الموضوع: استشارة فى مبادلة الألينترا 2012 بهوندا 2012

المشاركة الأصلية كتبت بواسطة sameh_fouad

ياأستاذى الفاضل saddam

فى مصر عندنا كل شىء مبالغ فى تمنة , يعنى من اربع سنين كنت تحط 150 الف جنية تركب عربية high line , دلوقتى تركب نفس العربية فاضية اول فئة

طيب نعمل اية مانركبش عربيات يعنى عشان الدنيا عندنا كدة , خلاص دة واقع واحنا عايشينة

- نيجى بقى لنقطة البيع , ياباشا انت لسة مشترى عربية هتفكر تبيعها , وبعدين حضرتك بتتكلم عن سيفيك مش بتتكلم عن عربية كورى او صينى او ماليزى

يعنى معاك عربية فيها انظمة امان كتير - سيارة واسعة ومريحة - وموفرة فى البنزين - من اقوى المحركات ال1600 فى مصر - ناعمة - جودة تقفيل - قلة اعطال - مصاريف تشغيل اى حد يقدر عليها

كل دة اية تخليها تكون السيارة الاولى فى فئتها

انت بتتكلم عن السيارات الالمانية : وان السيفيك لا تمثل ليهم شىء

طيب ياباشا ماتجيب كدة امثلة سياارات ونشوف اذا كانت السيفيك تستاهل ولا لأ

وكلمة اخيرة بس , عدل فى اى عربية انت عايزها , لكن الكورى مابينفعش معاة التعديل , مهما تصرف علية فى الاول وفى الاخر كورى وادائة هيفضل اداء كورى ولو فكرت تعدل هتصرف جاااااااااااااااااااااااا ااااامد جداا, يبقى من الافضل انك تبيع العربية وتجيبلك حاجة افضل

وخلى بالك دة مش كلام لأ دة عن تجارب

يمكن يكون عندك حق - لما بفكر فى سيفيك 92-94 وهى فى بورسعيد كتير بالمناسبة وتشوف الناس عاملة فيها ايه وشكلها احلى من سيارات كتير جديدة واقوى وانعم وأفضل بمراحل وتشوف الكورى لنفس السنة زى الأكسيل والأكسنت مثلا تلاقى فرق شاسع فى كل حاجة - لكن للأمانة الكورى أتقدم كتير جدا وأصبح ينافس بقوة اليابانى وقرب منه قوى والفروق لم تعد كبيرة جدا زى زمان نشوف مثلا سيارة زى الالنترا الماتريكس والفيرنا عملوا شغل عالى بالغم من انهم عاديين جدا ولغاية دلوقتى شغالين كويس

يا استاذ Sindbad اولا مبروك عالعربية و طالاما مبسوط بيها و مستريحلها نفسيا عن الالنترا يبقى خلاص متفكرش كتير اهم حاجة الاقتناع و ربنا يكفيك شرها و يديلك خيرها

يا أستاذ Sadam احنا فئة من المستهلكين غير حضرتك .. احنا ناس بنشتري العربية زيرو نستهلك فيها بالكتير 10 سنين و نقوم بايعنها .. و الهوندا مش محتاجة اننا ندلل على بيعها و الدليل السيفيك ال 92 و ال 93 اللي لسة في السوق لحد دلوقتي و ماسكة سعر عكس عربيات كتير .. حضرتك بقى من الفئة اللي بتشتري العربية و تعدل فيها .. احنا مش كدة خالص .. حضرتك عندك طولة بال تقف عند ميكانيكي و كهربائي عشان تعدل براحتك لكن احنا بنشتري العربية و بنخاف لما ميكانيكي يدب فيها مفك .. و انا معاك كليا ان العربيات برة مصر بنص تمنها حتى انا شاري السيفيك 2008 في مصر بضعف تمنها هنا في ابوظبي بعد تحويل العملة (مع العلم ان السيفيك في ابوظبي 1800 سي سي مش 1600 كمان ).. بس هي دي بلدك و المثل بيقولك عاوز تركب ادفع

