامين بيتكلمو في 2.25 % في مقابل ان العربيه لو لتخبطت بروح اسيبهالهم و في ظرف اسبوع تكون اتصلحت و طبعا دي الجمعيه المصريه ايه رأيكو؟

**tutankhamoun** · 07-09-2008 07:05 PM

المشاركة الأصلية كتبت بواسطة amir

طيب
عند سمير الريان بتوع التامين بيتكلمو في 2.25 % في مقابل ان العربيه لو لتخبطت بروح اسيبهالهم و في ظرف اسبوع تكون اتصلحت و طبعا دي الجمعيه المصريه ايه رأيكو؟

نفس الكلام قيل لي في عز العرب عند تأمين سيارتي
و لكني اﻵن و بعد قصة الأستا ذ حسين المحزنة مع الجمعية المصرية للتأمين و عز العرب
لا أثق في هذا الكلام إطلاقا و الجمعية المصرية دي الكل بيذم فيها و محدش شكر فيها خالص
و ربنا يستر طريقنا يارب

**amir** · 08-09-2008 03:38 AM

المشاركة الأصلية كتبت بواسطة tutankhamoun

نفس الكلام قيل لي في عز العرب عند تأمين سيارتي
و لكني اﻵن و بعد قصة الأستا ذ حسين المحزنة مع الجمعية المصرية للتأمين و عز العرب
لا أثق في هذا الكلام إطلاقا و الجمعية المصرية دي الكل بيذم فيها و محدش شكر فيها خالص
و ربنا يستر طريقنا يارب

طيب و ايه الحل يا اخ توت
الجمعيه المصريه تعتبر ارخص بديل في مقابل سوء و بطء خدماتهم عند الحاجه اليها
الباقي زي كونتكت و اللينز اسعارهم فلكيه بالمقارنه معاها ( اظن 1.5% الجمعيه و الباقي تتراوح من 3% الي 4% تقريبا)
مش عارف بس مش مطمن و انا ماشي في وسط سواقين ميكروباص يحلو طبليه عشماوي في عينيك ده غير انصاف السائقين و الانهيار التام في قواعد المرور كل ده مخلي كل مشوار ليا قلق, انا عايز ائمن علشان لا قدر الله حصلت حادثه الاقي المساعده