الموضوع: الشاهين والشكمان وعلبة البيئة !!!!

حكايتى مع الشكمان

لما اشتريت العربية من 3 سنوات كان الشكمان اللى فيها متبهدل ومش قد كده
والعلبة اللى فى النص كانت فى الضياع غيرتها بعلبة استثمارى من عند الورشة اللى أخونا محمد القاضى قال عليها ... بعدها بشويه العلبة الأخيرة باظت وغيرت العلبة الاخيرة بالأس وجبت اغلى علبه وهى بتاعت ابو اليزيد شوية والمشترك باظ غيرته هوه كمان ... كده الشكمان بقى جديد كله من أوله لأخره وقولت خلاص كده هرتاح بقى من قصة الشكمان كام سنة ... والشاب صاحب ورشة الشكمانات اللى فى حسن رضوان شاف علبه البيئة قالى العلبة عندك زيرو هوه انت مبتمشيش بالعربية ولا ايه ... كان عداد العربية ايامها 20000 كم
بعد كام شهر معملتش فيهم 3000 كم الماسورة اللى واصلة بين علبة النص وعلبة البيئة اتشرخت بسبب المطبات المهببه اللى فى شوارعنا واتلحمت كذا مرة ولازم تتغير
روحت للورشة اللى ف حسن رضوان قالى انا ببيع علبة النص بالماسورة .. لو عاوز ماسورة بس روح لأى محل تانى بيفصلها
روحت لورشة تانية عندنا فى البلد وفصلى الماسورة وركبها وفوجئت ان علبة النص اللى المفروض جديده باظت خالص وانفصلت عن الماسورة اللى راكبه فيها !!!
غيرتها تانى واكتشفت انه حطلى علبة بيجو مش شاهين وهو بيغيرها قالى العلبة الاخيره كمان باظت ... قولتله ازاى ياعم ده انا ممشيتش بيها 5000 كم على بعض وديه ابو اليزيد .... المهم لحمها ومشى الحال
ماشى فى امان الله جت طوبة خبطت فى علبة البيئة ولاقيت بعدها صوت الشكمان مش طبيعى روحت للورشة اللى فى البلد قالى لازم تقطع الوصلة ديه بين المشترك وعلبة البيئة ونوصلهم ببعض مباشرة



قولتله ازاى كده علبة البيئة ممكن تبوظ قالى مش هتبوظ وكده احسن ولو معملتش كده كل يوم هتقرفك وهتلاقى تنفيس من المنطقة ديه
مكنتش فاضى ومكنتش رايق قولتله ماشى
قطع الجزء اللى فى الصورة ووصل مباشرة وللأسف بعدها المشترك اتهرى بسبب المطبات واللحامات
من اسبوعين العلبة الاخيرة جابت اخرها وسابت خالص المهم روحت لصمتها عند بتاع الشكمان

فى اقل من سنتين وفى مسافة 10000 كم مقطوعة بالعربية الشكمان دلوقتى بقى حالته يرثى له ومحتاج يتغير بالكامل من أول المشترك الى العلبة الأخيرة
روحت إمبارح للورشة اللى فى حسن رضوان قابلت الشاب الكلامنجى صاحب الورشة
قالى العلبة الاخيرة بايظة ... بكام ياعم قالى بـ 140 جنيه العلبة بالأس
طيب العلبة ديه ابو اليزيد قالى لا ديه استثمارى أبو اليزيد بـ 150 جنيه
جه الصنايعيى اللى بيشتغل عنده بص على الشكمان قالى الشكمان كله عاوز يتغير
قولت لصاحب الورشة الشكمان كله بكام قالى 350 جنيه أو 380 جنيه مش فاكر
وقالى هنلغى علبة البيئة
قولتله ليه كده ده العلبة جديده
قالى علشان الوصلة اللى مقطوعه قولتله الوصلة معايا ممكن نلحمها تانى
قالى اللحامات اصلا بتبوظ علبة البيئة وهيبقى عك وهتنفس منك ولازم علبة البيئة تتلغى
قولتله طيب استنى عليا شوية وبلاش نشتغل فيها دلوقتى

مشيت زعلان قوى على علبة البيئة واللى جرالها وهى لسه فى عز شبابها
ايه رأيكم ألغى علبة البيئة ولا فيه حل ؟
وايه سبب تلف الشكمان كله فى زمن قياسى كده ؟
أنا فى الـ 3 سنوات عملت 20 ألف كم
ومشاويرى كلها يوميه وصغيره ومتكررة بيقولوا الميه اللى بتتتخزن هى السبب
تنصحونى بإيه