المشاركة الأصلية كتبت بواسطة saddam

مبروك يا صديقي المواطن ولكن 40 ألف تدفع فرق في عربيتك فإنت كده لم تحسن اﻹختيار وكان معاك عربية تبيعها في ثانية وخدت عربية تقعد تدلل في بيعها وشكلها مش حلو وقطع غيارها غالية وإنت لو كنت بتفكر بره الصندوق كان وصلت لحل أسهل وهو ببساطة عربيتي مزعلاني من نظام التعليق الخلفي مش مصيبة أعدله بألفين جنيه وأشتري صحتي عامة إنت إشتريت خلاص وكلامي مش حيعجبك ولا حيعجب ملاك هوندا بس قدام شوية حتفتكر كلامي ودمتم.للنضال واللي عمل معاك المبادلة دلوأتي بيصلي ركعتين شكر

وجهة نظرك لها إحترامها و من حقك أن تعبر عن رأيك بحرية

إسمح لى أقولك حاجة : فيه نوع من الناس لما بيشترى سيارة مش بيهتم قوى بسعر إعادة البيع بقدر إهتمامة إن السيارة ترضى رغبته ( ركيب غاوى حاجة معينة ) و أكيد بتسمع دايما مقولة إن العربية دى ليها ناسها .

المشاركة الأصلية كتبت بواسطة sindibad

الحمد لله وبعد الأستخارة بيعت الألنترا واشتريت الهوندا فى صفقة مع التاجر والفرق الحمد لله مش كبير قوى تعتبر السيفيك وقفت عليه ب 175 الف جنيه وهى فى تى أى مش ال اكس

السيارة نبيتى غامق (طوبى) لونها حلو - ناعمة جدا - موتور قوى - عفشة ممتازة فى الأمام - ناشفة شوية صغيرة فى الخلف لكن مش مضايقانى زى الألنترا - الكاسيت صوته حلو قوى - التابلوه روعة - الشاشة الخمسه بوصة مش عارف اتعامل معاها - حد يقولى ازاى استخرج معلومات السيارة منها زى معدل استهلاك البنزين والمسافة المتبقية وكده !!!!!!!!1 - الغريبة ان مفيش فوانيس شبورة!!!! عجيبة دى - حد معاه فوانيس شبورة فى عربيته - أحسن تكون مغيرة اكصدام ؟

الجنط شكله حلو - لسه لم أصورها - ولما أصورها هاعمل بوست كامل

الفرق بين الألنترا والهوندا مش كبير قوى لغاية دلوقتى لأننى مسافرتش بيها يادوب 2 كم من المعرض للبيت

لما اجربها هقولكم ايه بالضبط الموضوع

سلام

مبروك على السيارة و ربنا يكفيك شرها و اللون رائع عليها

السلام عليكم

واتتنى الفرصة الأن لكى أقود السيارة الهوندا 2012 لمدة ساعتين ونصف مابين طريق سريع على الدولى الساحلى وطرق داخلية طريق المحلة المنصورة فى طريق عودتى الى بيتى

