كان نفسي اجيب عربية للخضار وطلبات بنتي الصغيرة

**janagabr** · 09-09-2013 04:34 AM

من كام يوم كده لقيت معرض عربيات كبير قولت لما اخش العب جوه في العربيات المهم لاقيت عربية حلوة وصغيرة
قولت بس هي ده العربية اللي في بالي
اجبلي منها اتنين تلاته اخليهم احتياطي عندي
اهو اروح اودي البنت الحضانة واجبها من الرحلة اركبها مع اصحابها في العربية ومقلقش علي العربية لو اتبهدلت وارمي جواها العجلة بتاعتها بدل ما انا طالع نازل بالعجلة كل يوم عامل زي بتاع الديليفري وبرده اخد العربية اجيب بيها طلبات البيت من خضار وفاكهة احط الكلب بتاع مراتي في العربية واروح افسحه ولو عمل بيبي في العربية مش مشكله بدل ما انا عمال افرشله ملايات وسجاجيد في عربيتي واقعد كل يوم انضفها وارشها بارفانات عشان ريحة الاستاذ البوبي وبرده اديها لمراتي تلعب بيها وتقابل بيها صاحبتها الفاشلين
والعربية لا هتستهلك بنزين ولا تكون غالية اخاف عليها ومش هتاخد مكان في الركنة ده انا ممكن احطها في شنطة عربيتي او حتي اركنها في مدخل العمارة ناديت بتاع المبيعات خد هنا يابرنس احجزلي ٢ من ده
اللون واحدة اسود عشان مراتي وواحد احمر عشان البنت بتحب اللون الاحمر
قولتله جهز عربياتك واديني رنه اجبلك شوية الفلوس
قالي اوك يا فندم بس تعالي اقولك علي تفاصيل العربية قولتلوا ياعم مش مستهاله هي حجمها بيكلم عليها
وجابلي واحد لمون
وقالي العربية معاليك نوعها سيتروين ds3 ماتور ١٦٠٠ سي سي بتاع ١٢٠ حصان تمنها ١٨٠٠٠٠ جنية
قولتله حساب اللمون كام
يا عبد البر يا عبد البر انت فين يا راجل

**janagabr** · 09-09-2013 04:46 AM

الموضوع كوميدي ساخر هدفه التعجب من الاسعار الخرافية الي وصلت ليها العربيات في السوق المصري ولا يقصد من هذا الموضوع السخرية من السيارة بالعكس العربية حلوة جدا وتقفيلها نظيف وخامات محترمة وهي اصلا كوبية وشكلها شيك بس لما قارنتها باسعار زمان لما كانت ١٨٠٠٠٠ جنية اجيب بيها باسات ولا سيفك ولا جيتا
فاكرين لما الهوندا سيتي كانت ١١٣٠٠٠ جنية ولا البي ام ١١٦ كانت ٢٤٥٠٠٠ جنية وكانت النيسان اكس ترايل ٢٢٥٠٠٠ جنية فاكرين لما البيكانتو كانت تقريبا ٦٥٠٠٠ جنية والهيونداي اي ١٠ كانت ٦٢٠٠٠ جنية
ده ١٨٠٠٠٠ جنية دول احط عليهم كمان مائة الف وانزل اجيب الفولفو الجديدو ولا الميرسيدس a200 الجديدة ولا الرانجلير
انا مدخلتش لسه في المستعمل
ربنا كريم ويهدي الناس للصواب ويرحمنا من جشع التجار والمحتكريين

**M I D O** · 09-09-2013 05:33 AM

ههههههههههههههههه موضوع جميل والله اهم حاجة فية انك دفعت حساب الليمون

**Ahmed_Adham** · 09-09-2013 09:36 AM

المشاركة الأصلية كتبت بواسطة janagabr

ده ١٨٠٠٠٠ جنية دول احط عليهم كمان مائة الف وانزل اجيب الفولفو الجديدو ولا الميرسيدس a200 الجديدة ولا الرانجلير

خليني أزيد الطين بله وأقولك ان الفولفو الجديده ب 299 و 334 والمرسيدس a200 ب 298 لحد 408 أما رانجلر فبقت ب 299

**ah-elgendy** · 09-09-2013 09:55 AM

انا كنت عند سمير ريان امبااااارح وعلشان تشترى عربيه اوربى او يابانى او كورى اللى سعره غالى اوى هتشترى مش باقل من 175000 الف جنيه كاش ولسه لو هتقسط بجد بقت حاجه تقرف وتعقد (بس العربيات حاجه تهبل الاسترا ولا الكورولا والمازدا 3 وسيراتو )

**akmm** · 09-09-2013 11:03 AM

موضوع جميل ................... والعرض شيق واسعار السيارات مبالغ فيها ناااااااااار .

**dr.hazem** · 09-09-2013 11:23 AM

العربيات سعرها ثابت بس الجنيه هو اللي واكل زفت.....
100 جنيه امبارح غير 100 النهاردة..
تحياتي

Sent from my Xperia Arc S using Forum Runner

**Hussein_Ramdan** · 09-09-2013 01:50 PM

المشاركة الأصلية كتبت بواسطة ahmed_adham

خليني أزيد الطين بله وأقولك ان الفولفو الجديده ب 299 و 334 والمرسيدس a200 ب 298 لحد 408 أما رانجلر فبقت ب 299

بنسبة لموضوع الرنجلر دى كانت اول ما نزلت ب 215 او 220 وكان الى بيروح ياخدها كان بياخد ترخيص 3 سنين ببلاش ومعا صيانة ببلاش بردو ل 100000 الف كيلو
دلوقتى ب 300000 والى عاجبو والى مش عاجبو يخبط راسو فى اقرب حيط

-

الموضوع: كان نفسي اجيب عربية للخضار وطلبات بنتي الصغيرة

LinkBack

أدوات الموضوع

عرض

-

-

-

-

المواضيع المتشابهه

نفسي اجيب اسكورت و الناس مخوفاني فوق ما تتصورو ؟

مبتدئ و نفسي اتعلم - اجيب ايه

نفسي أجيب عربية بقاااااااااااااا

نفسي اشتري عربية

ميزنايتي 80000هل اضغط علي نفسي و اجيب صني و ادفع زياده؟

الكلمات الدلالية لهذا الموضوع

المفضلات

المفضلات

ضوابط المشاركة