الموضوع: اسعار بعض قطع غيار سيراتو ٢٠١٤ من الوكيل

طيب بعيدا عن قطع الغيار انا عايز تفسير منطقى يقوللى ليه عربية كوري في الفئة المتوسطة اللى هى السيراتو سعرها الفاضية مانيوال ! بـ 150 الف جنيه ! ولا حتى 140 الف ليه ! حتى لو الدولار بقى بـ 10 جنيه ماهو مش مبرر برضه

ايه المميزات الخزعبلية اللى فيها ، وانا هنا بتكلم عن المانيوال الفاضية ، يعنى حتى مفيش مجال يضحكوا عليك بالفوانيس الليدات وزرار ستارت ستوب و الحساسات و البلوتوث و الهجايص دى

150 ولا 140 الف في عربية كوري مانيوال فاضية فئة متوسطة ، يالهوى الطم :d
ده مفيهاش ايه بي اس حتى ، ولا فيها مرايات ضم :d يدوبك الايموبلايزر ، ومن النوع اللى بيتضرب بالكي جينيوريتور كمان :d


يعنى لا جنوط سبور (بتنزل بجنوط حديد 15)
ولا وسائل امان ( ولا حتى ايرباج واحدة ولا اي نظام للفرامل)
ولا رفاهية ( لا مرايات ضم ولا طارة مالتى ولا اوتو داون في فتح الازاز ، ولابلوتوث ولا حساسات ولا كاميرا و لا مثبت سرعة ولا طارة جلد ولا فرش جلد )
كل الموضوع فتيس 6 سررعات مانيوال وموتور بيقولوا (كالعادة زي ما اتعودنا انهم يقولوا ) 130 حصان ..

مش هتكلم عن الثبات والهاندلينج لان هى اولا كوري ، ثانيا انا مجربتهاش ، ودى حاجة لازم الواحد يجربها بنفسه عشان يحكم عليها ..


هل توكيل كيا هنا بيستعبط الزبون و بيبيع له مجرد شكل ؟
بيبيع ايه يعنى ، الماركة العريقة المحترمة اللى اسمها لوحده يندفع فيه فلوس ! يا جدعان ده كيا دى كانت لسة اول امبارح العصفورة والسيفيا ، بلاش افورة بقى


كل واحد حر في فلوسه طبعا وياريت كل ملاك السيراتو القديمة والجديدة ما يزعلوش من وجهة نظري
بس انا ما زلت شايف ان دفع 140 الف في عربية فاضية كوري مانيوال لمجرد انها هتنتشر وهتمسك سعر و شكلها حلو ، ماهو الا السفه بعينه ، حتى اسطورة رخص قطع الغيار اتحطمت ( ويقولك انت عايز عربية بـ 150 الف يبقى قطع غيارها ازاى يعنى )

فكرنى بالنكتة بتاعت اللى مش عارف يبيع عربيته ، وصاحبه قال له حط عليها علامة مرسيدس وهى تتباع ، قام مصدق نفسه وبعد اسبوع قال له هو انا عبيط حد يبيع مرسيدس :d


ماهى اصلا غليت عشان عليها طلب عشان قطع غيارها المفروض انها كانت رخيصة ، ازاى السبب والمسبب بيسببوا الحاجة وعكسها دلوقتى :d

ما علينا

الخلاصة واللى انا عايز اقوله انها وهى فاضية ( كل كمالياتها سنتر وفوجات ومرايات كهربا و اماكن تخزين ومسند وولاعة ! ) غالية وضحك ع الدقون بالسعر ده ، ووهى كاملة او فولى لودد زي ما بقوا يسموها ، ضحك ع الدقون اكتر لانه بيدفعك 50 الف في كماليات ! وكأنهم 5 الاف جنيه مش 50 الف !


ارجو ان تتقبلوا وجهة نظري بصدر رحب .. واسف للاطالة

وبالنسبة لملاكها ربنا يباركلهم فيها ، اللى جابها واللى حجزها واللى لسة بيفكر فيها ..