انطباعاتى وتقييمى للسيارة بكل أمانة وصدق من غير تحيز:-
1- المميزات:- ناعمة جدا - استهلاك البنزين اكتر من ممتاز لدرجة ان على سرعة 90 كمظساعة منتظمة بتستهلك مابين 4-5 لتر لكل 100 كيلو حسب مؤشر الأستهلاك - العفشة ممتازة جدا ناعمة مع قوة وثبات - كرسى مريح - صالون واسع لأن كان معايا الأولاد ورا فى الكنبة والمدام جنبى - الموتور قوى جدا والسحب عالى - الفتيس نقلاته سلسة ولا تحس بها - العزل ممتاز - وضعية القيادة ممتازة جدا - ممتعة فى القيادة - الدركسيون ناعم ودقيق فى التوجيه - الفرامل ممتازة ومن مميزاتها انها مش على درجة واحدة بل هى على درجتين أو ثلاثة واستجابتها سريعة - التابلوة قمة الشياكة بالرغم من ان هوندا عملته من لدائن بلاستيكية لكنها شيك وقوية ومشبحة بشكل جميل خاصة فى الضوء - المصابيح الأمامية جامدة انارة فوق الممتازة - الكاسيت صوته نقى جدا - كاميرا باركنج بخطوط تحدد لك ابعاد السيارة مع خط متقطع يحدد لك مكان وقوفك قبل المناسب - البلوتوث بيشتغل على السيارة بسهولة وبينقل سجل الأسماء والأتصال على الشاشة الخمسة بوصة الملونة - الشاشة الخمسة بوصة الملونة الوانها باينة حتى فى الشمس لأن تصميمها داخل التابلوه فعامل ظل عليها - الجنوط ممتازة الشكل والكاوتش ممتاز فى امتصاص الصدمات - الثبات جيد جدا - سهولة الوصول الى كل زراير التحكم فى السيارة - الطارة لذيذة جدا وخامتها ممتازة - زراير التحكم فى الموجودة فى الطارة سهلة وتحس انها من خامة ممتازة ناعمة واماكنها ممتازة وتوزيعها ميه ميه - المقابض الخارجية نيكل جميلة - الشنطة قتحتها واسعة تدخل حاجات عالية - واخيرا زرار الأيكون Econ - بيشتغل جد مش هزار ولا حاجة زى الألنترا وبيخنق السيارة لتوفير بنزين

2- العيوب ومفيش سيارة من غير عيوب :- يوجد صوت للهواء خلفى اثناء السير بسرعة وواضح انها محتاجة سبويلر صغير - الفتيس كان يبقى أفضل لو كان ستب ترونك زى الأنترا والسيراتو - دواسة البنزين ناعمة جدا لدرجة تخاف تسند رجلك عليها لازم دايما تخلى رجلك خفيفة عليها أو تستخدم مثبت السرعة فى حالة المشاوير السالكة - الشنطة ضيقة مش واسعة وان كان شكلها يتيح لك الأستفادة منها الأستفادة القصوى لكن لا تقارن بأختها السيتى - مفيش فوانيس شبورة ولا حتى مكان ليها فى الأكصدام علشان تركب فى التوكيل - مفيش نواكل على الأبواب الخارجية الا المقابض كان نفسى تكون موجودة أيضا على حدود الأبواب زى الجيتا الهاى لاين كده - مفيش بصمة ولا حساس ضوء أو مطر - مفتاح ريموت واحد فقط فيه ازرار الغلق والفتح والشنطة كان لازم يكون فيه واحد كمان فى حالة ضياع الأول أو فساد بطاريته - مفيش عواكس فى الأكصدام الخلفى تعكس الأضاءة فى حالة تعطل السيارة فى طريق ضلمة .

فى النهاية السيارة فى المجمل رائعة وتستاهل كل قرش اندفع فيها بالنسبة لسيارات اخرى فى نفس فئتها زى الأوكتافيا والجيتا والفورد الفوكس والألنترا والسيراتو

لو سالتنى ايه اكتر حاجه هتضايقك فى السيارة من العيوب المذكورة أنا شخصيا هقولك الشنطة الصغيرة الحجم والصوت اللى بيظهر على السرعات هحاول اعرف مصدره لأنى شاكك فى مكانه هل هو من الخلف ام من المرايا الجانبية بس لو مشغل كاسيت على صوت واطى مش هتسمعه

ودمتم للنضال

المشاركة الأصلية كتبت بواسطة sameh_fouad

ربنا يباركلك فيها , ويحفظهالك

بس ياريت تقول كلمة واحدة او اجابة واحدة هل انتى ندمان بشرائك للهوندا بعد الالنترا ؟؟؟؟؟

الى الأن لأ طبعا والف لأ - الألنترا عربية وسط فى كل حاجه - وسط فى الركوبة والنعومة والجودة والعزل - لكن الهوندا فيها حاجات متفوقة كتير وسوبر كمان